1 Korinto 6
6
Litsi kuxwaxwa ní baʋaziŋa ba kusi
1Xegi liboe liku ní wɔ ni ɔʋaziŋa ɔtɔ kusi i, kude woli wɔmɔ si wɔakɔ lɛ ɔtsinɔ kelea mɛ banɔ si basɛ ní lipoe lɛ klɔ mɛ gi baʋaziŋa ba balɛ na a? 2Kite mléte si baʋaziŋa ba ba bɛtráxwa litsi le ni kelea mɛ na a? Lɛ xegi mlaaxwa litsi ni kelea mɛ ɛ, kitɛ xe mlatráxwa litsi ni eboe tsɛ́ɛ la na a? 3Lɛ kite mléte si blɔ kwitraxwa litsi nì Aya yɛ baxwɛdzɛ ba na a? Lɛ kitɛ xe mlátraxwa litsi ni kelea lia ya mɛ eboe la ɛ? 4Lɛ xe eboe hehe eku ní mlɔ kusi ní eboa la ya elu su i, mlakya banɔ gi bénu kididɔ ní ɔsɔli ha lɔ mɛ ɛ, tɔ basɛ la a. 5Mapani nite tɔ mikɔ ɛkpɛ mlɔ kuye. Kɔ kisɛ mlɛsɛ sì ɔnɔnɔ ɔ́ma ní mlɔ kusi gi ete liboe e, gi aaxwa litsi ní baziŋa ba kusi na a? 6Xe lɛ loso o, onemi ɔʋaziŋa tole aakɔ̀ ɔsã kude ní yɛ ɔhanuglɔɛ su u, ní banama gi báziŋa ɛ, ba aŋu mɛ na!
7Agi mlɛkɔ ɔsã kude ní mlɔ ahanuglɔ ba su i, libasɛ si bɛŋa mlɔ aʋa kooko. Ege loso mlatráki si bata mlɔ ese na a? Ege loso mlátraki si babà mlɔ ɔ? 8Xe mlɔ boŋu mlɛɛbà banima a, xe mlɛɛta ba ese na a? Xe mlɛbitɛ la ya ɛmanɔ ní mlɔ benemi baʋaziŋa ba su u?
9Kite mléte si litukpo me gagla benete ba ɛ, bátramɔ kaŋase ní Aya yɛ kaʋaŋaa mɛ na a? Mlakímeni isu u: bahasi nɛ loo babubitɛ loo benyime ba ya gi bɛgbani badzɛ ɛ, pɔ̀ xe bizɛlɔ̀ ádzɛboe e, loo benyime ba ya gi badzɛ ba bizɛɛtsa kibɔɛ kɔ si bafɛ ni ba a, loo benyime ba ya gi bizɛɛfɛ ni ba ahanuglɔ benyime e, ni badzɛ ba ya gi bizɛpɛ ba ahanuglɔ badzɛ ba a, 10loo beze ba, loo banama gi bizɛɛpɛ si kidɔ kakaa kize ba kinɛ ɛ, loo badaŋwɛmu ba loo banama gi bizezizi banɔ su u, loo banama gi bizemeni banɔ ɛzi ba bidɔ mɛ ɛ, batrámɔ kaŋase ní Aya yɛ kukusi yo me e. 11Lɛ ligbã́ɛ nɛ klɔ mlɔ mɛ mlɔ banɔatɔ mleze e. Pɔ̀ beplo mlo o, bɛdra mlɔ su, bɛbitɛ mlɔ si mlɔ bede ʋa bɛgyɔ ní Ɔkaɛ Yesu Kristo yɛ linyi ne me gani blɔ Aya yɛ Ɔfuɛfuɛ nɔ mɛ.
Mlɔ kisugyaɛ kinu Aya yɛ lisɔligba lɛ
12“Kidɔ kakaa su kidra ɛki mɛ si mibitɛ ɛ,” “pɔ̀ aní kidɔ kakaa kibu libi ɛki mɛ ɛ.” Bɛdra kudeonu iiki mɛ si mibitɛ kidɔ kakaa, pɔ̀ ani kidɔ kakaa kiatani mɛ aʋa kuŋa a. 13“Kiŋaŋaɛ kilɛ ki lipo le, lɛ lipo le fɛ lilɛ ɛki kiŋaŋaɛ.” Pɔ̀ Aya atrázizi bɛ tuʋa a. Kisugyaɛ, bábitɛ kɛ aki kihasi ye e, pɔ̀ bɛbitɛ kɛ si kisumu Ɔkaɛ ɛ, lɛ Ɔkaɛ fɛ aaki kɛ kidɔ kakaaɛ liɛ gi kizia kɛ ɛ. 14Lɛ gani yɛ kigaglaɛ mɛ ɛ, Aya ayɔni Ɔkaɛ adɔ ni bekpo ʋa mɛ lɛ aayɔni blɔ fɛ ɛ. 15Kite mléte si mlɔ inɔse le e, inu Kristo yɛ isu ya kapɛatɔ na a? Kɔ maakɔ Kristo yɛ kapɛ katɔ gi miikɔ ka ɛkpɛ likpɔ ni ɔhasinɛ na a? Litrába lɛ mɛ ɛ! 16Kɔ kite mléte si ɔniliɛ gi izɛɛkpɛ ɔhasinɛ ɔha ɛ, edzì kidɔ tile ni yɛ ní kisugyaɛ mɛ na a? Lɛ ese linu si bɛpani si, “Ba tiaʋa ɛ, biadzi kisugya tile.” 17Pɔ̀ ɔniliɛ gi akpɛ isu likpɔ ni Ɔkaɛ ɛ, aadzi kidɔ tile nì yɛ ní Ɔfuɛfuɛ nɔ mɛ.
18Mlese ní kihasi ye su, liboe zimizi kakaa elu gi ɔnɔ aabitɛ ɛ, ɔʋíbitɛ lɛ ɔmanɔ ní yɛ isu ya su u; pɔ̀ ɔniliɛ gi abitɛ lihasiboe e, abitɛ liboe zimizi amani yɛ isu ya su u. 19Mléte si mlɔ kisugyaɛ kinu Ɔfuɛfuɛ Dradra lɔ Lisɔligba lɛ na a, gi ɔkpasi ní mlɔ mɛ ɛ, gi lɔ mlɛzi dɔni Aya klɔ na a? Mláma ní mlɔ tutɔ mlɔ isu wla mɛ ɛ; 20Aya yɛ edzi mlo kedzi zɛzɛ. Lɛ loso e, mlakɔ mlɔ kisugyaɛ akpɛ kubùbù ní Aya su u.
Currently Selected:
1 Korinto 6: avn
Highlight
Share
Copy
Want to have your highlights saved across all your devices? Sign up or sign in
© Ghana Institute of Linguistics, Literacy and Bible Translation, 2017 In cooperation with Wycliffe Bible Translators, Inc
