1 Timo 5

Kugbagba ni banɔtsitsi ba, badzɛa ba gi ba benye ba betse e, ni banɔdzidzi ba su

1Wukítɛni onyime gi etsi asani wɔ, pɔ̀ Gbã yɛ ŋwisi wɔka kinɛ ɛ, tɔ vu iyasɔʋi lɛ ŋwisi wɔ beneminyime kinɛ ɛ. 2Kɔ badzɛtsitsi ba ŋwisi wɔ bene kinɛ ɛ, ni idisami nɛ ŋwisi wɔ benemidzɛ kinɛ, ze ní kudradra mɛ nì ba.

3Badzɛ ba ya gi ba benye ba betse e, xe ɔnɔnɔ ɔ́ma ní ba su u, xe bɛziã kupɔnɔ ɛ, kpɛ kubùbù ní ba su tɔ pɔni ba. 4Pɔ̀ xe bebi balɛ ní badzɛa ya awla a, loo besoebi balɛ ni ba awla ɛ, ki tɔ bakpasi lɛ adɔ ni ɔtɔpu kɔ si, xegi beedi ba benete ba aʋa ɛ, bɛwa ba kusɔliɔ su axwɛ ni kɔ kudeonu. Gani lɛ ya mɛ ɛ, beedzini aʋɛ ana gi bɛɛdɔ ní ba bapɔnɛ ba su i, beedzini la ɛtsa ɛki ba, lɛ lɛ ya lizeeku Aya aŋu u. 5Ɔdzɛ liɛ gi yenye etse e, xe yɛ tete ko ɔlɛ ɛ, xe ɔnɔnɔ ɔ́ma gi aadi yɛ aʋa ɛ, akɔ yɛ kudeonudidi yo petee akpɛ ní Aya awla, lɛ izɛɛxwa Aya elesi ni kemize lɛ izeeʋi ye kupɔnɔ ɔ. 6Pɔ̀ ɔtrɛtrɛ yedze liɛ ɛ, gi aakɔ̀ isu akí ligbã́ kuŋaŋa ɛ, etse ní Ɔfuɛfuɛ nɔ mɛ kooko gi ɔlɛ ligbã́ nɛ kyɛ ɛ. 7Kɔ batrɔtrɔ ʋa ya ki ba, atɔ ɔnɔnɔ ɔkibu ɔnɔnɔ lipɔ ɔ. 8Pɔ̀ xe ɔnutɔ ɔ́kɔ lɛ mɛ ɔki yɛ benete ba a, loo yɛ bapɔnɛ ba ɛ, alila yɛ kuziŋaa lɛ anyani asani ɔmɔziŋa a.

9Wukíkɔ ɔdzɛ gi yenye etse e, pɔ̀ xe ɔ́zɛ ɔ́sani agɔ aviteglo e, yɛ linyi ne kɔpɔni badzɛa ba gi ba benye ba betse e, ba enyina a. Lɛ mledi le aʋa si eɖi anukwarɛɛ aki yenye e. 10Lɛ bete ye si izɛɛbitɛ eboe gbã; ɔdzɛ gi ete bebi kiganɔ ɔ, izɛzi bababa ba, izeesumu yɛ ahanuglɔ baʋaziŋa ba, izɛpɔni banama gi balɛ ní kuxixa mɛ ɛ, lɛ akɔ isu akɔ akí liboe gbã kakaa kubitɛ ɛ.

11Pɔ̀ wukíkpɛ badzɛ ba ya gi bétsi i xe ba benye ba betse e, enyi na ní la mɛ; lɛ ese linu si xe ba kusuŋwasiɔ kwiŋa ba aʋa ɛ, biayurɔ Yesu kpɛ ní kedea kɔ bazeedi ni benyime e, 12kɔ bɛmani litsixwaxwa ní su ya aʋa ɛ, ɔkpɛ gi bɛta ba kakáplɛ tɔpu ya ɛki Aya ese loso o.#5:12 Badzɛa ya gi ba benye ba betse e, bizɛɛ ka ɛlpɛ si batrá zeni onyime tɔɔ pɔ abla ɛ bazeedini benyime. 13Kɔpɔnɔ ɛ, gi kididɔ kíma a, gi biabitɛ ɛ, bizɛɛga ɛklanɔ dɔni kepe me tsini kepe me; lɛ linyaninyani nɛ linu si i, bátradzi basranɛ tètè e; pɔ̀ gi bɛkpasi onugutro lo kugugu yo e, kɔ bɛga kagadu ya kɔ bɛpani eboe pluplu ala gi líma si bazɛɛpani i. 14Lɛ loso e, maapɛ si badzɛa ba gi bétsi i, xe ba benye ba betse e, beze ni benyime, tɔ bapɔ̀, atɔ bedi ba kupeo aʋa, tɔ bakíki ahwafiɔnɛɛ kudeonu si ozizi blɔ su u. 15Badzɛatɔ gi ba benye ba betse e, bɛlila kooko gi bali ni ozimizi ye kude e. 16Pɔ̀ xe badzɛ gi ba benye ba betse e, xe balɛ ní ɔʋaziŋa ɔdzɛ ɛtɔ kepe me e, lɛ kɔ odi ba aʋa tɔ ɔkikɔ ba lidɔtu le kɔɛtrɔ ní ɔha lɔ aʋa a, atɔ ɔha lɔ pɔ̀ odi báklɔ gi ɔpɔnɔpɔnɔ ɔ́ma ní ba awla ɛ aʋa.

17Banɔtsitsia klɔ gi bizɛɛgbani baʋaziŋa ba ɔha lɔ ɛ, begyeno si baki ba kubùbù glegle ni liʋɛ, sanɔ ɛ, ki banama gi bizɛɛpani Liboe Gbã nɛ ɛ, xe bizɛɛbasɛ bidɔ mɛ kyɛ ɛ. 18Lɛ ese linu si kuŋwlimi dradraa kwipani si, “Wukínya onugu lo ɛki ligume ne gi wɔɛkɔ ehe lihɔkla nɛ ɛ”#5:18 Ligume ne lizeehe likla nɛ ni amu na aʋa kɔ amu na eegu i ani “Lilɛ si batsà liʋɛ akí ɔxwɛwa yɛ.” 19Wukíxo ɔnɔ onu kutsatsa kutu ní ɔnɔtsitsi ye su u, xe aní banɔ tiaʋa loo sanɔ bɛmani kunutsatsa a. 20Tɛni banama gi bɛta kese ní ɔhá lɔ kusi i, tɔ lifu liku banɔ gɔgɔ ba.

21Ní Aya, Yesu Kristo ani Aya yɛ baxwɛdzɛ ba aŋu mɛ ɛ, maxwa wɔ si xo batrɔtrɔ ba ya pɔ́ oto, tɔ wukídi banɔ aŋu mɛ, loo tɔ di ɔnutɔ asigaga ní wɔ kigaglaɛ mɛ ɛ. 22Wukíkɔsi si wutrɔ awla ní ɔnɔ aʋa kí Ɔkaɛ yɛ axwɛwawa la a. Wukítrɔ ni banima eboe zimizi na aʋa a, vu isu ya tɔ ki wɔ isu idra a.

23Wukíŋwɛ kuni tètè ko, pɔ̀ ŋwɛ wain yɛ taʋɛ tɔ ɔpɔni wɔ lipo le me, gi lipo le me lizɛta wɔ lipoe me ni lipoe me e.

24Banɔatɔ bá eboe zimizi na ɛɛŋwi gi ɔnɔ kakaa ɛɛmɔ ɛ, lɛ ba kuzimizi yo kwiku ba ɔtɔ ɛtrɛ ní otsixwaklɔ ɔ; pɔ̀ banɔ dzedze ba ba eboe zimizi na aaŋwi lɛ kede e. 25Niteme ke bidɔ gbã kubitɛ ɛ, kuzɛɛŋwi, lɛ la klɔ gi la su ádra kyɛ ɛ, bátratani la kukpo o.

Currently Selected:

1 Timo 5: avn

Highlight

Compare

Copy