1 Timo 6
6
1Si Banama gi benu banɔdzidzi i, xe bali ní kunɔsumu ese e si, bebù ba baka ba ní kapɛ kakaa mɛ, atɔ ɔnɔnɔ ɔkipani eboe zimizi mani Aya linyi ne ni blɔ bidɔbasɛbasɛ ʋɛ su. 2Banɔdzidzi ba ba gi balɛ ní basɔlisɔli ba kaʋadi ese e, bakídi ba baka ba aŋu mɛ, gi benu benemi loso o. Boŋu i, lilɛ si besumu ba sanɔ, lɛ ese linu si banama gi bɛmɔ libi bu ní ba axwɛ na mɛ ɛ, benu baʋaziŋa gi bɛdimɛ nɔ ɛ. Eboa la ɛzia si wɔabasɛ xe wɔaze ɔkpɛ ba kigagla a.
Asia kudɔbasɛ ni Kuxixa liɔ gi kulɛ ní exo la kupɛpɛ su u
3Ɔniliɛ gi aabasɛ kidɔ dzedzeetɔ ɔ, gi kíma ni baʋaziŋa ba kudeonu u, xe ɔ́trazɛ Yesu Kristo yɛ Liboe Gbã nɛ ni kusɔliɔ bidɔbasɛbasɛ ʋɛ ɛ, 4eyi ni kusudɔ lɛ ónu eboe ese e. Adimɛ nì, eboe hehe ni kuboeŋwlɛ, gi kuzɛɛmani kaŋuza a, eboe ese kumonumonu, banɔ su kuzizi, ni begyodi zimizi, 5ani eboe hehe lipoe kakaa ni banama gi ba begyodi ʋa baʋíwa axwɛ na a, xe anukwarɛɛ ɔ́ma ní bamɛ tɔ ɔ. Bizeebù si Aya kusumu yo kunu kudeo tɔ onu gi wɔaga xe wɔamɔ kibɔ ɛ.
6Pɔ̀ Aya kusumu yo ni isami i, kuzebu libi ɛki yɛ ɛ. 7Lɛ ese linu si kúmani kididɔ kelea mɛ ɛ, gi bɛpɔ blɔ ɔ, lɛ kútratani kididɔ kúkɔsɛnɔ ní kelea lia mɛ xe kwitse e. 8Kɔlɔ, xe kiŋaŋa ni ewu alɛ blɔ awla ɛ, linu si biku blɔ liŋu. 9Pɔ̀ banama gi bizɛɛpɛ si bɛɛmɔ exo e, bizɛɛdɔ eku ní kufekedi me lɛ bizɛɛdɔ ozimizi ye kùpe ni begyodi zimizi, olése zimizi gi kuzɛɛgbani ba ɛtsinɔ kuzizi ni kukyrɔkyrɔ mɛ ɛ. 10Lɛ ese linu si kibɔɛ kudimɛnɔ ɛ, kɔ kunu kuzimizi yo pɔ́ kɔ okpese klɔ. Banɔatɔ ɔkpɛ gi bɛŋwlɛ si bɛmɔ exo la loso e, bɛlila ní ba kuziŋaa mɛ, lɛ bɛkpɛ isu ebi gani lɛ mɛ ɛ.
Lɛ ní wɔ kuziŋaa aʋa
11Pɔ̀ wɔ gi wonu Aya yɛ ɔnɛ ɛ, se ní eboa la ya petee su. Ŋwlɛ kí eboe gbã, Aya kusese, kuziŋa, kulɔlɔ, eboe onu kulɛlɛ, ni litɔplɛplɛkese kese. 12Ŋwlɛ ní wɔ kuziŋaa mɛ tɔ zi ligbã moblo le, gi lɛ loso Aya axwa wɔ ɛ, lipoe lɛ gi wɔdra ɔna mɛ ní banɔ glegle ba ya gi bɛɛŋa katsalia aŋu mɛ ɛ. 13Ní Aya gi yɛ izɛɛki kidɔ kakaa ligbã́ aŋu mɛ ɛ, ni Kristo Yesu, lipoe lɛ gi yɛ alɛɛ ní Pontio Pilato aŋu mɛ ɛ, xe azeebu isu ya onu i, xe adra isu mɛ ɛ, makpɛ ɔsã aki wɔ 14si wukíplà ní eboa la ya aʋa a, tɔ ɔnɔnɔ ɔkipani eboe zimizi ní wɔ su u, kɔzɛna ni lipoe lɛ klɔ gi blɔ Ɔkaɛ Yesu Kristo aaŋwi i. 15Aya ɔtutɔ aaki Yesu Kristo aaŋwi ní lipoe gbã nɛ aʋa, Aya gi biakrira a, gi yɛ tètè ko onu Ɔʋaŋa ɛ, bekusi ba Okusi ye, ni baka ba Ɔkaɛ. 16Yɛ ko oʋítse e; yɛ ɔlɛ ní kuklekle gagla gi ɔnɔnɔ ɔ́tratani kutipɔnɔ mɛ ɛ. Yɛ gi ɔnɔnɔ ɔʋímɔ ʋidi i; xe ɔnɔnɔ fɛ ɔ́tratani kumɔ ɛ. Yɛ binɛ binu kukpɔ̀kpɔ̀ ni kigagla kɔtsinɔ kanɔmɛ anɔmɛ. Atɔ liba lɛ mɛ.
17Kpɛ ɔsã ki banama gi benu bexonete ba ní kelea lia mɛ si bakídɔ isu u, lɛ bakíkɔ ba aŋu atrɔ ní ba exo la aʋa a, boŋu i, bakɔ ba kudeonudidi yo atrɔ ní Aya gi yɛ izɛɛki blɔ kidɔ kakaa a, ní kisrɛsrɛ mɛ kí blɔ isami mɔmɔ nɛ aʋa a. 18Kpɛ ɔsã ki ba tɔ babitɛ eboe gbã, beze bexonete ní axwɛ gbã kuwawa mɛ, baki banɔ bidɔ, tɔ balɛ ba exo la ni banɔdzedze ba faã a. 19Gani lɛ mɛ ɛ, biabla exo kí isu ya gi biaaze ɔxɔ gagla kí ligbã́ɛ nɛ ɛ, gi litraba ní ɔtɔ nɔ mɛ ɛ. Tɔ biavu ligba ɛnɛ gi lɛ koŋ linu ligbã́ nɛ ɛ.
20Timoteo, di kidiliɛ gi bɛkɔ ɛkpɛ ní wɔ awla ɛ aʋa. Kúta asasaboe ni agaboe kuhehe gi banɔatɔ bɛzɛxwa si “Kuboeteo” kutu u. 21Gi banɔatɔ bɛkɔ lɛ si bilɛ ní ba awla a, lɛ gani lɛ mɛ ɛ, bɛlila kudeo kí kuziŋaa.
Aya ɔpɛ lipo me ɔki mlɔ.
Currently Selected:
1 Timo 6: avn
Highlight
Share
Compare
Copy
Want to have your highlights saved across all your devices? Sign up or sign in
© Ghana Institute of Linguistics, Literacy and Bible Translation, 2017 In cooperation with Wycliffe Bible Translators, Inc
