1 Petro 2
2
Kunɔlɔ ní Kristobanɛ ma kusi
1Lɛ loso e, mlebu mlɔ isu ya ní kuzimizi kakaa mɛ, mlakísɛ asia loo mlakɔ ɔŋufa loo kaŋuzã loo mlezizi ɔnɔ su ni kapɛatɔtɔ mɛ ɛ. 2Ŋwisi bebivigye kinɛ ɛ, mlapɛ Ɔfuɛfuɛ nɔ mɛ kumwani gbã tɔ gani kɔ mɛ ɛ, mlaatsi ní mlɔ kubúbú yo me, 3abla gi mlete si Ɔkaɛ apɛ ɛ.
Kristo yɛ onu Limwa nɛ aʋa Likla nɛ ki Aya yɛ ligba lɛ
4Gi mlɛba yɛ klɔ ɛ, ligbã́ nɛ likla ɛnɛ gi banima bázɛ si linu kididɔ ɛ, lɛ Aya akya gi liŋa kedzi kí yɛ ɛ. 5Mlɔ kyɛ ŋwisi akla gbagbe kinɛ ɛ, bɛɛwa mlɔ su axwɛ tɔ bɛkɔ ɛwa Ɔfuɛfuɛ nɔ mɛ ligba, tɔ mlaze kusɔliɔ baka dradra, gi mlazɛɛki Ɔfuɛfuɛ nɔ mɛ bidɔpɔʋipɔʋi i, gi biaku Aya aŋu gani Yesu Kristo me e. 6Lɛ Aya yɛ liboe le lipani si,
“Dike maplɛ likla ní Zion,
Likla kyakya gi lizɛ kedzi i, gi mɛɛkɔ ɛtrɔ ŋwisi limwa nɛ aʋa likla kinɛ ɛ;
lɛ ɔniliɛ gi azɛ yɛ aʋa aŋa ɛ
kuye kutráku ye liwewe e.”
7Abla ki mlɔ banama gi mlɛziŋa ɛ, likla ɛnɛ ya liŋa kedzi. Pɔ̀ ki banama gi baziŋa ɛ,
“Likla ɛnɛ klɔ gi bagbawa ʋa bɛyurɔ si lipɛ ɛ,
lɛ lidzi ɔxɔ lɔ aʋa likla nɛ.”
8Kɔpɔnɔ ɛ,
“Likla gi liaki si banima biamlima,
ani liklakpɔ gi liaki si banima biagleʋe.”
Biamlima lɛ ese linu si bénu kutu aki Liboe Gbã nɛ, gi lɛ ke linu kidiliɛ gi Aya atrɔ ɛplɛ aki ba si liaba lɛ mɛ ɛ.
9Pɔ̀ mlɔ kɔɔ mlenu banɔ gi bɛkya a, kusɔliɔ baka, kekusipe me banɔ gi bizesumu Aya a, limade gi lidra a, banɔ gi benu Aya yɛ banɛ ɛ, atɔ mlaaza kukpɔ̀kpɔ̀ idzi ki yɛ gi yɛ axwa mlɔ adɔni litumu ne me manɔ ní yɛ kuklekle dradraa mɛ ɛ. 10Lipoetɔ gi liza mɛ ɛ, mléze Aya yɛ banɔ ɔ, pɔ̀ abla ɛ, mlenu yɛ banɔ; lipoetɔ gi liza mɛ ɛ, mlázɛ Aya yɛ asigagadidi la a, pɔ̀ abla ɛ, mlɛzi yɛ asigagadidi la.
11Mɛ baʋia ba, mapɛ dɔni mlɔ klɔ, ŋwisi banɔ gi bɛdɔ kese dzedze me nì bababa ní kelea lia mɛ ɛ kinɛ, si mlakíyurɔ isu aki mlɔ kisugyaɛ kɛ bapɛ́pɛ ʋa gi bɛɛta kigũ yɛ ní mlɔ esobo la a. 12Mleze agbã́ Gbã ní banama gi bázɛ Aya aʋa aŋa ɛ, ba kusi tɔ xegi bedo si mlenu banɔ nyani nyani fɛ ɛ, biamɔ mlɔ eboe gbã na tɔ biakpɔ Aya ní liwe lɛ gi aaba blɔ klɔ aʋa a.
Kusububɔ ki mlɔ Baka ba ni mlɔ Baʋaŋa ba
13Kɔkpɛ kubùbù yo gi mlɛɛki blɔ Ɔkaɛ loso e, mlabubɔ isu aki kaʋaŋaa kakaa gi bedu ní banima kusi i; xegi ki Okusi ye gi yɛ ɛɛŋa ɔnɔ kakaa aʋa a, 14loo yɛ baʋaŋa ba gi akpɛ si behe kutu aki banama a, gi bɛbitɛ eboe zimizi ani tɔ bakpɔ̀ banama a, gi bɛbitɛ eboe gbã. 15Lɛ ese linu si Aya kupɛ́pɛ linu si mlabitɛ eboe gbã tɔ mletsi motemotee kunugu yo akpɛ ni banima onu. 16Mleze ligbã ŋwisi banɔ gi balɛ ní ɔwlamɔmɔ mɛ ɛ; pɔ̀ mlakíkɔ mlɔ ɔwlamɔmɔ nɔ ɛkɔ ewe eboe zimizi na, boŋu i, mleze ligbã́ ŋwisi Aya yɛ banɔsumu kinɛ ɛ. 17Mlakpɛ kubùbù ní ɔnɔ kakaa su, mlalɔ mlɔ ahanuglɔ baʋaziŋa ba, mlese Aya atɔ mlakɔ kubùbù aki Okusi ye.
18Mlɔ banɔ dzidzi ba a, mlepleni isu akpɛ ní mlɔ baka ba ese ni kubùbù kakaa, tɔ mlakpɛ kubùbù yo aní ki banɔaklɔ gi bɛpɛ ɛ, xe bizeebù banɔ su u, tètè ko o, pɔ̀ ki banama gi balɛ kitikiti fɛ ɛ. 19Lipɛ xe ɔnɔ aatani kuze ní kupèpè gi nya kúnu yɛ kunɛ ɛ ese, lɛ ese linu si ɛɛplɛ aŋu ní Aya aʋa a. 20Libi woli liabu ki mlɔ xe bekusi mlo o, xe mlɛlɛɛ ní kɔ onu kɔkpɛ liboe zimizi gi mlɛbitɛ ɛ? Pɔ̀ xe bekusi mlo kɔkpɛ liboe gbã gi mlɛbitɛ ɛ, xe mlɛtani kɔ onu kulɛ ɛ, lɛ ya linu kukpɔ̀kpɔ̀ ɛki mlɔ ní Aya aŋu mɛ ɛ. 21Lɛ ya loso Aya axwa mlɔ, lɛ ese linu si Kristo amɔ ɔzia ní mlɔ onu lɛ aki mlɔ liŋwitsɛ si, tɔ mlaga yɛ kugakli yɔ mɛ.
22“Ɔ́bitɛ liboe zimizi,
lɛ kemeno kama ni yɛ onu u.”
23Agi bekpini ye kyɛ ɛ, óbu le onu ni kukpini i; gi amɔ ɔzia nɔ ɛ, ɔ́kpɛ ɔnɔnɔ lifu u. Boŋu i, akɔ yɛ isu ya atrɔ ní ɔniliɛ gi izɛɛtsa litsi gyɔgyɔ lɛ aʋa a. 24Kristo ɔtutɔ etu blɔ eboe zimizi na ní yɛ isu ya mɛ kɔtsinɔ ni ose lo su, tɔ eboe zimizi na akíŋa blɔ aʋa tɔ ɔ, pɔ̀ tɔ kwiaze ligbã́ ki eboe gyɔgyɔ la. Gani yɛ ebì la mɛ bɛyɔni blɔ ɔ. 25Lɛ ese linu si mleze ŋwisi iʋesi gi ilila, pɔ̀ abla ɛ, mledziba ní Oʋesigbanɔ yɛ ni mlɔ esobo la Ɔʋadi ye klɔ.
Currently Selected:
1 Petro 2: avn
Highlight
Share
Compare
Copy
Want to have your highlights saved across all your devices? Sign up or sign in
© Ghana Institute of Linguistics, Literacy and Bible Translation, 2017 In cooperation with Wycliffe Bible Translators, Inc
