1 Petro 4

Mleze Ligba Ŋwisi banama gi Bɛzɛ Aya aʋa ɛɛŋa kinɛ ɛ

1Lɛ loso gi Kristo amɔ ɔzia nɔ ní yɛ kisugyaɛ mɛ ɛ, lilɛ si mlɔ fɛ mlakpɛ isu kigagla ni begyodi ʋa klɔ ke gi beze ní yɛ awla ɛ, lɛ ese linu si ɔniliɛ klɔ gi amɔ ɔzia nɔ ní yɛ kisugyaɛ mɛ ɛ, ɔ́kpɛ ɔha ni eboe zimizi tɔ ɔ. 2Lɛ klɔ ʋa loso e, yɛ ligbã nɛ dɔni abla kɔtsinɔ ɛ, líma ɛki kelea lia ya me kisugya mɛ kupɛ́pɛ zimizi i, boŋu ki Aya yɛ kupɛ́pɛ ɛ. 3Lɛ ese linu si mlezizi lipoe glegle eza nɔ gi mlɛzɛɛbitɛ eboe ala gi babubitɛ ba bɛkya si biazɛɛbitɛ ɛ. Beze ligbã́ ní ahasiboe, kinyani, kudaŋwɛŋwɛ ádzɛ ni enyime boe, ligbãŋaŋa ni kubusumu me. 4Litu ba kugyɔ si mláma likpɔ ni ba ní ba ligbã́ zimizi ne me tɔɔ, lɛ loso beekpini mlo o. 5Pɔ̀ biabu isu unu ki Aya, gi yɛ ɔlɛ ní kublabla mɛ si yixwa litsi ni banama gi balɛ ligbã́ a, nì banama gi betse e. 6Lɛ ya loso bɛsɔli Liboe Gbã nɛ ɛki banama gi betse abla kyɛ ɛ, atɔ biaxwa litsi ni ba ní kisugyaɛ onu u; bɛsɔli ki ba tɔ ní ba Ɔfuɛfuɛ nɔ mɛ ligbãzeze ne me e biaze ŋwisi kiliɛ gi Aya ɔlɛ ɛ kinɛ.

7Kidɔ kakaa kɛ ɔgùkɔ ɛna pɔ́. Lɛ loso, mladra mlɔ begyodi ʋa mɛ, tɔ mlaŋa isu aʋa atɔ mlaatani Aya kuxwa. 8Ni kidɔ kakaa mɛ ɛ, mlalɔ mlɔ ahanuglɔ ba ni ɔna gbã, lɛ ese linu si kulɔlɔɔ kuzeewe eboe zimizi glegle.

9Mladra mlɔ kupeo aki mlɔ ahanuglɔ ba faã kutɛ̀tɛ̀ kukíze ní lɛ mɛ ɛ. 10Ɔnɔ kakaa ɔwa bidɔkɔkɔɛ ʋɛ gi azɛ ɛ, su axwɛ tɔ ɔkɔ bɛ ɔpɔni banɔdzedze ba ní anukwarɛɛ mɛ gi ɛɛwa Aya yɛ lipomepɛpɛ nɛ su axwɛ ní lɛ edeke la onu u. 11Ɔniliɛ gi izɛpani liboe le e, ɔpani lɛ ŋwisi Aya yɛ liboe le ɔtutɔ ɛɛpani. Ɔniliɛ gi eesumu i, osumu ni kigaglaɛ liɛ gi Aya aki yɛ ɛ, atɔ ní liboe kakaa mɛ ɛ, biakɔ kukpɔ̀kpɔ̀ ki Aya gani Yesu Kristo me. Atɔ kusudraa ni kigaglaɛ kize yɛ kinɛ kɔtsinɔ kanɔmɛ anɔmɛ. Atɔ liba lɛ mɛ.

Ɔzia mɔmɔ Ŋwisi Kristoɔnɛ kinɛ

12Mɛ benemi dimɛnɔ ba, kufekedi yeʋiyeʋi uliɔ mɛ gi mlɛɛga ɛ, kukíze onugutsetse ɛki mlɔ ŋwisi bidɔ gi baʋímɔ edi i kɛ kiba mlɔ aʋa kinɛ. 13Boŋu i, mlamɔ isami si mlɛmɔ kapɛatɔ ní Kristo yɛ ɔzia mɔmɔ nɔ mɛ, tɔ isami iku mlo ɛsanɔ xegi bebu yɛ kuklekleo ɛbasɛ i. 14Bɛkrira mlɔ xegi bekpini mlo kɔkpɛ Kristo yɛ linyi ne loso o, lɛ ese linu si kuklekleo Ɔfuɛfuɛ nɔ gi onu Aya yɛ Ɔfuɛfuɛ nɔ ɛ, ɔtini ní mlɔ aʋa. 15Xegi mlɔmɛ ɔtɔ ɛɛmɔ ɔzia ɛ, likíze kɔkpɛ si onu ɔnɔye, loo oze, loo ɔnɔ gi ɛɛbitɛ eboe zimizi, loo ɛɛkpɛ onugu ní banɔ eboe me e. 16Pɔ̀ xegi wɔɛmɔ ɔzia kɔkpɛ gi wonu Kristoɔnɛ ɛ, likíku wɔ kuye e, boŋu i, do Aya ɖase si linyii nɛ klɔ lilɛ ní wɔ su.

17Lɛ ese linu si lipoe le lina si litsixwaxwa nɛ likpese ni Aya yɛ banima; lɛ xe likpese ni blɔ ɛ, kitɛ liaze ki banɔaklɔ gi bénu kutu aki Aya yɛ Liboe Gbã nɛ ɛ? 18Lɛ kiliɛ gi Liboe le lipani si i,

“Xegi lilɛ gagla si bebu banama gi ba bede ʋa bɛdra ɛ,

kitɛ, liaze ki banama gi bénu Aya yɛ banɛ nì banɔ zimizi ba ɛ?”

19Lɛ loso e, banama gi bɛmɔ ɔzia nɔ ní Aya yɛ kupɛpɛɔ onu i, lilɛ si bakɔ ba isu akpɛ ní ba ɔbitɛbitɛɛ anukwarɛɛ onetee yɛ awla tɔ batrɛ ní ba eboe gbã na aʋa a.

Currently Selected:

1 Petro 4: avn

Highlight

Compare

Copy