2 Korinto 11

Paulo Ni Asia na Banɔkpɛkpɛ ba

1Megyo le edi si mlaazi mɛ xegi mɛɛdɔ kuga taʋɛ fɛ ɛ; Mlɛɛbitɛ lɛ nite kokoo! 2Mɛɛgɔni kìfu ní mlɔ onu lɛ kìfui liɛ gi mɛgɔni i, kidɔ ní Aya klɔ. Mlalɛ ko ŋwisi ɔdisami gi makpɛ kuwlawla akɔ akí onyime tole e, Kristo kinɛ. 3Meese lifu ne si biapisa mlɔ begyodi ʋa ŋwisi kiliɛ gi ɔgblagaɛ akɔ ɔdaye lo emeni Eva kiniɛ ɛ, lɛ mlɔ begyodi ʋa biasɛ ní mlɔ ɔna mɛ dradra ni kulɔlɔ petee aki Kristo su u. 4Lɛ ese linu si xegi mlezenu banama a, gi bɛba ɛzɛpani ní Yesu dzedze su liboe ɛki mlɔ ɔ, gi liga lidze ní Yesu liɛ ɛ, gi yɛ su liboe kwiba ɛpani ɛki mlɔ ɛ, loo mlɛzi Ɔfuɛfuɛ dzedze gi ɛga lidze ní lɔ klɔ ɔ, gi mlɛzɛ su i, loo mlenu Liboe Gbã gi liga lidze ní Liboe Gbãɛ nɛ gi mlɛzɛ su i, mlalɛ ní kublabla mɛ si mlazi lɛ kyɛ!

5Mámɔ lɛ si “banɔkpɛkpɛ dzi aŋu mɛ” ba klɔ ʋa, bɛɛpɛ sani mɛ ɛ. 6Nyafɛ béhe me ŋwisi ɔnɔ gi aapani ní banɔ kusi i, pɔ̀ kuboesenu kulɛ ní mɛ awla a; lɛ kwidra lɛ mɛ ki mlɔ lipoe kakaa gani kude kakaa onu u.

7Liboe zimizi linu si mibubɔ isu tɔ mimuni mlo gani Aya yɛ liboe le gi mapani aki mlɔ faã a, gi mázi kibɔ ní mlɔ awla na a? 8Lize ŋwisi mazeezuru isɔliha dzedze le gi mazi kupɔnɔ adɔ ni ba klɔ ɔ, xe makɔ kɔ apɔni mlɔ ɛ. 9Lɛ gi mazɛɛwa axwɛ na ní mlɔ kusi i, xe mazia kiditɔ ɛ, méze lidɔtu iiki ɔnɔnɔ ɔ, lɛ ese linu si benemi ba ya gi bɛdɔ ní Makedonia ɛ, bɛzɛɛki mɛ kidiliɛ gi mazia ɛ. Medi le aʋa si méze lidɔtu iiki mlɔ ní kude utɔtɔ onu u, lɛ maadi le aʋa si maatrɛ ní lɛ aʋa nite e. 10Ní Kristo yɛ anukwarɛɛ liɛ gi ɔlɛ ní mɛ mɛ̀ onu i, ɔnɔnɔ ni Axaya kesea mɛ ɛ, ɔ́tratsi kude ɛki mɛ kusufeke uliɔ ya a. 11Ege loso e? kilɔ málɔ mlɔ loso a? Aya ete si malɔ mlɔ!

12Matratrɛ ní lɛ aʋa tɔ mibitɛ kidiliɛ gi kɛ mɛɛbitɛ abla ɛ, atɔ mitsi kudeonu ikí banɔkpɛkpɛ ba klɔ gi bɛɛpɛ kudeonu u, si tɔ bamɔ ba si blɔ ni ba kwisɔ ní eboa la gi bɛɛpani i mɛ. 13Lɛ ese linu si banɔ báklɔ ba ɛ, benu asia banɔkpɛkpɛ, benu baxwɛwa gi bizeemeni banɔ ɔ, gi bekyi isu ya a, ŋwisi Kristo yɛ banɔkpɛkpɛ kinɛ ɛ. 14Lɛ likítu mlo kugyɔ ɔ, lɛ ese linu si Satana ɔtutɔ lɔ ɛ, abitɛ yɛ isu ya ŋwisi Aya yɛ ɔxwɛdzɛ gi izekle kinɛ ɛ! 15Lɛ loso e, línu liboe gi liatu ɔnɔ kugyɔ ɔ si yɛ baxwɛdzɛ ba fɛ, bɛtsrɛ ba isu ya tɔ baŋwi ŋwisi banɔsumu gi ba bede ʋa bɛgyɔ ɔ. Ba oblono kɔ aaze kidiliɛ ɖii gi ba kiboebitɛɛ kiʋi i.

Paulo adɔ isu ya ní yɛ Ɔzia mɔmɔ nɔ aʋa

16Meedzini ipani si: ɔnɔnɔ ɔki gyo le edi si menu kanukpaʋi i. Pɔ̀ xe wɔzi lɛ nite e, lɛ kɔ mlazi mɛ ŋwisi kanukpaʋi atɔ midɔ̀ isu ya taʋɛ. 17Ní mɛ kusudɔɔ liɔ ya mɛ ɛ, máʋipani ŋwisi kiliɛ gi Ɔkaɛ aapani i, boŋu i, mɛɛpani ŋwisi kanukpaʋi kinɛ ɛ. 18Agi banɔ glegle bɛɛdɔ isu ya ní kelea mɛ bede ʋa onu i, mɛ fɛ maadɔ isu ya. 19Mlɛplɛ litɔ kese ki kunukpaʋiɔ ni isami lɛ ese linu si mlete liboe koŋ! 20Ní anukwarɛɛ mɛ ɛ, mlɛzɛɛzi ɔnɔ kakaa elue gi aabitɛ mlɔ yɛ banɔdzidzi loo ɔnɔ gi aakpɛ mlɔ klanɔ ɛ, loo amɔ ɔŋakɔ ní mlɔsu u, loo izeefeke isu ní mlɔ aʋa a, loo aasa mlɔ bidɔ ní aŋu na mɛ ɛ. 21Linu mɛ kuye si mizɛ lɛ si kwize befufluse gbɛgbɛ nite gi kwibitɛ eboa la ya ɛ!

Pɔ̀ xe ɔnutɔ aakenidi si yidɔ isu ya ní kiditɔ su i, mɛ fɛ maadɔ isu ní kɛ su u; mɛɛpani ŋwisi kanukpaʋi kinɛ. 22Hebrianɛ benu na a? Mɛ fɛ Hebriɔnɛ menu. Israelbanɛ benu na a? Mɛ fɛ Israelɔnɛ menu. Abraham yɛ besoebi benu na a? Mɛ fɛ Abraham yɛ osobi menu. 23Kristo yɛ banɔsumu benu na a? Masani ba. (Mɛɛpani ŋwisi ɔnɔ gi yɛ aŋu mɛ eezizi kinɛ ɛ). Mawa axwɛ gagla sani ba, meze ligba lipoe glegle, bekusi me mɔmɔɔmɔ, lɛ meze kutse iwla mɛ lipoe glegle e. 24Yudanɛ ma bɛfiaʋi mɛ biseʋi avitata ni ɔgɔtile afiaʋi tetsu zizi; 25Tatá zizi bɛfiaʋi mɛ biseʋi ʋe; lɛ bɛsa mɛ akla tule e. Onitsahu lo ɛyaʋi nì blɔ tatá, gi mawɔ ní axu la mɛ elesi zizi nì liwe tile e. 26Mazɛ aklanɔ lipoe kakaa, lɛ meze kuxixa mɛ ɛ, dɔni inipe le kɔ, dɔni banama gi bɛtsa bede ʋa ɛki mɛ kɔ ɔ, dɔni blɔ ɔtutɔ blɔ akɔanɛ ma iwla mɛ ni banama gi bénu Yudanɛ ma ba iwla mɛ ɛ, baxixa ʋa beze ní ima ʋidi ne me, ni kumami yɔ mɛ, ní axu la aʋa, ani banama gi benu asia baʋaziŋa ba klɔ ɔ. 27Mawa axwɛ ni kupèpè; gi lipoe glegle e, mázadɔ sra; Kuʋɛ ni olile eku me; lɛ lipoe glegle e, máŋa kididɔ ɔ, lɛ kublɔ kwizeku me gi mámɔ ɔ ewu gi maakpɛ fɛ ɛ. 28Lɛ ní la klɔ ʋa kede e, mɛ begyodi ʋa mɛ báʋidɔ liwewe gi mɛ aŋu me éple kese kí isɔli ha lɛ petee loso o. 29Nyaŋwɛ ebotso xe mɛ mébotso o; lɛ xegi bɛgbani ɔnutɔ ɛkpɛ ní eboe zimizi me e, mizɛɛnu kuyeʋiyeʋi ní mɛ isu ya mɛ.

30Xe linu si midɔ̀ isu ya ɛ, maadɔ isu ní kudɔkpaa liɔ gi kwibasɛ si kigagla kíma ní mɛ awla ɛ su. 31Aya gi onu Ɔka kí Ɔkaɛ Yesu u, gi yɛ biakpɔ̀ tsinɔ ní kanɔmɛ ɛ, ete si máʋisɛ asia a. 32Agi meze ní Damasko e, ɔma nɔ ɔʋadi ye gi eze ní Okusi Areta ese e, akpɛ banɔpe ba ní ɔma ʋidi no lɔ kuvunu yo tɔ bevu me e. 33Pɔ̀ bepleni me ní kasɔʋi mɛ gani ligli le fɛsrɛ ɔtɔ me, lɛ mese ní yɛ su i.

Currently Selected:

2 Korinto 11: avn

Highlight

Compare

Copy