1 Korinto 14

Bidɔkɔkɔ ʋɛ ní Kuboedoplɛ ní siya ede ede na su

1Mleze ni kunɔlɔɔ kɔ kudeo kude, atɔ mlakpɛ ikũ̀ nɛ tɔ mleʋi Ɔfuɛfuɛ nɔ mɛ bidɔkɔkɔ ʋɛ, ŋwisi kuboedoplɛɔ kɔ bidɔkɔkɔ ʋɛ kinɛ ɛ. 2Lɛ ese linu si ɔniliɛ gi ɛɛpani siya dzedze se e, ɔ́ʋipani iiki banɔ ɔ, pɔ̀ ɛɛpani iiki Aya a. Ni anukwarɛɛ mɛ ɛ, ɔnɔnɔ ɔ́tranu liboe lɛ gi ɛɛpani i lɛ ese e, izɛɛpani eboe kpokpo ni yɛ Ɔfuɛfuɛ nɔ. 3Pɔ̀ ɔniliɛ gi eedo liboe plɛ ɛ, ɛɛpani iiki banima ki ba kigagla kukpɛkpɛ, sise kukpɛkpɛ ni ba ɔna kuyɔyɔ. 4Ɔniliɛ gi ɛɛpani siya dzedze se e, izɛkpɛ yɛ ɔtutɔ yɛ isu kigagla, pɔ̀ ɔniliɛ gi eedo liboe plɛ ɛ, ɛɛkpɛ ɔsɔli ha lɔ petee kigagla. 5Maapɛ si mlɔ pɔ́ mlapani ní siya ede ede me, pɔ̀ liaze mɛ ole sanɔ ɔ, xegi mlɔ pɔ́ mlado eboe plɛ ɛ. Lɛ ese linu si ɔniliɛ gi eedo eboe plɛ ɛ, emu asani ɔniliɛ gi ɛɛpani siya ede ede na ɛ, sani si eebu eboa la gi ɛɛpani i, ese ɛki ɔsɔli ha lɔ gi biaki ɔha lɔ aatsi i.

6Lɛ loso mɛ benemi ba, xe maba mlɔ klɔ ɔ, xe maba ɛpani siya ede ede na ɛki mlɔ ɛ, libi woli maabu ki mlɔ ɔ? Sani si maba ɛpani si mlɔ ní kubububasɛ, loo kuboete, loo kuboedoplɛ, loo isã itɔ su u, lɛ ko mlaanu mɛ ese e. 7Lɛ ni kudɔkpaa liɔ mɛ gi ligbã́ limá, ŋwisi ketee loo igbé ne ɔsangu no gi ole ɔlɛ ní bɛ awla kyɛ ɛ, xegi baʋíʋe no ní ɔsã onu i, kitɛ ɔnutɔ gi ɛɛta kutu yɔ ɛ, aabitɛ xe aatè odzi ɔnɔ gi beeʋe e. 8Lɛ xegi ɔniliɛ gi eeme kakuklui ya a, xe oʋíme ka a, xe ka mɛ kaʋídra ɛ, nyaŋwɛ aabla ɔki kigũ yɛ na a? 9Nite ke lilɛ ki mlɔ kyɛ, kitɛ ɔnutɔ aanu liboe lɛ klɔ gi wɔɛpani i, xegi wɔ siya sɛ mɛ silídra na a? Wɔazɔ pani kpɛ ní liwɔ lɛ mɛ. 10Siya ede ede alɛ ní kelea mɛ, pɔ̀ sitɔtɔ síma gi se ese kununu kúma a. 11Lɛ xegi ménu kuyaa klɔ gi ɔnutɔ ɛɛpani mɛ ɛ, ɔniliɛ klɔ ʋa gi ɛɛpani i, aadzi ɔbaba ɔki mɛ, lɛ mɛ fɛ maadzi ɔbaba ɔki yɛ ɛ. 12Nite lilɛ ki mlɔ kyɛ, xegi liʋítsɔ ɛki mlɔ si mlazi ɔfuɛfuɛ nɔ bidɔkɔkɔ ʋɛ ɛ, lilɛ si mlekeni edi tɔ mlabitɛ asanɔ ní bidɔkɔkɔɛ ʋɛ gi biakpɛ ɔha lɔ kigagla mɛ ɛ.

13Lɛ loso e, ɔniliɛ klɔ gi izɛɛpani siya sitɔ ɛ, ɔxwa Aya tɔ ɔki si aatani eboa la gi ɛɛpani i, ese kubu. 14Lɛ ese linu si xegi mɛɛxwa Aya ní siya ede ede na mɛ ɛ, mɛ Ɔfuɛfuɛ nɔ ɛɛxwa Aya. Mɛ begyodi ʋa kɔ ɛ, baʋíbu libí i tɔtɔ. 15Kɔlɔ ege kɛ maabitɛ ɛ? Maaxwa Aya ni mɛ Ɔfuɛfuɛ nɔ, pɔ̀ ɛ, maaxwa Aya ni mɛ begyodi ʋa kyɛ. Maaza idzi nɛ ni mɛ Ɔfuɛfuɛ nɔ, pɔ̀ maaza idzi nɛ ni mɛ begyodi ʋa kyɛ ɛ.

16Xegi wɔɛkpɔ̀ Aya ni wɔ Ɔfuɛfuɛ nɔ ɛ, kitɛ ɔnɔ gi ɔlɛ ní wɔ su u, pɔ̀ xe óʋinu wɔ liboe lɛ gi woedo ese e, kitɛ aado si liba lɛ mɛ ɛ?, xegi wɔedo Aya ɖase e gi ónu liboe le me e? 17Wɔanya zedo Aya ɖase gi lipɛ ɛ, pɔ̀ litrákpɛ ɔnɔ dzedze e, gi ɔlɛ ní wɔ su i, kigagla.

18Medo Aya ɖase si mizɛɛpani siya ede ede sani mlɔ petee. 19Pɔ̀ ní ɔha lɔ kusi i, maapɛ si mipani eboe tetsu gi banima bianu la ese e, tɔ mikɔ ɛbasɛ banima bidɔ, sani si tɔ mipani eboe akpe liɔfɔ ni siya dzedze mɛ.

20Mɛ benemi ba, mlakize ŋwisi banuvɔ ní mlɔ begyodi ʋa mɛ ɛ, mlaze ŋwisi banuvɔ ní eboe zimizi na mɛ baa, pɔ̀ mleze banɔtsitsi ni mlɔ begyodi ʋa mɛ ɛ. 21Bɛŋwlimi kpɛ ní ɔsã nɔ mɛ si,

“Gani banama gi bizɛɛpani siya ede ede na aʋa ɛ,

Lɛ gani bababa ba ba inugu le me e,

Maapani ki banɔaya ʋa,

pɔ̀ kyɛ ɛ, batráta mɛ liboe le kutu u.” Nite Ɔkaɛ apani i.

22Lɛ loso e, kupaniɔ ní siya ede ede na mɛ ɛ, bínu gyesi iiki baʋaziŋa ba a, boŋu i, binu gyesi iiki banama gi báziŋa ɛ; Lɛ kuboedoplɛ ɛ, kunu gyesi iiki baʋaziŋa ba lɛ aní ki banama gi báziŋa a. 23Lɛ xe ɔsɔli ha lɔ pɔ́ ɛtsa a, xe lɛ ɔnɔ kakaa ekpese kupani ní siya ede ede na mɛ ɛ, xe banɔatɔ gi bénu bɛ ese e, aloo xe banɔatɔ ɔ, gi báziŋa bɛ ba ɛ, bátraʋi si mlalɛ mumɔ abla na a? 24Pɔ̀ xe ɔnɔ kakaa eedo Aya liboe le eplɛ ɛ, xe ɔnɔ gi ɔ́zɛ ɔŋa loo ɔnɔ gi onu liboe le ese aba ɛ, lɛ mɛ liadra kí yɛ si yenu ɔnɔ zimizi i, lɛ eboa la petee gi enu i, aabasɛ yɛ si Aya aaxwa litsi ni yɛ ɛ. 25Lɛ yɛ begyodi kpokpo ʋa biado oŋwe no, lɛ aadɔ kesea gi aasumu Aya a, lɛ aadra lɛ mɛ si, “Anukwarɛ linu si Aya ɔlɛ ní mlɔ kusi!”

Kutrɔtrɔ ní Kusɔli yɔ mɛ

26Mɛ benemi ba, liboe woli kwiapani i? Xegi mlɛtsa si mleesumu i, ɔnɔ kakaa ɛɛpɛ si yibitɛ kiditɔ, ɔnutɔ aapɛ si yiza ɔdzi, loo aapɛ si yibasɛ bidɔ, loo aapɛ si yisi mlɔ kubububasɛ gi Aya ebu abasi yɛ ɛ, loo si yipani siya ede ede, loo yɛ aapɛ si yibu sɛ ese. Pɔ̀ kidɔ kakaa gi mlɛbitɛ ɛ, lilɛ si kikpɛ mlɔ baʋaziŋa ba pɔ́ kigagla.

27Xegi banɔatɔ bɛpɛ si bɛɛpani ní siya ede ede me e, mlaki tiaʋa xe bɛsanɔ ɛ, tiata tɔ bapani. Lɛ lilɛ si beegu kunugu yo tole, tole ní ba ahanuglɔ ba kede e, tɔ ɔnutɔ obu eboa la gi bɛpani i, ese. 28Pɔ̀ xe ɔnɔnɔ ɔ́ma a, gi aabu eboe la ese e, kɔlɔ ɔniliɛ klɔ gi ɛɛpani i, ɔdɔ zĩi ní kutsatsaa mɛ atɔ aapani kí yɛ isu ya nì Aya tètè.

29Mlaki tɔ beboedoplɛ tiaʋa loo tiata ba pani tɔ beboedoplɛ dzedze ba bazɛɛta liboe lɛ gi bɛɛpani edi i mɔmɔmɔ. 30Pɔ̀ xe ɔnutɔ ɛɛpani i, xe ɔnɔ dzedze gi odi kesea azɛ kubububasɛ adɔ ni Aya klɔ ɛ, lɛkɔ ɔnɔ tɔpu yɛ gi ɛɛpani i, lilɛ si ɔgɔ tsriɖi. 31Gani kude uliɔ ya onu i, mlɔ petee mlaapani Aya liboe le tole tole, lɛ mlɔ mɛ ɔkakaa aakpasi bidɔ ɔ, lɛ ɔna aaze yɛ lipo o. 32Banama gi bizɛɛpani Aya yɛ liboe le e, bɛmɔ kigagla ní ba ifuɛfuɛ nɛ aʋa, le loso e, biatani litɔ kuplɛ kese lɛ biapani i, xegi ba lipoe le lina ɛ. 33Lɛ ese linu si Aya ónu kumasɔmasɔ Aya a, pɔ̀ onu kusuyɔ Aya a.

Ŋwisi kiliɛ gi lilɛ ní Aya yɛ baʋaziŋa ba kutsatsa kakaa mɛ ɛ. 34Badzɛ ba bagɔ tsriɖi ní kutsatsaa mɛ. Kudeonu kúma si bapani i. Lilɛ si babùbɔ isu ya ŋwisi kiliɛ gi ɔsã nɔ ɛpani i. 35Xegi kuʋiʋi kutɔ kulɛ ní ba awla ɛ, beʋi ba benye ba ní ba kupeo me, lɛ ese linu si linu kuye si badzɛ ba bapani ní ɔsɔli ha lɔ batsátsa ʋa mɛ ɛ.

36Aloo kibu mlebu si Aya yɛ liboe le e, mlɔ Korintoanɛ ma aʋa likpese na? Aloo mlɔ tètè ko liboe le lina na a? 37Xe ɔnutɔ akɔ lɛ si ye nu Aya yɛ oboedoplɛ ɛ, aloo akɔ lɛ si Aya aki yɛ Ɔfuɛfuɛ nɔ mɛ bidɔkɔkɔ ɛ, kɔ lilɛ si ɔmɔ ogyesi si liboe lɛ gi mɛɛŋwlimi i, linu ɔsã dɔni Ɔkaɛ ɔtutɔ lɔ klɔ ɔ. 38Pɔ̀ xe ɔ́zɛ liboe lɛ ya ɛ, kɔlɔ mlɔ fɛ mlakíkɔ litɔ lɛ mɛ aki yɛ ɛ.

39Lɛ loso mɛ benemi ba a, mlapɛ ni mlɔ ina nɛ petee si mlapani Aya yɛ liboe le, lɛ mlakítsi kude ɔki banama gi bizɛpani siya ede ede na a. 40Mledi le aʋa si mlɛbitɛ kidɔ kakaa mumɔ ani ní kude gbã onu.

Currently Selected:

1 Korinto 14: avn

Highlight

Copy