1 Korinto 15
15
Paulo aplɛ aŋu aki Korintoanɛ ma kidiliɛ gi kɛ aʋa bɛziŋa ɛ
1Abla ɛ, mlaki tɔ miplɛ aŋu ki mlɔ mɛ benemi ba ní liboe gbãɛ nɛ gi mapani aki mlɔ azanɔ aʋa a. Mlɛzi lɛ lipoe lɛ klɔ, lɛ mledzi alɛɛ gaglaa ní lɛ mɛ ɛ. 2Lɛ ya linu liboe gbãɛ nɛ gi lɛ libu mlo o, xegi mlɛtrɛ lɛ aʋa a, xe mlɛzi liboe lɛ ɛ, gi mapani aki mlɔ aʋa ɛɛŋa ɛ. Pɔ̀ xegi aní nite e, kɔ mlɔ kuziŋaa kunu kufiteete.
3Maki mlɔ kidiliɛ gi kisaɛ veve e, gi kɛ mɛfɛ mazɛ ɛ. Kristo etse aki blɔ eboe zimizi na, ŋwisi kiliɛ gi bɛŋwlimi kpɛ ní kuŋwlimi dradraa mɛ kinɛ ɛ. 4Bevive ye lɛ bɛyɔni yɛ dɔni bekpo ʋa mɛ ɛ ní liwe tanɛ nɛ aʋa ŋwisi kiliɛ gi bɛŋwlimi nɛ ɛkpɛ ní Kuŋwlimi dradraa mɛ kinɛ ɛ. 5Ebu isu abasi Petro, lɛ klɔ ʋa kede e, banɔkpɛkpɛ liɔfɔ ni tiaʋa ba bɛmɔ yɛ. 6Lɛ klɔ ʋa kede e, ebu isu abasi benemi gi bɛsani banɔ alafa tietsu ní lipoe tile me e, gi ba kapɛ ʋidi a kedzi alɛ ligbã́ nɛ ɛ, pɔ̀ bamɛ batɔ kɔɔ betse e. 7Lɛ ebu isu ya abasi Yakobo o, lɛ kede e, yɛ banɔkpɛkpɛ ba petee e. 8Lɛ gɔgɔ ɛ, mɛ fɛ mamɔ yɛ, mɛ gi bɛpɔ ŋwisi limɛ gi liwɔli kinɛ ɛ.#15:8 Paulo yɛ ɔnɔ kpɛkpɛ kuzeze e, kúze ŋwisi kiliɛ gi Yesu yɛ badɔkpasi ba bedzi banɔkpɛkpɛ kinɛ ɛ. 9Lɛ ese linu si mɛ menu ɔsisami yɛ ní yɛ banɔkpɛkpɛ ba kusi i, gi nya mégyeno si baxwa mɛ si yɛ ɔnɔkpɛkpɛ kura kiliɛ gi meti Aya yɛ ɔha lɔ loso o.
10Gani Aya yɛ lipomepɛpɛ nɛ mɛ ɛ, menu kidiliɛ gi menu abla ɛ, lɛ yɛ lipomepɛpɛ nɛ libu libi kí mɛ ɛ. Lɛ ese linu si mawa axwɛ gagla sani yɛ banɔkpɛkpɛ ba petee e, lɛ aní mɛ kigagla onu u, pɔ̀ Aya yɛ lipomepɛpɛɛ nɛ ɛ, gi lilɛ ní mɛ mɛ̀ ɛ. 11Lɛ loso e, xegi mɛ mɛɛsɔli loo ba bɛɛsɔli i, liboe tilee lɛ klɔ gi mlɛzi ŋa ɛ, lɛ ko blɔ petee kwisɔli i.
Banima kuyɔyɔ dɔni bekpo ʋa mɛ
12Xegi kwisɔli si Aya ayɔni Kristo adɔ ni bekpo ʋa mɛ ɛ, liboe woli lɛ loso mlɔ mɛ banɔatɔ bɛɛpani si banima bátrayɔ ɛdɔni bekpo ʋa mɛ ɛ? 13Lɛ ese linu si, xegi banɔ bátrayɔ ɛdɔni bekpo ʋa mɛ ɛ, lɛ kɔ Aya ɔ́yɔni Kristo ɔ́dɔni bekpo ʋa mɛ o. 14Lɛ xegi Aya ɔ́yɔni Kristo ɔ́dɔni bekpo ʋa mɛ ɛ, kɔlɔ ɔ liboe lɛ gi kwipani si mlɔ ní Aya su i, línu kididɔ ɔ, lɛ mlɔ kuziŋaa kyɛ kúbu libi i. 15Sanɔ ɛ, libasɛ si, kwiŋa asia katsali ní Aya su u, lɛ ese linu si kwipani si Aya ayɔni Kristo adɔ ni bekpo ʋa mɛ. Pɔ̀ lɛ ɔ́yɔni yɛ ɛ, xegi linu anukwarɛ ɛ, si banɔ bátrayɔ ɛdɔni bekpo ʋa mɛ ɛ. 16Lɛ xegi Aya ɔ́yɔni bekpo ʋa ɛ, kɔlɔ ɔ́yɔni Kristo fɛ o. 17Lɛ xe ɔ́yɔni Kristo e, kɔlɔ mlɔ kuziŋaa kúbu libi o, kɔlɔ mledzi alɛ ní mlɔ eboe zimizi na mɛ. 18Libasɛ si banama kyɛ gi bɛzi Yesu aʋa ɛɛŋa a, xe betse e, bɛlila! 19Lɛ xegi blɔ kudeonudidi yo ní Kristo me kunu ki ligbã́ lɛ ya ko e, kɔlɔ kunu basigaganete sani ɔnɔ kakaa ní kelea mɛ.
20Pɔ̀ anukwarɛɛ linu si Aya ayɔni Kristo adɔ ni bekpo ʋa mɛ. Yɛ onu ɔtɔpu yɛ gi onu liklatrɔtrɔ si biayɔ ni banama petee gi betse e. 21Lɛ ŋwisi kiliɛ gi kutse kwiba kelea mɛ gani ɔnɔ aʋa ɛ, kuyɔyɔ dɔni bekpo ʋa mɛ kyɛ kwiba gani ɔnɔ aʋa a. 22Lɛ kiliɛ gi banima pɔ́ bizeetse e, gi blɔ pɔ́ kunu Adam yɛ lipo me bebi loso e, nite me kee biayɔni ɔnɔ kakaa gi aadzi ligbã́ gani likpɔ kpɛkpɛ mɛ ni Kristo o. 23Pɔ̀ ɔnɔ kakaa ní yɛ lipoe le aʋa a: Kristo yɛ beetu kuyɔnɔ ɔ, lɛ kede e, biayɔni banama petee gi benu Kristo yɛ banɛ ɛ, xegi edzì aba ɛ.
24Lɛ klɔ ʋa kede e, kelea kiagù, lɛ aadzi ni kaʋaŋaa kí yɛ ka Aya a, xegi ezizi ɔʋaŋa kakaa ni ozekɔ kakaa ni kigagla kakaa kede e. 25Lɛ ese linu si lilɛ si Kristo ɔŋa kukusi ga kɔkpɛni lipoe lɛ klɔ gi aakpɛ yɛ ahwafiɔnɛ kakaa ní yɛ kukliseo e. 26Lɛ ahwafiɔnɛ gɔgɔ ɛ, gi yɛ aʋa aaŋa ɛ, yɛ onu kutseo. 27Lɛ Aya yɛ liboe le lipani si, “Aya akɔ kidɔ kakaa akpɛ ní yɛ kukliseo.” Abla xegi liboe li lipani si “kidɔ kakaa bɛkpɛ kɛ ní yɛ ese e,” lɛ mɛ lidra sì Aya ɔtutɔ lɔ ɔ, gi yɛ akɔ kidɔ kakaa akpɛ ní Kristo ese e, ɔ́ma ni lɛ mɛ ɛ. 28Lɛ xe Aya abitɛ la ya petee e, kɔlɔ yɛ Yebi ye ɔtutɔ ɛ, aakɔ̀ yɛ isu ya kpɛ ní Aya ese e, yɛ gi yɛ akɔ kidɔ kakaa akpɛ ni Kristo ese e; lɛ Aya aaŋa kukusi yo ní kidɔ kakaa aʋa a.
29Abla xegi batráyɔni bekpo ʋa ɛ, liboe woli liaba banama gi bɛkpɛ kuni kɔ ki banama gi betse e aʋa?#15:29 Ni ɔsɔli ha tɔpu nɔ lipoe le me e, bɛzɛkpɛ kuni yo ɛki banɔatɔ ní ba benete ba ya gi bákpɛ kuni akɔ xe betse e linyi ne me e. Lɛ xegi bekpo ʋa batráyɔ ɛ, ege loso bɛɛkpɛ kuni ki banima ní ba linyi ne me e? 30Lɛ blɔ kɔ ɛ, ege lɛ loso kwiazɛkpɛ blɔ ligbã́ nɛ ní kuxixa mɛ ɔnyɔsasa kakaa ɛ? 31Mɛ benemi ba, maka si mizɛɛmɔ kutseo aŋu mɛ liwe kakaa! Liboe lɛ gi mɛɛpani linu si, ŋwisi kiliɛ gi mizeefeke isu ni mlɔ aʋa ní blɔ Ɔkaɛ Kristo Yesu me. 32Lɛ libi woli lilɛ ní lɛ mɛ ɛki mɛ, xegi mɛɛta kigũ ni liŋwafu nɛ mɛ baga ʋa ni Efeso o ní banima begyodi ʋa onu u, xegi banima batráyɔ ɛdɔni bekpo ʋa mɛ ɛ, lɛ xegi kuyɔyɔ dɔni bekpo ʋa mɛ kúma ɛ, lɛkɔ
“mlaki tɔ kuŋa bidɔ atɔ kuŋwɛ bidɔ
lɛ ese linu si kwitratse kivo o!”
33Mlakíki tɔ bemeni mlo, “Ɔha nyani nyani mɛ kuzeze kuze zizi ligbã́zeze gbã.” 34Mlenyime ní mlɔ begyodi ʋa mɛ kiliɛ gi lilɛ si lize e, tɔ mlamɔni eboe zimizi na kubitɛ ɛ. Lɛ linu kuye ɛki mlɔ si, mipani sì mlɔ mɛ banɔatɔ ɛ, béte Aya a.
Kisugyaɛ kuyɔyɔ
35Pɔ̀ ɔnutɔ aaʋi si, “Kitɛ biayɔ ni bekpo ʋa a, xe biadzi ligbã ɛ? Kisugya wolilu kiaze ní ba awla a?” 36Linukpaboe woli lɛ ya! Kidiliɛ gi mlɛkpɛ ɛ, kiʋídzi ligbã́ sani si kitse xe ɛ. 37Lɛ xegi mlɛkpɛ bidɔ ɛ, aní ose ɔlɔ gi aaze e, lɔ mlɛkpɛ pɔ̀ lisebi i, nyafɛ adeʋi loo esebi dzedze. 38Pɔ̀ Aya aki lɛ kilɛlɛ liɛ mɛ gi apɛ si ose lo aaze e; lɛ ki lisebi kakaa ɛ, izɛki lɛ lɛ kilɛlɛ mɛ. 39Kisugya tile elu kíma ɛki bidɔ gbagbe ʋe petee e, kisugyaɛ kitɔ kilɛ ɛki banɔ gbagbe ba, kitɔ ki baga ʋa, lɛ kitɔ ki kudzɔʋi yɔ lɛ kitɔ ki akpa la fɛ ɛ.
40Lɛ bisugya ʋɛ bilɛ ní lifunu ne fɛ, lɛ bisugya ʋɛ bilɛ ní kesea aʋa; kupedi uliɔ klɔ gi kuli ní lifunu ne bidɔ mɛ su i, kunu lide tile lɛ kupedi uliɔ gi kuli ní kesea ʋa bidɔ mɛ su i, kunu kidɔ dzedze. 41Liwo le lɛ kupedi yo kunu lide tile, ɔdzidzi yɛ yɛ kupedi yo kunu kudzedze, lɛ badzidziebi ʋa fɛ ba kupedi yo kunu kudzedze. Lɛ badzidziebi bi ʋa ba kupedi yo kulɛ lidze lidze.
42Nite litraze xe bɛyɔni bekpo ʋa a, xe bedzi ligbã́ a. Kisugyaɛ liɛ gi bizɛkpɛ ní sise se me xe gi kwitse e, kizeezizi pɔ̀ xegi bɛyɔni kɛ ɛ, kiaze ligbã́ nɛ gi kitrazizi i. 43Biavive ke kisugya gi kiizizi i, pɔ̀ biayɔni kɛ ní kusudra mɛ ɛ. Bevive ke ní kubotsobotso me pɔ̀ xe bɛyɔ ni kɛ ɛ, kiayɔ ní kigagla mɛ. 44Bevive ke kesea ʋa ya kisugya; pɔ̀ biayɔni kɛ Ɔfuɛfuɛ mɛ kisugya a.
Lɛ ese linu si xegi kelea mɛ kisugyaɛ kilɛ ɛ, kɔlɔ Ɔfuɛfuɛ nɔ mɛ kisugyaɛ fɛ kilɛ ɛ. 45Lɛ bɛŋwlimi si “Ɔnɔ tɔpu yɛ Adam edzì kidɔ gbagbe,” Pɔ̀ Adam gɔgɔɛ gi yɛ onu Kristo ye e, onu Ɔfuɛfuɛ gi izɛki ligbã́ a. 46Aní kidiliɛ gi kilɛ ní Ɔfuɛfuɛ nɔ mɛ kitu ba a, pɔ̀ kidiliɛ gi kilɛ ní kelea lia mɛ kisugyaɛ mɛ ɛ, lɛ kede e, lɛ kidiliɛ gi kilɛ ní Ɔfuɛfuɛ nɔ mɛ kɛ kigba ɛkpɛ ɛ. 47Ɔnɔ tɔpu yɛ ɛ, sise bɛkɔ ɛ ʋɔ yɛ, lɛ ádɔ kesea mɛ ɛ; pɔ̀ ɔnɔ ʋla yɛ ádɔ ní lifunu ne e. 48Banama gi bali kesea aʋa ɛ, balɛ ŋwisi ɔniliɛ klɔ gi sise se bɛkɔ ɛ ʋɔ yɛ ɛ; lɛ banama gi bali ní lifunu ne e, ba kyɛ ba lɛ ŋwisi ɔniliɛ klɔ gi ádɔ ní lifunu ne e. 49Lɛ kiliɛ gi kulɛ abla ŋwisi ɔniliɛ gi ádɔ ní kesea aʋa ɛ, niteme ke kwitraze ŋwisi ɔniliɛ gi ádɔ ní lifunu ne e.
50Mɛ benemi ba a, liboe lɛ gi mɛɛpani linu si blɔ kesea aʋa ya kisugyaɛ ni ika lɛ ɛ, bítratani ɔŋakɔ kumɔ ní Aya yɛ kaʋaŋaa mɛ ɛ. Bidɔ gi bizeezizi i, bítratani ɔŋakɔ kumɔ ní bidɔ gi bitrázizi i me.
51Mlata kutu tɔ mido liboe kpokpo gi litu banima kugyɔ ɛ si mlɔ. Blɔ petee kutrátse e, pɔ̀ bɛtrákyi blɔ petee blɔ kilɛlɛɛ mɛ ɛ. 52Liaba lɛ mɛ ní lipoe kpekpe etɔ mɛ, kilɛ gi ɔnɔ aada yɛ bimbi ʋe ʋleʋleʋle e, xegi beme kakuklui gɔgɔa ɛ. Lɛ ese linu si xegi beme kakuklui ya ɛ, banama gi betse e, biayɔni ba gi batrátse tɔ ɔ. Lɛ blɔ banama gi kuli ligbã́ nɛ ɛ, biakyi blɔ kyɛ blɔ kizezee me. 53Lɛ ese linu si lilɛ si bekyi blɔ bisugyaɛ ʋɛ gi bizezizi i, lilɛ si bekyi ʋe tɔ bidzi bisugya gi bitrazizi liwewe e; blɔ kesea aʋa ya bisugya ʋɛ gi bizeetse e, lilɛ si bekyi ʋe tɔ bidzi bisugya gi bítratse liwewe e.
54Lɛ xegi blɔ bisugyaɛ ʋɛ gi bizeezizi i, xegi bekyi ʋe e, xe bidzi bisugya gi bitrázizi liwewe e, xe kisugyaɛ liɛ gi kizeetse e, xe kidzi kisugya gi kitrátse liwewe e, kɔ Aya yɛ liboe lɛ gi bɛŋwlimi plɛ ɛ, liba lɛ mɛ si:
“Bɛmlɔ kutseo ní kaʋaŋaa mɛ ɛ!”
55“Oo Kutse nifɔ wɔ kuʋaŋaa kulɛ ɛ?
Kutseo nifɔ wɔ ome no ɔlɛ ɛ?”
56Lɛ ese linu si kutseo kɔ ome no onu kuzimizi yo, lɛ kuzimizi yo kuzɛɛzi kɔ kigaglaɛ dɔni ɔsã nɔ klɔ ɔ. 57Pɔ̀ kwido Aya ɖase gi yɛ aki si kwiŋa aʋa gani blɔ Ɔkaɛ Yesu Kristo me e!
58Lɛ loso mɛ benemi lɔlɔ ba a, mlalɛɛ gaglaa tɔ mlakíki si kididɔ kihwani mlɔ ɔ. Mlakɔ mlɔ isu ya petee aki Ɔkaɛ yɛ axwɛ na lipoe kakaa, lɛ ese linu si mlete si mlɔ axwɛ na ní Ɔkaɛ mɛ ɛ, atráze efiteete e.
Currently Selected:
1 Korinto 15: avn
Highlight
Share
Copy
Want to have your highlights saved across all your devices? Sign up or sign in
© Ghana Institute of Linguistics, Literacy and Bible Translation, 2017 In cooperation with Wycliffe Bible Translators, Inc
