1 Petro 3

Benyimedze ba ni Badzɛnye ba

1Niteme ke mlɔ benyimedze ba kyɛ ŋwisi banɔdzidzi ba kinɛ ɛ, mlepleni isu aki mlɔ benye ba, atɔ xe bamɛ batɔ bázɛ Aya yɛ liboe le aʋa ɛɛŋa ɛ, mlɔ kizeze me kiaki si biaziŋa gi litrázia si mlapani tɔɔ ɔ, 2lɛ ese linu si biamɔ kiliɛ gi mlɔ ligbãzeze ne lidra ɛ, ni kubùbù yo gi mlɛkpɛ ní isu ya su i, si bipɛ. 3Mlɔ kusululɔɔ kukídɔ ní oge no bidɔkpɛkpɛ ʋɛ ŋwisi siya sɛ kututu yo loo ni sika yɛ bidɔ mɛ loo awu gbã na kukpɛkpɛ mɛ ɛ. 4Boŋu i, mlɔ kupedi yo kudɔ ní mlɔ kimɛ mɛ, kupedi uliɔ gi kúʋikpa a, xe kulɛ ni Ɔfuɛfuɛ ɛ, gi ɛdɔ zii i, xe ɔʋíhwani isu mɛ ɛ, xe ɛɛplɛ litɔ kese e, gi binu bidɔ gi bizɛ kedzi ni Aya aŋu mɛ ɛ. 5Lɛ ese linu si kude uliɔ aʋa kana mɛ badzɛ dradraa ba gi bɛkɔ ba kudeonu didi yo etrɔ ní Aya aʋa ɛ, bɛga xe bɛbitɛ ɛ, gi bezeepe di i. Bɛ pleni isu ikpɛ ní ba ɔtutɔ ba benye ba ese. 6Ŋwisi Sara gi enu kutu u aki Abraham xe axwa yɛ si yɛkaɛ kinɛ ɛ. Mlenu yɛ bebidzɛ xegi mlɛbitɛ eboa la gi ɛpɛ ɛ, xegi mlése lifu i.

7Lɛ niteme kee mlɔ badzɛnye ba kyɛ ɛ, mlezè nì mlɔ bedze ba ní kuboesenu me, tɔ mlamɔ ba si ba benu mlɔ bapɔnɔpɔnɔ ba klɔ ba awla gi kigagla kíma a. Mlakpɛ kubùbù yo ní ba su, lɛ ese linu si mlɔ ni ba mlɛtrazɛ kaŋase alia gi kenu Aya yɛ lipomepɛpɛ nɛ bidɔkɔkɔɛ ʋɛ gi binu ligbã́ nɛ ɛ, tɔ kididɔ kikítsi kude ɛki mlɔ xegi mlɛxwa Aya a.

Ɔzia mɔmɔ nɔ gani bidɔ gbã kubitɛ mɛ ɛ

8Tɔ migù mɛ liboe le e, mlɔ petee mleze ní kusuyɔ mɛ ni mlɔ ahanuglɔ ba; mlakɔ litɔ lɛ mɛ aki mlɔ ahanuglɔ ba, lɛ mlalɔ ba ŋwisi benemi kinɛ ɛ, mlenu eboe ese atɔ mlabubɔ isu ya. 9Mlakídzini eboe zimizi atsa liʋɛ ɛki eboe zimizi i, loo kukpini ki kukpini, boŋu i, mlakɔ kukrira atsa liʋɛ, lɛ ese linu si liboe lɛ ya loso bɛxwa mlɔ atɔ mlaazɛ kukrira ŋwisi kaŋase kinɛ ɛ. 10Ŋwisi kiliɛ gi liboe le lipani si i,

“Ɔniliɛ klɔ gi apɛ́ si yiŋa ligba nɛ ɛ

xe egyo le edi si yimɔ epoe gbã ɛ,

lilɛ si odi yɛ kinemi ye aʋa tɔ ɔkipani eboe zimizi

tɔ ɔmɔni asia kusɛ.

11Lilɛ si okyi kede ɔkpɛ eboe zimizi tɔ ɔbitɛ eboe gbã;

lilɛ si ɔpɛ kusuyɔ tɔ ose kuni kɔ kude e.

12Lɛ ese linu si Ɔkaɛ yɛ aŋu na alɛ ní banama gi ba bede ʋa bɛgyɔ su

lɛ izeenu xegi bɛxwa yɛ ɛ,

Pɔ̀ Ɔkaɛ izɛɛyɔ kedu ní banama gi bizɛbitɛ eboe zimizi na su u.”

13Ɔnɔnɔ ɔ́trakpɛ mlɔ ebi xegi mleekeni idi si mlɛɛbitɛ eboe gbã a. 14Lɛ xegi mlɛmɔ ɔzia kɔkpɛ gi mlɛbitɛ eboe gbã fɛ ɛ, mlamɔ isami! “Mlakíse kidiliɛ gi bese e, lɛ lifu likíku mlo o.” 15Pɔ̀ mlakpɛ kubùbù yo ní Kristo su ŋwisi Ɔkaɛ kinɛ dɔni mlɔ ina nɛ mɛ. Mleze ní kublabla mɛ lipoe kakaa tɔ mlebú mlɔ kudeonudidi uliɔ gi kulɛ ní mlɔ awla ɛ, ese aki ɔnɔ kakaa gi aaʋi mlo e. Pɔ̀ mlabitɛ lɛ ní litɔplɛplɛkese ni kubùbù me e. 16Mlaki tɔ mlɔ ina nɛ mɛ idra, tɔ banama gi beekpini mlo kɔkpɛ mlɔ kizeze me gbã ɛ, ŋwisi banɔ gi bali ní Kristo me e, atɔ kuye kwiaku ba kɔkpɛ ba asia na gi beezizi mlɔ su i. 17Lɛ lipɛ sanɔ si wɔamɔ ɔzia kɔkpɛ wɔ eboe gbã na xe liaze Aya yɛ kupɛpɛ ɛ, sanɔ si wɔabitɛ eboe zimizi i. 18Lɛ ese linu si Kristo etse aki eboe zimizi na tule kpoo, ɔnɔ gi yɛ bede ʋa bɛgyɔ ɛki banama gi ba bede ʋa bágyɔ ɔ, tɔ yɛ aatu ɔtɔ ni blɔ tsini Aya klɔ. Beye ye ní kisugyaɛ mɛ, pɔ̀ Aya yɛ Ɔfuɛfuɛ nɔ ɛyɔni yɛ ɛ, 19lɛ gani Ɔfuɛfuɛ nɔ klɔ aʋa ɛ, azɛɛpani liboe gbã nɛ aki ifuɛfuɛ nɛ klɔ gi bɛkpɛ ní ligba lɛ ɛ. 20Lɛ inu banama gi bénu kutu aki Aya lipoe gblamadzaɛtɔ lɛ ya ʋa, ba ifuɛfuɛ nɛ. Lipoe lɛ gi Aya azeepe ba a, ni litɔplɛplɛkese ní ewe ala klɔ mɛ gi Noa azɛɛwa onitsahu lo e. Banɔ kiklakla kitɔ ɔgɔtiaʋa ba ko bɛmɔ kubúbú gani kuni yo me. 21Lɛ kuni uliɔ ya kunu kunikpɛkpɛɔ gyesi gi kɔ kwibu mlo abla fɛ ɛ. Aní simlu se kuploplo ni mlɔ kisugyaɛ su, pɔ̀ gani kukaka ki Aya dɔnɔ ní begyodi gbã ʋa mɛ ɛ. Bɛ bibu blo gani Yesu Kristo yɛ kuyɔyɔ mɛ ɛ, 22gi yɛ atrɛ ní lifunu ne e, xe ɔlɛ ní Aya yɛ kaŋawla mɛ ɛ, xe Aya yɛ baxwɛdzɛ ba, ni baʋaŋa ba ani lifunu ne bigagla ʋɛ bikpasi ní yɛ ese e.

Currently Selected:

1 Petro 3: avn

Highlight

Compare

Copy