1 Timo 4
4
Paulo agba Timoteo
1Ɔfuɛfuɛ dradra lɔ ɛdra lɛ mɛ si ní ewe gɔgɔ la mɛ ɛ, banɔatɔ bɛtráyurɔ ba kuziŋa; lɛ biazeni asia na ifuɛfuɛ nɛ kude e, lɛ biazɛ kudɔbasɛ uliɔ gi ifuɛfuɛ zimizi ne izɛbasɛ ɛ.
2Kudɔbasɛ uliɔ klɔ ʋa ɛ, kwidɔ ní kulagadzekpa basia nɛ gi ba ina nɛ itse e, ŋwisi ɔlaa kpikpi bɛkɔ ɛkani ba kinɛ ɛ kɔ. 3Banɔaklɔ ba bizɛɛbasɛ bidɔ si benyime ba bakígbani badzɛ ɛ, loo si badzɛ ba bakízeni benyime e. Lɛ bizɛɛbasɛ si banima bakíŋa bidɔŋaŋaɛtɔ gi Aya abitɛ ɛ, si banama gi bɛziŋa a, xe bete anukwarɛ ɛ, baŋa tɔ bedo Aya ɖase ni bɛ litukpo. 4Lɛ ese linu si kidɔ kakaa gi Aya abitɛ ɛ, kipɛ̀; mlakígbe kididɔ ɔ, xegi mlɛzi kɛ ní Aya kuxwaxwa ni ɖase kudodo me e. 5Lɛ ese linu si Aya liboe le ni yɛ kuxwaxwaa kwidra kiŋaŋaɛ klɔ su u.
6Xegi wɔbasɛ benemi ba batrɔtrɔ ʋa ya ɛ, wɔaze ɔnɔsumu gbã kí Yesu Kristo ní kiliɛ gi bɛgani wɔ ní Ɔfuɛfuɛ nɔ mɛ ɛ, ní kuziŋa anukwarɛ ni kudɔbasɛ gbã liɔ gi kɔ kude wozeno me e. 7Kúkpɛ ɔha ni kelea lia mɛ eboe ni kudzídzi pluplu gi kúbu libi i, boŋu i, he isu ki ligbã́zeze gbã ŋwisi ɔʋaziŋa kinɛ ɛ. 8Isu kuhehe kwipɛ̀, pɔ̀ tɔ kpasi Aya yɛ liboe le tɔ zeni lɛ kude e, kwipɛ sanɔ ní kapɛ kakaa mɛ, lɛ ese linu si kakaplɛ kalɛ ní lɛ mɛ ki kesea aʋa ligbã́ ɛnɛ ya ni ligbã́ ɛnɛ gi litrába kutseo kede e me. 9Anukwarɛ liboe linu gi lilɛ si bazɛ ɛ, ni tɔ baziŋa. 10Kuzɛɛŋwlɛ lɛ kuzɛɛkpɛ ikù nɛ, lɛ ese linu si kwikɔ blɔ kudeonudidi yo kpɛ ní Aya gi ɔlɛ ligbã́ nɛ ɛ, yɛ awla. Yɛ onu ɔnɔbu ye ɔki ɔnɔ kakaa, lilɛ gi liplànɔ ɛ, ki banama gi bɛziŋa ɛ.
11Kɔ̀ eboa la ya kɔ̀basɛ ba bidɔ. 12Wukíki kudeonu tɔ ɔnɔnɔ ɔmɔ wɔ ese e, gi ɔyasɔʋi ko wonu loso o, pɔ̀ ze liŋwitsɛ kí banama a, gi bɛziŋa ɛ gani wɔ kunugu yo me e, wɔ kizezee me, wɔ kunɔlɔɔ mɛ, wɔ kuziŋaa ni wɔ kudradra mɛ. 13Kɔzɛna ni liwe lɛ gi maaba ɛ, kɔ wɔ lipoe le ni wɔ kuŋwlɛŋwlɛɔ kí liboe le kuklàklà ni ɔha lɔ kusi, ki Aya liboe le kudodo ni kudɔbasɛ. 14Wukíyurɔ Ɔfuɛfuɛ nɔ mɛ bidɔkɔkɔɛ bɛ klɔ gi bikpasi ní wɔ mɛ ɛ, gi bɛki wɔ gani kuboedoplɛ mɛ ɛ lipoe lɛ gi banɔtsi ba bɛtrɔ awla ní wɔ aʋa a. 15Bitɛ eboa la ya tɔ kɔ isu kpɛ ní la mɛ lipoe kakaa, tɔ ɔtɔ kutrɛtrɛ ní wɔ ligbã́ nɛ mɛ ɛ, kwiaŋwi ki ɔnɔ kakaa tɔ biamɔ. 16Vu aŋu ní wɔ isu ya su, tɔ vu aŋu ní wɔ bidɔbasɛbasɛ ʋɛ su mumɔ. Kpɛ ikù nɛ ní la kubitɛɔ mɛ ɛ, lɛ ese linu si xe wɔbitɛ nite e, wɔabu isu ya nì banɔaklɔ gi bizeenu wɔ liboe le e.
Currently Selected:
1 Timo 4: avn
Highlight
Share
Compare
Copy
Want to have your highlights saved across all your devices? Sign up or sign in
© Ghana Institute of Linguistics, Literacy and Bible Translation, 2017 In cooperation with Wycliffe Bible Translators, Inc
