1 Korinto 9
9
Kidiliɛ gi kinu Ɔnɔ kpɛkpɛɛ yɛ kiniɛ ɛ
1Dani malɛ ní mɛ ɔtutɔ mɛ isuwla mɛ ɛ? Aní ɔnɔ kpɛkpɛ menu i? Lɛ dani mamɔ Yesu blɔ Ɔkaɛ ɛ? Lɛ aní mlɔ mlenu axwɛ a na gi mawa aki ɔkaɛ la libi le e? 2Lɛ xegi ménu ɔnɔ kpɛkpɛ aki banɔatɔ kyɛ ɛ, menu ɔnɔ kpɛkpɛ ɔki mlɔ xunyɔ, Lɛ ese linu si mlɔ mlenu mɛ axwɛwawa la gi mawa aki Ɔkaɛ la liklatrɔtrɔ lɛ ɛ.
3Liboe lɛ ya linu mɛ kunububu yo kí banama gi bizɛxwa litsi ni mɛ. 4Kɔ kude kúma ní blɔ awla si kwiaŋa bidɔ tɔ kwiaŋwɛ bidɔ ní mlɔ kupeo me na a? 5Lɛ kɔ kima líma si kwiagbani blɔ bedze ba gi benu baʋaziŋa si beze ni blɔ kude ŋwisi kiliɛ gi banɔkpɛkpɛ dzedze ba ni Ɔkaɛ yɛ benemi ba ni Petro kyɛ bizɛbitɛ na a. 6Aloo mɛ ni Barnaba tètè ko linu si kuwa axwɛ na tɔ kwiakɔdi isu aʋa na a?
7Ɔguta woli ɔlɛ ɛ, gi yɛ ɔtutɔ izɛɛtsa liʋɛ ɛki isu ya a, gi ɔlɛ ní yɛ ɔxwɛwa klɔ na a? Ɔnyrɔmɛdzɛ woli ɔlɛ ɛ, gi ɔʋíŋa yɛ ɔnyrɔ nɔ mɛ esebi yoyo la na a? Baga ʋa ɔʋadi woli ɔlɛ ɛ, gi ɔʋíŋwɛ yɛ baga ʋa ba kumwani yɔ na a? 8Liboe lɛ ya gi mɛɛpani i, banɔ gbagbe begyodi onu mɛɛpani lɛ na a? Aní liboe lɛ ya ke su Ɔsã nɔ ɛɛpani na a? 9Lɛ ese linu si bɛŋwlimi kpɛ ní Mose ɔsã nɔ mɛ si, “Wukínya ligumee nɛ gi liigu amu na#9:9 Ni Israel bebi ba kusi i, egume na su axwɛ bɛzɛɛwa ɛki amu na kugugu yo. a, lɛ onugu lo o.” Abla ɛ, Aya akɔ litɔ lɛ mɛ aki egume na loo kitɛ ɛ? 10Apani liboe lɛ ya aki blɔ aníte e? Ee, bɛŋwlimi liboe lɛ ya ɛki blɔ, lɛ ese linu si ɔniliɛ gi ɛɛsɔ amu na a, ni ɔniliɛ gi egu amu na ɛ, beedi kudeonu si biamɔ ba kapɛa ní ɔnyrɔ nɔ mɛ bidɔ mɛ mɛ̀. 11Xegi kwikpɛ Ɔfuɛfuɛ nɔ mɛ esebi ní mlɔ kusi i, kisani lisani mlɔ si kwiamɔ kelea lia mɛ bidɔ dɔni mlɔ klɔ na a? 12Xegi banɔatɔ kɔɔ ɔŋakɔ lɔ ya elu ɔlɛ ni ba awla si mlaaki ba kupɔnɔ ɛ, ɔŋakɔ ɔlɔ ya elu ɔma ní blɔ awla sani ba na a?
Pɔ̀ blɔ kɔɔ kúwa ɔŋakɔ lɔ ya su axwɛ ɛ, boŋu i, kwizi liboe kakaa tɔ kukídzi ɔvia loo banɔ gi beetsi kudeonu iiki Kristo yɛ liboe gbã nɛ ɛ. 13Kite mléte si banɔaklɔ gi bizɛɛwa axwɛ na ní asɔligba la mɛ ɛ, bizɛɛmɔ ba kiŋaŋaɛ dɔni asɔligba la mɛ na a? Lɛ banɔaklɔ gi bizeesumu ní ɔdɔpɔʋisuʋɔ lɔ su i, bizɛɛmɔ ba ɔgyɔ lɔ ní kidiliɛ gi bɛkɔ ní ɔdɔpɔʋisuʋɔ lɔ aʋa na a? 14Niteme kee, Ɔkaɛ aki ɔsã si banama gi bizɛɛpani liboe gbã nɛ ɛ, biazɛ ba kiŋaŋaɛ dɔni liboe gbã nɛ mɛ.
15Pɔ̀ máwa mɛ ɔŋakɔ lɔ ya ɔtɔtɔ su axwɛ, lɛ máʋiŋwlimi liboe lɛ ya ni kugyodi si mlaabitɛ niteme eboe aki mɛ ɛ. Maapɛ boŋ si mitse sani si ɔnutɔ ɔzɛ kidiliɛ gi kɛ loso madɔ isu ya ní mɛ awla a. 16Pɔ̀ xe mɛɛpani liboe gbã nɛ ɛ, mátratani isu kudɔ ɔ, lɛ ese linu si Aya emi mɛ aʋa si mipani liboe le e. Baba kimɛ xegi mápani liboe gbã nɛ ɛ. 17Xegi mapani liboe gbã nɛ ŋwisi ɔnɔ gi akɔ isu akɔ kinɛ ɛ, liaziã si batsa liʋɛ aki mɛ; pɔ̀ xe aní mɛ kupɛ́pɛ onu mɛɛpani liboe gbã nɛ ɛ, kɔ lixwɛ nɛ gi Aya aka mɛ aʋa si mawa ɛ, lɛ mɛɛwa. 18Kɔlɔ ɛ, ege kinu libi le ɛki mɛ ɛ? Lɛ ko linu si: gi mɛɛpani liboe gbã nɛ ɛ, mɛɛpani lɛ faã kibɔ mozɛ, atɔ mikíkɔ mɛ ɔŋa klɔ ɛtrɔ ní mlɔ aʋa a, xe mɛɛpani liboe gbã nɛ ɛki mlɔ ɔ.
19Linya ɛli lɛ mɛ si malɛ ní mɛ isuwla mɛ, lɛ ménu ɔnɔnɔ ɔnɛ kyɛ ɛ, pɔ̀ mabitɛ mɛ isu ya si midzi ɔnɔdzidzi kí ɔnɔ kakaa atɔ migbani banɔ glegle mani Yesu klɔ. 20Gi mazɛɛwa axwɛ na ní Yudanɛ ma kusi i, medzi ŋwisi Yuda ɔnɛ, tɔ mimɔ Yudanɛ ma ɛki Ɔkaɛ. Ki banama gi bali ní ɔsã nɔ ese e, medzi ŋwisi ɔnɔ gi ɔlɛ ní ɔsã nɔ ese e, nya mɛ ɔtutɔ máma ní ɔsã nɔ ese xe e, atɔ mimɔ banama gi bali ní ɔsã nɔ ese aki Kristo. 21Ki banama awla gi ɔsã nɔ ɔma ɛ, medzi ŋwisi ɔniliɛ awla gi ɔsã nɔ ɔ́ma ɛ, gani lɛ mɛ máma ní ɔwlamɔmɔ mɛ ní Aya ɔsã nɔ ese kyɛ ɛ, pɔ̀ malɛ ní Kristo yɛ ɔsã nɔ ese e, atɔ mihe banɔaklɔ gi ɔsã nɔ ɔma ní ba awla ɛ, ɛmanɔ ní Kristo klɔ. 22Kí banama gi bebotso ní kuziŋaa mɛ ɛ, mɛ fɛ mebotso atɔ migbani banama gi bebotso ní kuziŋaa mɛ mani Kristo klɔ. Medzi kidɔ kakaa akí banima petee atɔ gani kude kakaa onu i, maabu bamɛ batɔ ɔ. 23Mabitɛ la ya petee kɔkpɛ liboe gbã nɛ loso, tɔ mɛ fɛ maamɔ ɔŋakɔ ní lɛ kukriraa mɛ.
24Aloo kite mléte si xegi banima beese e, bamɛ tole ko izɛɛŋa aʋa na a? Kɔlɔ ɛ, mlese ní kudeo liɔ klɔ onu gi mlaŋa aʋa ɛ.
25Osese kakaa gi ɔkpasi ní besese ba kusi i, izɛɛga kuhehe gagla mɛ ɛ, bizɛɛbitɛ lɛ nite atɔ biazɛ likusikuto elɛ gi liʋíkle e, xe lizee zizi i; pɔ̀ kuzɛɛbitɛ lɛ tɔ kwiazɛ likusikuto elɛ gi litrázizi liwewe e. 26Lɛ loso e maʋíse ŋwisi ɔnɔ gi eese e, gi litukpo líma ni yɛ kuseseo onu u; lɛ loso maʋíta akpafu íkpɛ liwɔ mɛ ɛ. 27Owo, mizeebu kiní iiki mɛ kisugyaɛ atɔ kidzi ɔnɔdzidzi kí mɛ atɔ xegi mapani Aya yɛ liboe le asi banima pɔ́ ɛ, bátrabu me ní lɛ mɛ si mégyeno o.
Currently Selected:
1 Korinto 9: avn
Highlight
Share
Copy
Want to have your highlights saved across all your devices? Sign up or sign in
© Ghana Institute of Linguistics, Literacy and Bible Translation, 2017 In cooperation with Wycliffe Bible Translators, Inc
