1 Camwiri 21

Daudi olwi oko i baŋ Caulo

1 # Mat. 12.3-4; Mar. 2.25-26; Luk. 6.3 Daudi te wot tuno i Nob, baŋ Akimereki alamdog; Akimereki te bino me jolo Daudi kun kome amyel amyela, eka te penye ni, “Piŋo kara itye keni aboŋo ŋattoro?” 2Daudi te kobbi Akimeleki alamdog ni, “Tye kop ame abaka ocika iye kun kobba ni, ‘Myero ŋattoro kur ŋe kop ame acwayi iye-ni kede kop ame atyeko ciki iye.’ An atyeko cikere me rwatte kede awobe kannonyo. 3Kara aman ŋo ame tye i ciŋi i caa-ni? Mia ogati abic onyo ginnoro keken ame tye kan.” 4Alamdog te kobbi Daudi ni, “Ogati me nino ducu-ni, mom tye moro ame odoŋ i ciŋa i caa-ni, ogati acil keken en ame tye; ka ce awo benono mom obuto i mon.” 5Daudi te kobo ni, “Me ateni, mon kare ducu pokere kedwa oko ka ce wan owot kannoro; awobe gwoko komgi bedo acil, kadi bed wan otye i wot me kare ducu; kara mom tin doŋ komgi myero bed acil meicel?” 6#Olev. 24.5-9Mannono te miyo alamdog miye ogati acil; pien ogati moro ocele onwoŋo mom tye kuno, kono ka ogati me aketa i nyim Obaŋa keken, en ame didik okwanyo i nyim Rwot, me ote leyo kakare i en alyettere i nino ame okwanyo iye-nono.

7Dano moro onwoŋo tye kuno i nino-nono, ame en dano acel i akina omiro a Caulo, ame cikgi me kwer pwod diye me bedo i nyim Rwot; nyiŋe onwoŋo Doeg, ame en dano me Edom, adwoŋ ame loo okwat a Caulo.

8Daudi dok te kobbi Akimeleki ni, “Toŋŋoro onyo pala moro mom tye baŋi kan? Pien an mom akelo pala romona, naka jami me lwennya luŋ, pien tic abaka onwoŋo mitte me oyot.” 9#1 Cam. 17.51Alamdog te kobo ni, “Pala romo a Goliac, ame obedo dano me Piriciti a rik inek i luŋ me Ela ca, tye kan kun oboo kome oko kede bono, oketo i ne epod. En ennu, ka imito tero, teri; pien moro ocele doŋ mom, mannono keken en ame tye baŋa kan.” Daudi dok te kobo ni, “Moro acalli mannono doŋ mom tye; aco mia.”

10Daudi te ya i nino-nono, te lwi wot oko i baŋ Caulo, te wot baŋ Akic, rwot me Gat. 11#1 Cam. 18.7; 29.5Omiro Akic te kobbe ni, “Man mom Daudi ame obedo abaka me lobo-ni? Yam mom owere kun oleo werrere alea, omyelo kede ni,

‘Caulo neko mere jo tutumia,

aco Daudi oneko mere jo tutumia apar.’ ”

12 # Jab. 56 Daudi rik te kano kopgi-nono i cunye, eka te bedo i twon lworo adwoŋ meicel i kom Akic abaka me Gat. 13#Jab. 34 Lworo te miye loko kite mere oko i nyimgi, te doko ababaŋ acalo apoa i ciŋgi, te bedo cicio kika me dogcel, kun lao doge tye amol i tike. 14Akic te kobbi omiro mere ni, “Koŋ inen wunu ba, wun ityeko neno wunu ni dano man gire opo oko; kara omio dok ikele wunu baŋa kono? 15Pien jo opo mom baŋa bo, en omio wun ikelo wunu man ni bin nyut apoa mere i nyima? En dano-ni daŋ bino donyo naka i oda?”

Currently Selected:

1 Camwiri 21: Lango

Highlight

Copy

Compare