1 Korinto 2
2
Liboe le ní Kristo gi bɛkla ní ose lo su i su
1Benemi ba, agi maba mlɔ klɔ ɔ si mipani Aya yɛ liboe kpòkpò le si mlɔ ɛ, máwa enugumeboe ʋidi ni keplekpa mɛ kuboete ʋidi su axwɛ ɛ. 2Lɛ gi meze ní mlɔ su i, matrɔ lɛ si mátrate kididɔ sani Yesu Kristo o, gi beku ní ose lo su u. 3Lɛ gi maba mlɔ klɔ ɛ, kigagla kíze ní mɛ su, lɛ mazeesugu ni lifu glegle e. 4Mɛ kunugu yo ni mɛ liboedodo le e, bíga eboeteboe ni eboe gi aameni banɔ onu me e, boŋu i, kidiliɛ gi mabitɛ ɛ, kibasɛ Ɔfuɛfuɛ nɔ lɔ kigagla ɛ. 5tɔ mlɔ kuziŋaa kukíze ní kelea mɛ kuboeteo aʋa a, boŋu i, tɔ kwiaze ní Aya yɛ kigaglaɛ mɛ.
Kuboete dɔni Ɔfuɛfuɛ nɔ klɔ
6Pɔ̀ kwipani eboeteboe ki banama gi betsi ní Ɔfuɛfuɛ nɔ mɛ ɛ. Pɔ̀ aní kelea lia mɛ kuboete aloo baʋaŋaa ba a, gi bɛɛŋa kelea aʋa a, gi ba onu ɛɛtraza ɛ. 7Owo, kwipani ní Aya yɛ kuboete kpòkpò su, kuboete gi bɛkɔ ɛ kpò o, gi kɔ Aya akya a aplɛ aki blɔ kusudraa a, xe ableke kelea kekpese e. 8Kelea lia mɛ baʋaŋa ba ɔtɔtɔ ónu kɔ ese e, xegi nya benu kɔ ese e, nya bákla kuklekleo Ɔkaɛ ní ose lo su u. 9Pɔ̀ ŋwisi kiliɛ gi bɛŋwlimi plɛ ɛ,
“Kimbi kímɔ ɔ, lɛ kutu fɛ kúnu u,
lɛ ɔ́nɔnɔ oʋígyo le edi i,
kidiliɛ gi kɛ Aya abla aplɛ
aki banama gi bɛlɔ yɛ ɛ.”
10Pɔ̀ Aya ebu le abasi blɔ gani Yɛ Ɔfuɛfuɛ nɔ aʋa a. Ɔfuɛfuɛ nɔ izɛɛpamí kidɔ kakaa, Aya yɛ bidɔ dzudzu kpokpo ʋe fɛ. 11Lɛ ese linu si nyaŋwɛ ɔlɛ mlɔ kusi i, gi aatè yɛ ɔhanuglɔ yɛ begyodi ʋa sani ɔniliɛ klɔ yɛ ɔtutɔ lɔ yɛ Ɔfuɛfuɛ nɔ ɔ; niteme ke e, ɔnɔnɔ ɔ́trate Aya yɛ begyodi ʋa sani yɛ Ɔfuɛfuɛ nɔ ɔ.
12Kúzɛ kelea lia ya mɛ Ɔfuɛfuɛ nɔ ɔ; boŋu i, kwizɛ Ɔfuɛfuɛ ɔnɔ gi Aya atsisi i, tɔ kwiate kidiliɛ gi kɛ Aya akɔ akyɛ blɔ faã ɛ. 13Eboa la ya kwiipani, lɛ enu eboe gi kelea lia ya mɛ kuboeteo kwibasɛ blɔ ɔ, boŋu i, enu eboe gi Ɔfuɛfuɛ nɔ ɛbasɛ blɔ ɔ gi ɛɛbasɛ Ɔfuɛfuɛ nɔ mɛ anukwarɛ gani Ɔfuɛfuɛ nɔ mɛ eboe la aʋa a. 14Ɔniliɛ awla gi Ɔfuɛfuɛ nɔ ɔma ɛ, ɔ́tratani bidɔ gi bidɔ ní Aya yɛ Ɔfuɛfuɛ nɔ klɔ ɛ kuzɛ, lɛ ese linu si binu anukpaboe aki yɛ, lɛ ɔ́tratani bɛ ese kunu u, lɛ ese linu si Ɔfuɛfuɛ nɔ mɛ ko biaga, xe bianu bɛ ese e. 15Ɔniliɛ gi ɔlɛ ní Ɔfuɛfuɛ nɔ mɛ ɛ, izɛta liboe kakaa odi i, pɔ̀ ɔnɔnɔ ɔ́tratani yɛ kuta odi i.
16“Nyaŋwɛ ete Ɔkaɛ yɛ begyodi ʋa mɛ ɛ?
xe aatani yɛ bidɔ kubasɛ ɛ?”
Pɔ̀ blɔ xunyɔ ɛ, Kristo yɛ begyodi ʋa bali ní blɔ awla.
Currently Selected:
1 Korinto 2: avn
Highlight
Share
Copy
Want to have your highlights saved across all your devices? Sign up or sign in
© Ghana Institute of Linguistics, Literacy and Bible Translation, 2017 In cooperation with Wycliffe Bible Translators, Inc
