1 Petro 1
1
1Keplekpaa lia kɛdɔ ní Petro, Yesu Kristo yɛ ɔnɔ kpɛkpɛ yɛ klɔ ɛki Aya yɛ banɔ kyakya ba gi benu bababa ni kelea lia mɛ ɛ, gi behle eku ní Ponto, Galatia, Kapadokia, Asia ani Bitinia kuseo me e. 2Ɔka Aya gi ete mlo akpɛ ɔtɔ ɛ, yɛ akya mlɔ. Aki si yɛ Ɔfuɛfuɛ nɔ ɔdra mlɔ su, ki kutununu ki Yesu Kristo, atɔ yɛ ika lɛ iplo mlɔ su.
Lipomepɛpɛ ni kusuyɔ bisrɛ ɛki mlɔ.
Mlakpɔ̀ Aya ɔkpɛ kudeonudidi gi kulɛ Ligbã́ nɛ ɛ
3Mlakpɔ̀ Aya gi onu Ɔka aki blɔ Ɔkaɛ Yesu Kristo e! Gani yɛ asigagadidi ʋidi ala gi aki blɔ mɛ ɛ, aki si bedzini blo ɛpɔ̀ ki kudeonudidi gi kulɛ ligbã́ gani Yesu Kristo me e, gi ayɔni yɛ adɔni bekpo ʋa mɛ ɛ, 4ki kaŋase gi kátrakyrɔ, loo zizi loo kiakpã ɛ. Bɛkɔ kaŋase alia ɛbla ɛki mlɔ ní lifunu ne. 5Mlɔ banama gi gani kuziŋa mɛ ɛ, Aya yɛ kigaglaɛ kiwe mlo zɛkɔna ni lipoe lɛ klɔ gi kubúbú yo kwiaba a, gi bɛtrábu ibasɛ ní lipoe gɔgɔ lɛ mɛ ɛ.
6Mlamɔ isami glegle ní liboe lɛ ya mɛ, xegi kɔki lipoe kpekpemi itɔ ɛ, liziã si mleze ní asigaga mɛ kɔkpɛ kukenidi ede ede ala mɛ gi mlɛga kyɛ ɛ. 7Eboe ala ya ɛba la mɛ tɔ mlɔ kuziŋaa gi kwizɛ kedzi isani sika a, gi izɛɛkyrɔ ɔ, gi nya bekyí awla ní yɛ su gani kifu yɛ mɛ xe e, biamɔ si kulɛ, lɛ liadzi kukpɔ̀kpɔ̀, kusudra ni kubùbù ki mlɔ, xegi bebu Yesu Kristo ebasɛ ɛ. 8Gani lɛ mɛ si mlámɔ yɛ fɛ ɛ, mlɛɛlɔ yɛ, lɛ gani lɛ mɛ si mláʋimɔ yɛ abla fɛ ɛ, mlɛzi yɛ aʋa ɛɛŋa a, lɛ isami gi batrátani kupani ní lɛ su i, iyi mlɔ mɛ. 9Lɛ ese linu si mlɛɛzi kidiliɛ gi kɛ mledi kudeonu ikɔ ɛ, gi kinu kubúbú kí mlɔ esobo la ɛ.
10Ní kubúbú uliɔ ya su i, beboedoplɛ ba ya gi bɛpani ní lipomepɛpɛɛ nɛ ɛ, gi liaba ki mlɔ su i, bɛpami lɛ mɛ mɔmɔmɔ ni litɔplɛplɛkese glegle, 11gi bekeni edi si betè lipoe le ni kiliɛ ɛ, gi eboe ala aaba la mɛ ɛ, gi la Kristo yɛ Ɔfuɛfuɛ nɔ ɔ, gi eeze ni ba mɛ ɛ, ɛzɛbasɛ lipoe lɛ gi ɛpani plɛ ní Kristo yɛ kinie e, ni eboe gbã ana a, gi aagbani la kukpɛ su i. 12Aya ebu le abasɛ beboedoplɛ ba si, ba axwɛwawa la ɛ, aní ba isu beesumu, pɔ̀ mlɔ. Ní lipoe lɛ mɛ gi bɛpani ní eboe ala gi la mlenu abla a, gi la banama a, gi bɛpani Liboe Gbã nɛ ɛsi mlɔ, gani Ɔfuɛfuɛ Dradra lɔ ɔ, gi bɛtsisi dɔni lifunu ne aʋa a. Eboe ala enu eboe gi Aya yɛ baxwɛdzɛ ba kura kyɛ bɛpɛ si bete e.
Mleze ligbã́ Dradra
13Lɛ loso e, mlabla mlɔ begyodi ʋa aki kakli kubúbú. Mlaŋa isu aʋa; mlatrɔ mlɔ ɔtɔ kudidi yo pɔ́ ní lipomepɛpɛɛ nɛ gi biaki mlɔ ɔ, xegi bebu Yesu Kristo ebasɛ ɛ aʋa. 14Ŋwisi bebi gi bizenu kutu kinɛ ɛ, mlakíki si mlɔ ɔtutɔ mlɔ bapɛ́pɛ zimizi ʋa bagbani mlɔ ligbã́ nɛ ŋwisi kiliɛ gi mleze e, lipoe lɛ gi mleze ní motemotee me e. 15Pɔ̀ kiliɛ gi ɔniliɛ ɛ, gi axwa mlɔ adra ɛ, nite lilɛ si mladra ni kidɔ kakaa gi mlabitɛ mɛ ɛ. 16Lɛ ese linu si bɛŋwlimi plɛ si, “Mladra lɛ ese linu si Madra.”
17Agi mlɛzɛxwa Aya si Ɔka a, gi yɛ izɛɛxwa litsi ni ɔnɔ kakaa yɛ axwɛ na aŋu mɛ modi i, mleze mlɔ agbã́ na ŋwisi bababa ní ya ní kubùbù glegle me. 18Lɛ ese linu si mlete si aní bidɔ gi biazizi ŋwisi klosalo loo sika kinɛ bɛkɔ ebu mlo edɔni kelea mɛ ligbã́ pluplu i lɛ gi lidɔ ní mlɔ bakatsi ba lipoe le me. 19Pɔ̀ bebu mlo nì bidɔ gi bizɛ kedzi i, gi binu Kristo yɛ ika lɛ ɛ, gi ɔlɛ ŋwisi keʋesibi bi i, gi likyibi litɔtɔ loo kituítɔtɔ kima ní ka su kinɛ ɛ. 20Aya akya yɛ xe bɛbitɛ kelea mɛ ɛ, pɔ̀ bebu ye ebasɛ ní ewe gɔgɔa la mɛ kɔkpɛ mlɔ loso o. 21Gani yɛ aʋa ɛ, mlɛzɛ Aya aʋa ɛɛŋa gi ayɔni yɛ adɔni bekpo ʋa mɛ ɛ, xe emuni ye e; lɛ loso e, mlɔ kuziŋaa ni ɔtɔ kudidi yo e, bikpasi ní Aya mɛ.
22Abla gi mlɛdra isu ya su u, gi mlenu kutu iiki anukwarɛ ɛ, xe kunɔlɔɔ kulɛ ní mlɔ mɛ ki mlɔ benemi ba ɛ, mlalɔ mlɔ ahanuglɔ ba dɔni ɔna mɛ ke. 23Lɛ ese linu si bedzini mlo epɔ̀ aní gani lisebi gi liatse me e, pɔ̀ gani lisebi gi litrátse me e, gani Aya yɛ liboe le gi lilɛ ligbã́ a, xe lɛ anukwarɛɛ oʋíkyi i me. 24Lɛ ese linu si,
“Banima petee balɛ ŋwisi siwa kinɛ ɛ,
lɛ ba kupedi yo petee ŋwisi siwa sɛ sɛ kufùfù yo kinɛ ɛ.
Siwa sɛ sizɛɛ yrɔ, lɛ sɛ kufùfù yo kuzɛɛwɔli i,
25pɔ̀ Ɔkaɛ yɛ liboe le e, liaze tsinɔ kanɔmɛ anɔmɛ.”
Liboe lɛ ya linu Liboe lɛ gi lɛ bɛpani iiki mlɔ ɔ.
Currently Selected:
1 Petro 1: avn
Highlight
Share
Compare
Copy
Want to have your highlights saved across all your devices? Sign up or sign in
© Ghana Institute of Linguistics, Literacy and Bible Translation, 2017 In cooperation with Wycliffe Bible Translators, Inc
