1 Korinto 7
7
Kugbagba ní Kudzɛgbanɔ ni Kunyimezeno su
1Abla ní eboa la su gi mlɛpani ní mlɔ keplekpaa mɛ ɛki mɛ ɛ, lipɛ xe onyime ɔ́gbani ɔdzɛ ɛ. 2Pɔ̀ gi kihasi ye kisrɛ ní mlɔ mɛ onu i, lilɛ sì onyime kakaa ɔgbani yɛ ɔtutɔ yedze, tɔ ɔdzɛ kakaa ozeni yɛ ɔtutɔ yenye. 3Onyimee ɔwa yɛ axwɛ na ŋwisi ɔdzɛnye kinɛ ɛ, lɛ ɔdzɛɛ fɛ ɛ, ɔwa yɛ kapɛa ŋwisi onyimedze kinɛ ɛ. 4Ɔdzɛɛ yɛ kisugyaɛ kínu yɛ tete kinɛ ɛ, boŋu i, kinu yenye kyɛ kinɛ ɛ. Nite ke onyimee yɛ kisugyaɛ kínu yɛ tete kinɛ ɛ, boŋu i kinu yedze kyɛ kinɛ ɛ. 5Mlakíkyi kede kpɛ mlɔ ahanuglɔ ba a, xe ani gani kesenunu mɛ kpɛ ɔtɔ lɛ ki lipoetɔ ko o, atɔ mlaakɔ mlɔ isu ya petee ɔki Aya kuxwaxwa; pɔ̀ lɛ kede e, mledzi akpɛ likpɔ dzɛ. Atɔ Satana okífeke mlo edi kɔkpɛ gi mlátani isu aʋa kuŋa loso o. 6Mɛɛpani lɛ ya aní si linu ɔsã a, pɔ̀ linu kude kɔkɔ ɔ. 7Nya maapɛ si onyime kakaa oze ŋwisi mɛ kiniɛ gi mágbani ɔdzɛ ɛ; pɔ̀ onyime kakaa azɛ bidɔ kɔkɔ lidze lidze adɔ ni Aya klɔ ɔ, ɔnutɔ ɛ, bidɔkɔkɔɛ bɛ ya, ɔnɔ dzedze e, bidɔkɔkɔ dzedze.
8Abla, ki banama gi benu itrè le e, ni badzɛa ya gi ba benye ba betse e, mɛɛsi ba si liapɛ ki ba si bakígbani badzɛ loo zeni benyime e, tɔ beze ŋwisi kiliɛ gi malɛ ɛ. 9Pɔ̀ xe bátratani isu aʋa kuŋa ɛ, lɛ kɔ bagbani badzɛ ani tɔ bezeni benyime lɛ ese linu si liapɛ sanɔ si bagbani badzɛ sani si isu ya mɛ izɛɛŋwasi ba ɔkpɛ kulekuku liɔ gi kuli ní ba mɛ loso o.
10Lɛ ki banama gi bɛgbanɔ badzɛ ɛ, loo gi bedini benyime e, mɛɛki ba ɔsãa nɔ, aní mɛ, pɔ̀ Aya a: Líma si ɔdzɛ ɔsɛ ní yenye su u. 11Pɔ̀ xe asɛ ɛ, líma si ozeni onyime e, loo lilɛ si odziba ní yenye klɔ ɔ; lɛ onyime kyɛ ɛ, líma si ɔyurɔ yedze e.
12Kí banɔ gɔgɔ ba ɛ, mɛɛpani si, (aní Ɔkaɛ pɔ̀ mɛ ɔtutɔ lɔ): xe onyime gi asɔli i, agbani ɔdzɛ gi ónu ɔsɔlisɔli i, pɔ̀ adimɛ si yɛ aze ní onyimee su i, lɛ kɔɔ onyimee ɔkiyurɔ yɛ ɛ. 13Lɛ xegi ɔdzɛ, odini onyime gi ónu ɔsɔlisɔli i, pɔ̀ adimɛ si yɛ nì ɔdzɛɛ biaze e, lɛ kɔɔ ɔkisɛ ní ɔdzɛɛ su u. 14Lɛ ese linu si onyimee gi ónu ɔʋaziŋa ɛ, Aya adra yɛ su gani yedze aʋa a, lɛ ɔdzɛ gi ónu ɔʋaziŋa kyɛ ɛ, Aya adra yɛ su gani yenye gi onu ɔʋaziŋa aʋa a. Xe aníte e, mlɔ bebi ba su batrádra a, pɔ̀ kiliɛ gi lilɛ ɛ, ba su ɛɛdra.
15Pɔ̀ xe ɔnɔ gi ɔ́ziŋa asɛ ɛ, mlaki tɔ ɔtrɛ. Ní la ya mɛ ɛ, kididɔ kínya ɔʋaziŋaɛ gi onu onyimedze e, loo ɔdzɛnye e. Aya yɛ axwa mlɔ si mleze ní kusuyɔ mɛ. 16Kitɛ mlatani kute xe wɔ onyimedzee wɔabu wonye e, loo wɔ ɔdzɛnyee wɔabu wodze e?
17Ní liboe lɛ ya kede e, lilɛ si ɔnɔ kakaa oze ligbã́ nɛ ní niklɔ gi Ɔkaɛ aki yɛ onu u, ani kí niklɔ gi Aya axwa yɛ akɔ onu u. Lɛ ya linu kutrɔtrɔ liɔ gi mizɛɛbasɛ ní ɔsɔli ha kakaa mɛ ɛ. 18Xegi bɛtsa ɔyaʋi ki wɔ ɔ, xe ableke Aya axwa wɔ ɛ, wukisi sì wɔadzi ɔnɔ gi ɔ́tsa ɔyaʋi i, lɛ xegi ɔnutɔ ɔ́tsa ɔyaʋi i xe ableke Aya axwa yɛ ɛ, ɔkisi sì yɛ atrɛtsa ɔyaʋi tɔ ɔ. 19Lɛ xe ɔnɔ atsà ɔyaʋi loo ɔ́tsa ɔyaʋi i, línu kididɔ; kidiliɛ gi kisazia ɛ, kɛ ko kinu si ɔbitɛ ní Aya yɛ isã nɛ aʋa. 20Ɔnɔ kakaa oze kiliɛ gi eze e, xe Aya axwa yɛ ɛ. 21Ɔnɔdzidzi woze xe Aya axwa wɔ na a? Wukíki si likpɛ wɔ kunugu u; pɔ̀ xegi kudeonu kulɛ ɛki wɔ ɛ, zɛ wɔ isuwla mɛ kuzezeo. 22Lɛ ese linu si ɔniliɛ gi eze ɔnɔdzidzi i, xe Ɔkaɛ axwa yɛ ɛ, onu Ɔkaɛ yɛ ɔnɔ gi ɔlɛ ní yɛ isuwla mɛ ɛ; niteme ke ɔnɔ gi ɔlɛ ní yɛ ɔtutɔ yɛ isuwla mɛ ɛ, xe Ɔkaɛ axwa yɛ ɛ, onu Ɔkaɛ yɛ ɔnɔdzidzi. 23Aya yɛ edzi mlo kedzi ʋidi i; lɛ loso e, mlakídzì banɔdzidzi ɛki banima a. 24Mɛ benemi ba, mlɔ mɛ ɔnɔ kakaa oze ɔnɔ gi enu kutu aki Aya, tɔ oze ní kizeze liɛ mɛ gi eze e, xe Aya axwa yɛ ɛ.
25Abla kí badzɛa ba gi béte benyime e, mázi liboeboe adɔ ni Ɔkaɛ kɔ aki ba a, pɔ̀ gani Aya yɛ lipomepɛpɛ nɛ mɛ ɛ, aki mɛ kuboete gi biaka ní kɔ aʋa a, lɛ maaki mlɔ mɛ begyodi ʋa ní lɛ su u. 26Kɔkpɛ abla baxixa ʋa loso e, megyo le edi si liapɛ xegi mledzi alɛ ŋwisi kiliɛ ɛ gi mlalɛ ɛ. 27Xegi ɔdzɛ ɔlɛ ní wɔ awla ɛ, wukíyurɔ yɛ ɛ. Xegi wɔ́gbani ɔdzɛ ɛ, wukípɛ ɔdzɛ si wugbanɔ ɔ. 28Pɔ̀ xegi wɔgbani ɔdzɛ fɛ ɛ, wɔ́bitɛ liboe zimizi i. Pɔ̀ xegi ɔdzɛ ɛ, gi ɔbitɛ enyimeboe odi odini onyime e, ɔ́bitɛ liboe zimizi i. Pɔ̀ banama a gi bɛgbanɔ badzɛ ba ɛ, biamɔ ɔzia ní ligbã́ɛ lɛ ya mɛ, lɛ nya mapɛ si mibu mlo ní lɛ mɛ xe e.
29Mɛ benemi ba, liboe lɛ gi mɛɛpani i, lɛ ese linu si lipoe le lilɛ kpekpemi kí Ɔkaɛ yɛ kubaba a. Lɛ loso dɔni abla kɔtsinɔ ɛ, banama awla gi badzɛ balɛ ɛ, beze ligba nɛ ŋwisi ɔdzɛ ɔma ní ba awla kinɛ ɛ; 30banama gi beebemi i, beze ŋwisi baʋíbemi i; banama gi bɛɛmɔ isami i, beze ŋwisi baʋímɔ isami i; banama gi beedzi bidɔ ɛ, beze ŋwisi kidiliɛ gi beedzi i, aní ba kinɛ kinu u; 31banama gi bɛwa kelea lia mɛ bidɔ mɛ su axwɛ ɛ, bakídzi tole nì bɛ ɛ. Lɛ ese linu si kelea lia kiliɛ gi kwite ka abla ɛ, ka onu kɛɛza.
32Mapɛ si mlɔ ina idɔ. Onyime gi ɔ́gbani ɔdzɛ ɛ, tɔ yɛ begyodi ʋa beze ní Ɔkaɛ yɛ axwɛ na su ani kiliɛ gi aaku Ɔkaɛ aŋu i. 33Pɔ̀ onyime gi agbani ɔdzɛ kɔ ɛ, yɛ begyodi ʋa bali ní kelea mɛ eboe la su, lɛ ese linu si aapɛ si yiku yedze aŋu; 34lɛ yɛ bapɛ́pɛ ʋa bɛlɛ ɛ. Ɔdisami ni ɔdzɛ gi ódini onyime e, izɛɛpɛ si yiwa Ɔkaɛ yɛ axwɛ na, yɛ kupɛpɛ kunu si yikɔ yɛ kisugyaɛ nì yɛ Ɔfuɛfuɛ nɔ pɔ́ ɛki Ɔkaɛ. Pɔ̀ ɔdzɛ gi odini onyime e, izɛɛpɛ kelea mɛ eboe la, kiliɛ gi aaku yenye aŋu i. 35Mɛɛpani la ya ɛsi mlɔ kí mlɔ ɔtutɔ mlɔ kupɛ̀pɛ aní si tɔ mitsi kudeonu iiki mlɔ ɔ, boŋu tɔ mleze ní kude gyɔgyɔ aʋa tɔ mlakɔ mlɔ aŋu na petee atrɔ ní Ɔkaɛ yɛ kusumu yo aʋa.
36Xe onyime ɔtɔ gi akpɛ ɔdisami ɔtɔ kuwlawla a, xe amɔ si yaʋíga mumɔ, lɛ xe ɔdisami nɔ gi akpɛ kuwlawlaa eetsi ní agɔ mɛ ɛ, xe amɔ si liziã si yigbani yɛ ɛ, lilɛ si ɔbitɛ ní yɛ kupɛ́pɛɔ aʋa tɔ ɔgbani yɛ. Kesetataa tɔtɔ káma ni lɛ mɛ. 37Pɔ́ xe onyimee atrɔ lɛ ní yɛ ɔtutɔ yɛ ɔna nɔ mɛ si yɛ ɔ́tragbanɔ ɔdzɛ ɛ, gi aní kimi bemi ní yɛ aʋa a, xe aatani isu aʋa kuŋa a si yɛ ɔ́tragbani ɔdzɛ ɛ, onyime liɛ klɔ kyɛ abitɛ lɛ mumɔ. 38Lɛ loso onyime liɛ klɔ gi agbani ɔdisami nɔ ɔ, gi bɛkpɛ kuwlawla abitɛ lɛ mumɔ ɔ, pɔ̀ ɔniliɛ ɛ, gi ɔ́gbani yɛ kuwlawlakpɛdzɛ ɛ, abitɛ lɛ mumɔ asanɔ.
39Ɔdzɛ gi odini onyime e, xe yenye ɔlɛ ligbã́ nɛ ɛ, ɔwlamɔmɔ ɔma ní yɛ su u; pɔ̀ xe yenye etse e, kɔ lɔ amɔ ɔwla gi aazeni onyime kakaa a, gi apɛ ɛ, pɔ̀ lilɛ si oze Ɔkaɛ yɛ ɔnɛ ɛ. 40Ní mɛ kumɔmɔ onu i, aaze ɔsamì nɛ ɔsã nɔ, xegi aaze ŋwisi kiliɛ gi ɔlɛ kinɛ ɛ. Lɛ megyo le edi si mɛ fɛ ɛ, Aya yɛ Ɔfuɛfuɛ nɔ ɔkpasi ní mɛ mɛ̀.
Currently Selected:
1 Korinto 7: avn
Highlight
Share
Copy
Want to have your highlights saved across all your devices? Sign up or sign in
© Ghana Institute of Linguistics, Literacy and Bible Translation, 2017 In cooperation with Wycliffe Bible Translators, Inc
