1 Korinto 4

Kristo yɛ banɔkpɛkpɛ ba

1Lɛ loso lilɛ si i, banima bamɔ blɔ si kunu Kristo yɛ banɔsumu, ni banɔ gi ba awla akɔ Aya yɛ eboe kpokpo la akpɛ ɛ. 2Abla ɛ, kidiliɛ gi Aya aziã adɔ ni banɔ ba klɔ awla a, gi akpɛ yɛ eboe kpokpo la ɛ, kɛ kinu si liziã si babasɛ si benu anukwarɛ benete. 3Abla ɛ, mákɔ lɛ mɛ ɛ, xe mlɛxwa litsi ni me e, loo xe bɛxwa litsi ni me ní kelea lia ya mɛ otsixwa kɔ ɔtɔtɔ ɔ; ní anukwarɛɛ mɛ ɛ, maʋíxwa litsi ni mɛ isu ya kyɛ ɛ. 4Mɛ begyodi ʋa mɛ bɛdra, pɔ̀ aní lɛ libasɛ si mɛ linɛ ligyɔ ɔ. Ɔkaɛ yɛ izɛɛwxa litsi nì me e. 5Lɛ loso e, mlakíxwa litsi ni ɔnɔnɔ ɔ, xe ableke lipoe le liana a; mlepe Ɔkaɛ yɛ kubabaa. Yɛ aabu eboa la gi bekpo ní litumu ne me manɔ ni kuklekleo onu u, lɛ aabu banima ba begyodi ʋa a, gi bàkpasi ní ba ina nɛ mɛ ɛ, ku basɛ. Lɛ ní lipoe lɛ klɔ mɛ ɛ, ɔnɔ kakaa aazi yɛ kukpɔ̀kpɔ̀ɔ dɔni Aya klɔ.

6Abla benemi ba, kɔkpɛ mlɔ loso e, makɔ la ya petee akɔ asrɔ ni Apolo ni mɛ ɔtutɔ lɔ mɛ isu ya, atɔ mlaanu liboe lɛ ya ese aki mlɔ kupɛ̀pɛ si, “Mlakídɔ kidiliɛ gi bɛŋwlimi plɛ ɛ, ɛza.” Mlɔ mɛ ɔnɔnɔ ɔkifeke isu ní ɔnɔ tole ɔtɔtɔ loso o, tɔ aaplɛ ɔnɔ dzedze ɔtɔtɔ ní kese e.

7Nyaŋwɛ abitɛ mlɔ si mlɛga lidze ní banɔ dzedze ba su u? Lɛ ege kilɛ ní mlɔ awla a, gi aní kiki bɛki mlɔ kɛ ɛ? Lɛ xegi kiki bɛki mlɔ kɛ ɛ, ege lɛ loso mlɛdɔ isu ya ŋwisi aní kiki bɛki mlɔ kɛ ɛ?

8Kidɔ kakaa gi mlɛzia ɛ, kilí ní mlɔ awla kooko. Mledzi bexonete kooko! Lɛ mlɛbitɛ isu ya kokoo si mledzi bekusi i, ní lipoe lɛ klɔ mɛ gi blɔ kɔ ɛ, kuʋídzi bekusi i. Nya maapɛ si mlanya enu bekusi kokoo tɔ blɔ kyɛ kwiaze bekusi ni mlo! 9Lɛ libitɛ ɛki mɛ si Aya akɔ blɔ yɛ banɔkpɛkpɛ ba akɔ ŋwisi banɔ gi bɛtsá ní ɔga nɔ lɔ ɔgɔgɔ klɔ#4:9 Tsã ní Helanɛ ma ni Roma nɛ ma kusi i, banɔdzidzi ba ni banɔsumua ba gi bɛtsa kutsépia ɛkɔ ɛ, bɛzɛki si bata kigũ ni liŋwafu nɛ mɛ baga ʋa ŋwisi gyata ʋa kinɛ ní ɔmanɔ bidɔ mɛ odi klɔ banɔ ba klɔ ʋa elu bizɛɛ tsa a ní ɔga nɔ ɔgɔgɔ klɔ. ní line ne me e, banɔ gi bɛtsa kutsépia ekɔ kinɛ ɛ. Abitɛ blɔ si kwidzi bidɔdidi ki kelea petee, kwidzi bidɔdidi iiki Aya yɛ baxwɛdzɛ ba ni banima pɔ́ ɔ.

10Kwidzi kunukpaʋi kɔkpɛ Kristo loso; pɔ̀ mlenu beboete ní Kristo me! Kwibotso, pɔ̀ mlɔ kɔɔ mlalɛ gagla a! Bɛkpɛ kubùbù ní mlɔ su, pɔ̀ blɔ kɔ ɛ, bedi blɔ aŋu mɛ! 11Gakɔna ni abla ɛ, kuzɛɛza kuʋɛ lɛ olile izeku blo o; kukpasi ní asiapɛ mɛ; banima bizekusi blo, lɛ kupe kúma ní blɔ awla a. 12Kuzɛɛwa axwɛ gagla ni blɔ awla la. Xegi bexo ifi le kpɛ blɔ ɛ, kuzɛɛkrira; xegi bɛyɔ kedu ní blɔ su i, kuzɛɛlɛɛ ní lɛ onu u. 13Xegi bezizi blɔ su i, kuzebu le onu nì ɔnà gbã. Gakɔna ni abla ɛ, kwidzi simlu iiki kelea mɛ, kwidzi sivu se ɔ̀bali kɔ ɛki kelea mɛ.

14Máʋiŋwlimi eboa la ya si míkɔ la ɛkpɛ mlɔ kuye e, pɔ̀ tɔ migba mlɔ ŋwisi mɛ ɔtutɔ mɛ bebi gi malɔ kinɛ ɛ. 15Lɛ xegi baʋadi akpe liɔfɔ bali ní mlɔ awla ní Kristo me kyɛ ɛ, Ɔka tole kpoo ko ɔlɛ ní mlɔ awla. Lɛ ní Kristo Yesu me e, medzi mlɔ ɔka gi ma mani mlɔ Liboe Gbã nɛ ɛ. 16Lɛ loso mɛɛkpɛ mlɔ sise si mlakpasi mɛ kizezee me. 17Kɔkpɛ lɛ ya loso e, mɛɛtsisi Timoteo, gi onu mɛ obi ní Ɔkaɛ mɛ gi malɔ ɛ, xe onu anukwarɛɛ onete ní Ɔkaɛ mɛ ɛ, ní mlɔ klɔ. Yɛ aaplɛ aŋu kí mlɔ, mɛ bede ʋa ya kude gi mezeno ní mɛ ligbã́ nɛ ní Kristo Yesu me e, gi lisrɔ ni kidiliɛ ɛ, gi mabasɛ ní isɔliha lɛ mɛ ní ɔkɔ kakaa ɛ.

18Mlɔ mɛ banɔatɔ mlekpese isu kufeke gi mlɛbu si mátraba edi mlo tɔ ɛ. 19Pɔ̀ xe Ɔkaɛ adimɛ ɛ, maaba mlɔ klɔ kpekpemi, lɛ niklɔ maate kigaglaɛ liɛ klɔ gi kiliɛ ní banɔ basudɔ ba ya ʋa awla a, ní kiliɛ gi beegu kunugu yo su u. 20Lɛ ese linu si Aya yɛ kaʋaŋaa ɛ kénu enugumeboe, pɔ̀ enu kigagla eboe e. 21Liwoli mlɛpɛ́ ɛ? Miba mlɔklɔ ni kiseʋi loo miba ni kulɔlɔ ni Ɔfuɛfuɛ gi ɛplɛ litɔ kese na a?

Currently Selected:

1 Korinto 4: avn

Highlight

Copy