2 Timo 1
1
1Keplekpaa lia ya kɛdɔ ní mɛ Paulo kɔ gi menu Yesu Kristo yɛ ɔnɔkpɛkpɛ yɛ ní Aya yɛ kupɛpɛɔ onu u, gi bɛkpɛ ní ligbã́ moblo le kakaplɛa a, gi kalɛ ní Kristo Yesu me onu u.
2Ki Timoteo, mɛ obi gi malɔ ɛ. Atɔ Kaka Aya ni Yesu Kristo blɔ Ɔkaɛ bapɛ lipo me aki wɔ tɔ bedi wo asigaga tɔ baki wɔ kusuyɔ.
Paulo edo Aya ɖase lɛ akpɛ ɔna ní Timoteo lipo o
3Medo Aya gi mizeesumu u, ŋwisi kiliɛ gi mɛ bakatsitsi ba bɛzɛɛbitɛ kinɛ ɛ, ɖase ni ɔna gi ɛdra ɛ. Mizɛɛplɛ aŋu ní wɔ aʋa elesi ni kemize xegi mɛɛxwa Aya ɛ. 4Maplɛ aŋu ní wɔ kubeo aʋa, lɛ linu mɛ kupɛ́pɛ si mimɔ wɔ, tɔ isami iaku me. 5Bɛplɛ aŋu iiki mɛ ní kuziŋa dzudzu liɔ klɔ gi kulɛ ní wɔ awla a su, kuziŋaa liɔ klɔ gi kwize ní wone tsitsi ye Loide ni wone Enike me e, gi bɛka lɛ aʋa ɛki mɛ si kulɛ ní wɔ kyɛ wɔ mɛ ɛ. 6Lɛ loso mɛplɛ aŋu lɛ aʋa ɛki wɔ tɔ ki kidiliɛ gi Aya aki wɔ ɔ, lipoe lɛ gi matrɔ awla ní wɔ aʋa ɛ, ki tɔ kidzi kifu gi kiisɔ ní wɔ mɛ ɛ. 7Lɛ ese linu si Ɔfuɛfuɛ ɔnɔ klɔ gi Aya aki blɔ ɛ, aní lifu ɔnɛ ɛ; boŋu i, Ɔfuɛfuɛ gi ɛki blɔ kigagla a, kunɔlɔ ni isu aʋa kuŋaŋa.
8Lɛ loso kuye kukíku wo xe wɔɛŋa katsalia ɛki blɔ Ɔkaɛ ɛ; loo tɔ se kuye ní mɛ su, gi malɛ ligba akí Kristo o. Boŋu i, pɔni mɛ tɔ kutu Liboe Gbã nɛ ɔzia kakaa gani kigaglaɛ gi Aya aki wɔ mɛ ɛ. 9Ebu blo adɔ ni blɔ eboe zimizi na mɛ lɛ axwa blɔ tɔ kuze ligbã́ dradra, aní gani blɔ liboe gbã kubitɛ mɛ ɛ, pɔ̀ gani yɛ ɔtutɔ yɛ kupɛpɛ ni lipomepɛpɛ mɛ. Aki blɔ lipomepɛpɛɛ lɛ ya gani Yesu Kristo me dɔni okpese klɔ ke, 10lɛ abla ɛ, Aya ebu le abasɛ blɔ gani blɔ Ɔnɔbu ye Kristo Yesu me, gi yɛ aŋa kutseo kigaglaɛ aʋa a, lɛ gani Liboe Gbã nɛ mɛ ɛ, ebu ligbã́ moblo le abasɛ. 11Aya axwa mɛ ŋwisi ɔtɔ ɔnɔkpɛkpɛ ni ɔdɔbasɛ tɔ miklaa Liboe Gbã nɛ. 12Lɛ kɔkpɛ eboa la ya loso mɛɛmɔ ɔzia lɔ ya elue e. Pɔ̀ kuye kuʋíku me e, lɛ ese linu si mete ɔniliɛ klɔ gi yɛ aʋa mazi aŋa ɛ, lɛ maka ní lɛ aʋa si aatani kidiliɛ klɔ gi makɔ akpɛ yɛ awla ɛ, aʋa kudi mɔmɔɔmɔ kɔzɛna ni liwe lɛ klɔ aʋa.
13Eboa la gi wonu dɔni mɔklɔ ɛ, vu na mɛ awla mɔmɔɔmɔ, ŋwisi liŋwitsɛ kinɛ ɛ, ki kudɔbasɛ gbã atɔ ze ní kuziŋaa ni kunɔlɔɔ, gi binu blɔ binɛ ní likpɔkpɛkpɛ mɛ ni Yesu Kristo me e. 14Gani Ɔfuɛfuɛ Dradra lɔ kigaglaɛ gi kikpasi ní blɔ mɛ ɛ, vu bidɔ gbã ɛ mɛ gi bɛkɔ ɛkpɛ ni wɔ awla ɛ mɛ.
15Mazi aŋa si wote si baʋaziŋa ba kapɛ ʋidi ya ni Asia kesea mɛ ɛ, kɔpɔni Figelo ni Hermogene bɛɛdzi kede ní mɛ su.
16Atɔ Ɔkaɛ odi Onesiforo yɛ kepea asigaga, lɛ ese linu si akpɛ mɛ isami epoe glegle. Kuye kúku ye si bɛkpɛ mɛ ní ligba a, 17pɔ̀ kiliɛ gi eku Roma ko e, lɛ ekpese mɛ litukpo kuʋi i, zɛkɔna ni lipoe lɛ klɔ gi amɔ mɛ ɛ. 18Atɔ Ɔkaɛ Yesu odi yɛ asigaga ní litsixwawe le aʋa! Lɛ wote wee bede ʋa ya onu gi apɔni mɛ ní Efeso e.
Currently Selected:
2 Timo 1: avn
Highlight
Share
Compare
Copy
Want to have your highlights saved across all your devices? Sign up or sign in
© Ghana Institute of Linguistics, Literacy and Bible Translation, 2017 In cooperation with Wycliffe Bible Translators, Inc
