2 Korinto 3

1Kɔ isu kwikpese kukpɔ̀ dzɛ a? Loo ŋwisi banɔ dzedzeatɔ kinɛ ɛ, kizia kwizia kuplekpa gi kwipani ní blɔ su kí mlɔ ɔ, loo dɔni mlɔ klɔ ki banɔ dzedze ba na a? 2Mlɔ ɔtutɔ mlenu blɔ keplekpaa gi bɛŋwlimi ní blɔ ina nɛ mɛ ɛ, gi ɔnɔ kakaa ete e, xe ɔnɔ kakaa aatani kukla a. 3Lɛ mlɛbasɛ si mlenu keplekpa gi kɛdɔ ní Kristo klɔ ɔ, libii lɛ gi lido ɛdɔni blɔ axwɛwawa la mɛ ɛ, gi aní kiŋwlimiseʋi i, gi biatani kutsoli bɛkɔ ɛ ŋwlimi ka a, pɔ̀ Aya gbagbe yɛ Ɔfuɛfuɛ nɔ ɔ, lɛ báŋwlimi ka atrɔ ní akla aʋa a, pɔ̀ bɛŋwlimi ka ɛtrɔ ní banɔ gbagbe ba ba ina nɛ aʋa a.

4Lɛ ya linu ɔna gi ɔlɛ ní blɔ lipo ní Kristo me ní Aya aŋu mɛ ɛ. 5Aní si kwiatani kiditɔ kubitɛ ní blɔ ɔtutɔ isuwla mɛ ɛ, boŋu i, kidɔ kakaa gi kuzɛɛbitɛ ɛ, kidɔ ní Aya klɔ. 6Yɛ aki blɔ blɔ kutanɔɔ tɔ kuwa yɛ axwɛ na ŋwisi yɛ banɔsumu kinɛ ɛ, ní kunyánya vuvu yɔ mɛ. Lɛ kunyanya vuvu liɔ ya ɛ, aní ní kɔ kuŋwlimi yɔ onu u, pɔ̀ ní kɔ Ɔfuɛfuɛ nɔ mɛ onu u; lɛ ese linu si kuŋwlimi yɔ kuzɛɛmani kutse, pɔ̀ Ɔfuɛfuɛ nɔ izɛmani ligbã́ nɛ ɛ.

Kunyanya vuvu yɔ kɔ Kudradraa

7Abla xegi Kutseo kɔ axwɛ ana gi bɛwa ŋwisi ye banɔsumu kinɛ ɛ, gi kɔ isã nɛ bɛŋwlimi trɔ ní akla na aʋa, kwimani kutse e, gi nya kɔ kudradra kwiki si Mose yɛ aŋu na mɛ ezeekle e, xe Israɛl bebi ba bázɛtani yɛ aŋu na mɛ kudi i, kɔkpɛ la kuklekleo gi nya kwiklo kyɛ xe e, 8kɔlɔ kudradra ʋidi kwiaze ní Ɔfuɛfuɛ nɔ axwɛwawa la mɛ sanɔ ɔ! 9Xegi kusumu liɔ gi kuzebu banɔ lipɔ su kwidra ɛ, kitɛ xe kusumu uliɔ gi kuzɛɛki banɔ su izɛdra kutrámani kudradra ɛsanɔ ɔ? 10Lɛ ese linu si kidiliɛ gi kɛsu kidra ɛzanɔ ɛ, kɛsu kídra tɔ ɔ, xegi kwikɔ kɛ srɔni kudradra ʋidi uliɔ gi kulɛ abla a. 11Lɛ xegi kidiliɛ gi kiikpã kiba ni kudradra ɛ, kitɛ kuklekleo kiaze ki kidiliɛ gi kilɛɛ tsinɔ ɔ?

12Lɛ loso gi kudeonudidi uliɔ kuli ní blɔ awla ɛ, ɔna ɔlɛ ní blɔ lipo. 13Kúma ŋwisi Mose kiniɛ, gi akɔ kavlɔʋi ewe yɛ aŋu na mɛ ɛ, tɔ Israel banɛ ma bamɔni kuklekleo kudi kɔkpɛ lipoe lɛ gi kwiakpã ɛ. 14Pɔ̀ ba begyodi ʋa mɛ bádra a, lɛ ese linu si gakɔkpɛ ni omono e, bewe bidɔ bɛklɔ xegi bɛkla kunyanya kokoo e. Báti kɔ azanɔ ɔ, lɛ ese linu si gani Kristo aʋa ko biati kɔ. 15Kɔna ni omono kruaa kyɛ ɛ, lipoe kakaa gi bɛkla Mose kuplekpaa ɛ, kavlɔʋia keedziwe ba ina nɛ dzɛ. 16Pɔ̀ xe ɔnutɔ ekyi evu Ɔkaɛ ɛ, kɔ bɛti kavlɔʋia ɛ. 17Abla ɛ, Ɔkaɛ yɛ onu Ɔfuɛfuɛ nɔ, lɛ niklɔ gi Ɔkaɛ yɛ Ɔfuɛfuɛ nɔ ɔlɛ ɛ, niklɔ ɔwlamɔmɔ nɔ ɔlɛ. 18Blɔ banɔaya gi bɛti kavlɔʋia ní blɔ aŋu na mɛ ɛ, kwiimɔ xe kwibu Ɔkaɛ yɛ kusudraa ɛbasɛ ɛ, beekyi blo tɔ kudzi ŋwisi yɛ gi bɛki blɔ kusudra a, gi kwikeme sanɔ ɔ, gi kwidɔ ni Ɔkaɛ ɛ, gi onu Ɔfuɛfuɛ nɔ klɔ ɔ.

Currently Selected:

2 Korinto 3: avn

Highlight

Copy