2 Petro 3
3
Kakaplɛ ní blɔ Ɔkaɛ yɛ kubabaa su
1Mɛ baʋia dimɛnɔ ba, keplekpa ʋlaa gi mɛɛŋwlimi kimlɔ ɛ, ka ka lia ya abla. Maŋwlimi kuplekpa tuʋa liɔ ya si mihwani mlɔ begyodi ʋa tɔ ba mɛ badra ni eboa la ya su u. 2Mapɛ si mlaplɛ aŋu ní eboa la gi beboedoplɛ dradra ba bɛpani plɛ koko aʋa a, ni ɔsãa nɔ gi blɔ Ɔkaɛ ni Ɔnɔbu ye akɔ ɔ, gi banɔkpɛkpɛ ba bɛki mlɔ ɛ aʋa.
3Ní ɔtɔpu kɔ ɛ, lilɛ si mlaplɛ aŋu si, ní ewe gɔgɔ la mɛ ɛ, banama gi bizɛmwɛ banima ɛ, biaba. Banama gi biazɛkpɛ anukwarɛɛ kakpaa, lɛ biazeni ba tutɔ ba bapɛ́pɛ zimizi ba kude e. 4Biaʋi si, “Aka aplɛ si yɛ aaba, nifɔ yɛ kakaplɛ alia ya kalɛ ɛ? Dɔni lipoe lɛ ke gi blɔ baka ba betse e, kɔkpɛni abla ɛ, kidɔ kakaa kiitrɛ ní kɛ aʋa ŋwisi kiliɛ gi lize dɔni kelea likpese le kinɛ ɛ.” 5Pɔ̀ ɔŋwadzuu bedze si gani Aya yɛ liboe le onu lifunu ne lize e, xe akɔ kuni yo abitɛ kesea a, xe aki si kesea kedo edɔ ni kuni yo me e. 6Lɛ kuni yiyio ke akɔ akyrɔ kesea lipoe lɛ klɔ mɛ. 7Lɛ gani Aya yɛ liboe le me ke lifunu ne ni kesea lia gi kalɛ abla ɛ, bɛbla bɛ ɛki kifu yɛ, gi bɛbla bɛ ɛki litsixwaxwa ni kukyrɔkyrɔ ki banama gi bése Aya ɛ.
8Pɔ̀ mlakídze liboe tile lɛ ya a, mɛ baʋia ba! Ni Ɔkaɛ klɔ ɛ, liwe tile lilɛ ŋwisi agɔ akpe tole kinɛ ɛ, lɛ agɔ akpe tole alɛ ŋwisi liwe tile kinɛ ɛ. 9Aní si Ɔkaɛ ɔ́ʋikɔsi ní yɛ kakaplɛa su u, ŋwisi kiliɛ gi banɔatɔ beegyo le edi kinɛ ɛ. Boŋu i, akɔ litɔ plɛplɛ kese aki mlɔ lɛ ese linu si ɔ́pɛ si ɔnɔnɔ ɔkyurɔ, pɔ̀ apɛ́ si ɔnɔ kakaa okyi ní yɛ eboe zimizi na mɛ ɛ.
10Pɔ̀ Ɔkaɛ yɛ Liwe le litrába ní lipoe lɛ mɛ gi mlatráze ní aŋu plɛplɛ mɛ ɛ. Ní liwe lɛ klɔ aʋa ɛ, lifunu ne lialila ni ozi gagla, lɛ liwɔ lɛ mɛ bidɔbitɛbitɛ ʋɛ petee biazizi lɛ biakani, lɛ kesea ni kidɔ kakaa ní ka aʋa ɛ, biakani. Lɛ banima biamɔ kidɔ kakaa kiliɛ gi kilɛ ɛ.
11Agi kidɔ kakaa kitrázizi gani kudeo liɔ ya aʋa ɛ, banɔ wolilu lilɛ si mlezee? Lilɛ si mleze ligbã́ gi lidra tɔ mlakɔ isu aki Aya a, 12gi mleepe Aya yɛ Liwe le e, tɔ mlekeni edi tɔ liba kpekpee. Liwe lɛ klɔ litramani bidɔ zizizizi gi lifunu ne liakani i, xe liwɔ lɛ mɛ kudɔkpaa kwiawlɔ ní kifu yɛ kɛ kuhuhu yo loso o. 13Pɔ̀ ní yɛ kakaplɛa onu i, kwidi kudeonu iiki lifunu vuvu ni kese vuvu, niklɔ gi aaze kepe ki kude gyɔgyɔ ɛ.
14Lɛ loso mɛ baʋia ba, agi mleedi kudeonu iiki lɛ ya ɛ, mlekeni edi tɔ mladra, tɔ kunutsatsaa tɔtɔ kukíze ní mlɔ su u, ní Aya aŋu mɛ tɔ mleze ní kusuyɔ mɛ ni yɛ. 15Mlaplɛ aŋu si blɔ Ɔkaɛ yɛ litɔplɛplɛkese kese e, kunu kudeonu gi aki mlɔ tɔ mlamɔ kubúbú ŋwisi kiliɛ gi blɔ onemi dimɛnɔɛ Paulo aŋwlimi aki mlɔ ɛ, gani kuboete uliɔ gi Aya aki yɛ mɛ ɛ. 16Lɛ ya su apani ní yɛ kuplekpaa petee gi aŋwlimi aki mlɔ mɛ ɛ. Eboe atɔ alɛ ní yɛ kuplekpaa mɛ gi la ese kununu yo kuli gagla, lɛ banama gi béte e, ni banama gi ba begyodi ʋa bamá ní ɔkɔ tole e, ba eboa la klɔ ʋa ese kububu i, binu asia, ŋwisi kiliɛ gi bizɛbitɛ nì Aya yɛ liboe gɔgɔ lɛ kyɛ ɛ. Gani lɛ ya mɛ ɛ, bizɛmani kuzizizizi ni ba isu ya aʋa a.
17Lɛ loso mɛ baʋia ba, agi mlete lɛ ya kooko e, mleze ni aŋu, tɔ banama gi bizɛɛta isã nɛ ese e, bakígbani mlɔ akpɛ ní kesetata mɛ tɔ mlakílila mlɔ ozekɔ lɔ gi mlalɛ ɛ. 18Boŋu i, mlatrɛ lɛ aʋa tɔ mletsi ní lipomepɛpɛ ni kuboete ní blɔ Ɔkaɛ ani blɔ Ɔnɔbu ye Yesu Kristo me. Kusudraa kuze yɛ kunɛ dɔni abla kɔtsinɔ kanɔmɛ anɔmɛ! Atɔ liba lɛ mɛ.
Currently Selected:
2 Petro 3: avn
Highlight
Share
Compare
Copy
Want to have your highlights saved across all your devices? Sign up or sign in
© Ghana Institute of Linguistics, Literacy and Bible Translation, 2017 In cooperation with Wycliffe Bible Translators, Inc
