1 Korinto 3

Kulɛlɛ ní ɔsɔli ha lɔ mɛ

1Mɛ benemi ba, mátratani kupani ki mlɔ ŋwisi banɔ gi balɛ ní Ɔfuɛfuɛ nɔ mɛ ɛ, lize si mipani ki mlɔ ŋwisi kelea mɛ banɔ kinɛ ɛ, ŋwisi bebi ní Kristo me kinɛ ɛ. 2Magani mlɔ nì kumwani yɔ, aní ni bidɔ ŋaŋa nyipu ʋe e, lɛ ese linu si mlábla aki bidɔ nyipu kuŋaŋa a. Ni abla kyɛ ɛ, mlamá kublabla mɛ aki ʋɛ ɛ. 3Lɛ mledzi alɛ ní kelea mɛ ko. Lɛ ese linu si kaŋuza ni avitɛ na alɛ ní mlɔ kusi i, kɔ aní banama gi bɛkɔ ba aŋu na ɛtrɔ ni kelea mɛ bidɔ mɛ aʋa ko mledzi enu i? Mlɔ kiboebitɛ kiibasɛ si kelea me banɔ ko mledzi enu u. 4Xe mlɔ mɛ tole apani si, “Malɛ nì Paulo kude e” xe ɔʋla yɛ kyɛ apani si “Malɛ ni Apolo kude e” kɔ aní kelea mɛ banɔ ko mlenu i?

5Nyaŋwɛ onu Apolo o? Lɛ nyaŋwɛ onu Paulo o? Aya yɛ banɔsumu ko kunu, lɛ gani blɔ aʋa mlɛziŋa a. Blɔ mɛ ɔkakaa izɛɛwa lixwɛ nɛ klɔ gi Ɔkaɛ aki yɛ si ɔwa ɛ. 6Makpɛ lisebi le, Apolo yɛ akpɛ lɛ kuni yo, pɔ̀ Aya yɛ aki si lisebi le litsi i. 7Ɔniliɛ klɔ gi yɛ akpɛ lisebi le e, ni ɔniliɛ klɔ gi yɛ akpɛ lisebi le kuni yo e, ɔ́maɛ veve e, pɔ̀ Aya gi yɛ aki si bidɔ mɛ bizetsi i. 8Ɔniliɛ klɔ gi yɛ akpɛ lisebi le ni ɔniliɛ klɔ gi yɛ akpɛ lɛ kuni yo e, kutrɔtrɔ tule ko kuli ní ba awla, lɛ ɔkakaa azɛ yɛ liʋɛ tsatsa lɛ ní yɛ axwɛ ana gi awa onu u. 9Lɛ ese linu si kunu Aya yɛ baxwɛwaglɔnɛ lɛ mlɔ mlenu Aya yɛ ɔnyrɔ nɔ, lɛ mlɔ mlenu yɛ ligba lɛ gi ɛɛwa a.

10Ni Aya yɛ lipomepɛpɛɛ nɛ gi aki mɛ onu i, makpɛ ɔxɔ lɔ ŋwisi ɔgbawa gbã kinɛ, lɛ ɔnɔ dzedze ɛɛwa ɛtrɔ ɛ. Pɔ̀ lilɛ si ɔnɔ kakaa odi mumɔ kiliɛ gi ɛɛwa ɛtrɔ ɛ. 11Lɛ ese linu si ɔnɔnɔ ɔ́tratani ɔxɔ dzedze kukpɛ sani lɔ klɔ gi bɛkpɛ plɛ ɛ, gi lɔ onu Yesu Kristo e. 12Lɛ xe ɔnutɔ akɔ sika a, klosalo loo akla zikedzi, ise loo lixu loo siwa awa atrɔ ni ɔxɔ lɔ ya aʋa ɛ, 13yɛ lixwɛ nɛ liaŋwi, lɛ ese linu si liwe le liabu le kubasɛ ɛ. Ní Litsixwawe le aʋa ɛ, kifu yɛ kiabu ɔnɔ kakaa yɛ axwɛwawa la kubasɛ; kifu yɛ kiabasɛ lixwɛ nɛ gi ɔnɔ kakaa awa ɛ, la kigbãɛ mɛ ɛ. 14Xegi kidiliɛ gi awa kitani kulɛ ɛ, ní kifu yɛ onu i, ɔgbawa yɛ aazi yɛ liʋɛ nɛ. 15Pɔ̀ xe ɔnutɔ yɛ axwɛwawa la ɛkani i, kɔlɔ aalila yɛ liʋɛ nɛ; pɔ̀ yɛ ɔtutɔ lɔ ɛ, aamɔ kubúbú, ŋwisi ɔnɔ gi aga kifu yɛ mɛ kinɛ ɛ.

16Kimɔ mlaʋímɔ egyesi si mlɔ ɔtutɔ lɔ ɛ, mlɔ mlenu Aya yɛ Lisɔligba lɛ na a? Lɛ Aya yɛ Ɔfuɛfuɛ nɔ ɔkpasi ní mlɔ mɛ na? 17Lɛ xe ɔnutɔ aazizi Aya yɛ Lisɔligba lɛ ɛ, Aya aazizi ɔniliɛ klɔ ʋa. Lɛ Aya yɛ Lisɔligba lɛ ɛ, lɛ su lidra, lɛ mlɔ mlenu yɛ Lisɔligba lɛ ɛ.

18Ɔnɔnɔ ɔ́kimeni yɛ isu ya a. Xe ɔnutɔ ní mlɔ kusi ebu si yete liboe ní kelea lia ya mɛ kilɛlɛɛ onu i, odzi “kanukpaʋi” tɔ aatani oboete ɔtutɔ kudzi i. 19Lɛ ese linu si kelea lia ya mɛ kuboeteo kunu kuga ní Aya aŋu mɛ. Ŋwisi kiliɛ gi bɛŋwlimi plɛ si,

“Aya izɛpunu beboete ba evu ní ba kuboeteo me.”

20Lɛ bɛŋwlimi ni ɔkɔ dzedze dzɛ si i,

“Ɔkaɛ ete beboete ba begyodi ʋa; ete si bénu kididɔ ɔ.”

21Lɛ loso e, líma si ɔnɔnɔ ɔdɔ isu kɔkpɛ banɔ. Lɛ ese linu si kidɔ kakaa kinu mlɔ kinɛ ɛ; 22Xegi Paulo o, Apolo loo Petro o; loo kelea lia ya mɛ o, ligbã́ loo kutse o, abla loo ɔtɔ nɔ mɛ o, bɛ petee binu mlɔ binɛ. 23Lɛ mlenu Kristo banɛ ɛ, lɛ Kristo onu Aya yɛ ɔnɛ ɛ.

Currently Selected:

1 Korinto 3: avn

Highlight

Copy