1 Korinto 5

Mlebu Ɔhasiwa yɛ ní baʋaziŋa ba kusi

1Abla ɛ, bɛtrɔ likla ní kunutsatsa aʋa si kihasi ye kikpasi ní mlɔ kusi gbɛgbɛ nite si babubitɛ ba kura kyɛ ɛ, líma ní ba kusi nite e. Bɛsi mɛ si onyime ɔtɔ ɛɛfɛ ni yɛkadze! 2Lɛ mlɛkɔ lɛ dɔ isu ya a? Aní asigaga mɛ boŋu mlaaze e, xe mlaabu onyime liɛ ɛ, gi abitɛ liboe lɛ ya ní mlɔ kusi i? 3Lɛ gi máma ni mlɔ kusi ní kisugyaɛ mɛ kyɛ ɛ, malɛ ní mlɔ kusi ní Ɔfuɛfuɛ nɔ mɛ ɛ, lɛ mebú ɔniliɛ klɔ gi abitɛ liboe lɛ ya lipɔ ɔ, ŋwisi kilɛ malɛ ní mlɔ kusi kinɛ ɛ. 4Xegi mletsa ní blɔ Ɔkaɛ Yesu yɛ linyi ne me e, lilɛ si mlete si malɛ nì mlɔ ní Ɔfuɛfuɛ nɔ mɛ lɛ blɔ Ɔkaɛ Yesu Kristo yɛ kigaglaɛ kyɛ kilɛ ní mlɔ kusi i, 5mlayurɔ ɔniliɛ klɔ akpɛ ni Satana awla tɔ ozizi yɛ kule kuku zimizi yo#5:5 yɛ kisugyaɛ kɛ bapɛ́pɛ ba pɔ̀ tɔ yɛ Ɔfuɛfuɛ nɔ kɔ aamɔ kubúbú yo ní Ɔkaɛ yɛ liwe le aʋa.

6Lípɛ si mlazadɔ isu ya! Kite mléte si, “kuɖeme sisami ɔtɔ ko izɛki si amɔwɔ yɛ pɔ́ izeeho na a?” 7Mlayurɔ kuɖeme koko ye ní mlɔ kusi i, tɔ mledzi ŋwisi amɔwɔ vuvu gi kuɖeme ɔtɔtɔ ɔ́ma ní yɛ mɛ ɛ, kiliɛ gi lilɛ si mleze e, lɛ ese linu si bɛkɔ blɔ kutseolidɔzawe le lɛ keʋesibi ya gi kenu Kristo e kɔ. 8Lɛ loso e, mlaki tɔ kuŋa liwe le aní ni kuɖeme koko liɛ klɔ gi onu kupɛ́pɛ zimizi ni litukpomegagla a, pɔ̀ ni àklã gi kuɖeme ɔ́ma ní la mɛ ɛ, ligbã́ ɛ nɛ klɔ gi lɛ su lidra a, xe linu anukwarɛ ɛ.

9Ní keplekpaa lia klɔ gi matsisi mlɔ mɛ ɛ, magba mlɔ sì mlakíkpɛ ɔhá nì bahasi nɛ ba a. 10Maʋípani ní babubitɛ ba ní kelea lia mɛ gi bɛɛwa kihasi ye su u, loo baŋazinɛ loo banama gi bizezuru su u, loo bizesumu babu ʋa. Xegi nya wɔaya kí banɔ ba ya elu i, lilɛ si wɔado ní kelea lia mɛ petee. 11Pɔ̀ abla ɛ, mɛɛŋwlimi iiki mlɔ si líma si mlakpɛ ɔha a, nì ɔniliɛ klɔ gi ɛɛxwa isu ya si onemi ɔʋaziŋa a, pɔ̀ xe onu ɔhasinɛ, loo onu ɔnɔ gi izɛpɛ si kidɔ kakaa kidzi yɛ kinɛ ɛ, loo onu ɔnɔ gi izɛba banɔ ɔ, loo onu ɔnɔ gi izesumu ɔbu i, loo onu ɔnɔ gi izezizi banɔ su u, loo onu ɔdaŋwɛ loo onu oze. Mlakíŋa bidɔ ni ɔniliɛ klɔ ʋa elu kyɛ ɛ.

12Aní mɛ lixwɛ linu si mixwa litsi ni banama gi báma ní ɔsɔli ha lɔ mɛ ɛ. Pɔ̀ linu mlɔ lixwɛ si mlaxwa litsi ni banama gi bákpasi ní ɔsɔli ha lɔ mɛ ɛ. 13Aya aaxwa litsi ni banɔ ba klɔ gi báma ní ɔsɔli ha lɔ mɛ ɛ. “Mlebu ɔnɔ zimizi ye ní mlɔ kusi.”

Currently Selected:

1 Korinto 5: avn

Highlight

Copy