Tơlơi Bơrơđah 8

Mơnơ̆ng Kơđŏm Tal Tơjuh

1Tơdang Ană Triu yaih mơnơ̆ng kơđŏm tal tơjuh, amăng adai hmâo tơlơi rơiăt amăng ha mơkrah mông. 2Laih anŭn kâo ƀuh tơjuh čô ling jang dŏ dơ̆ng ƀơi anăp Ơi Adai, laih anŭn arăng brơi ƀing gơñu tơjuh ƀĕ tơdiăp.

3 # Amôs 9:1; Tơb 30:1,3. Hmâo sa čô ling jang pơkŏn dŏ dơ̆ng ƀơi anăp kơƀang ngă yang djă get mơnơ̆ng ƀâu mơngưi ngă hăng mah. Arăng hmâo brơi laih kơ ñu lu mơnơ̆ng ƀâu mơngưi kiăng pơyơr hrŏm hơbĭt hăng tơlơi iâu laĭ abih bang ƀing rơgoh hiam ƀơi hăng ngŏ kơnưl mah ƀơi anăp gre pơtao. 4Asăp mơnơ̆ng ƀâu mơngưi mơ̆ng tơngan ling jang hrŏm hơbĭt hăng tơlơi iâu laĭ ƀing rơgoh hiam pơr đĭ nao pơ anăp Ơi Adai. 5#Lêwi 16:12; Êsê 10:2; Tơb 19:16; Bơrđ 11:19; 16:18.Laih anŭn ling jang mă get mơnơ̆ng ƀâu mơngưi, mă apui mơ̆ng kơƀang ngă yang pioh pơbă get anŭn, laih anŭn glŏm trŭn ƀơi lŏn tơnah. Hmâo khul dơnai grơ̆m, dơnai pơhiăp, khul kơmlă laih anŭn tơlơi pơpư̆ lŏn tơnah.

Tơjuh Ƀĕ Tơdiăp Tơki

6Tơdơi kơ anŭn, tơjuh čô ling jang djă tơjuh tơdiăp prăp pre ayŭp.

7 # Tơb 9:23-25; Êsê 38:22. Ling jang tal sa ayŭp tơdiăp, tui anŭn hmâo hơjan pler hăng apui pơlŭk hăng drah lĕ trŭn pơ lŏn tơnah. Apui ƀơ̆ng sa črăn amăng klâo črăn lŏn tơnah, sa črăn amăng klâo črăn kơyâo pơtâo, laih anŭn abih bang rơ̆k mơtah apui ƀơ̆ng hĭ.

8Ling jang tal dua ayŭp tơdiăp, laih anŭn hmâo mơnơ̆ng hrup hăng sa boh čư̆ prŏng apui dŏ ƀơ̆ng arăng glŏm trŭn amăng ia rơsĭ. Sa črăn amăng klâo črăn ia rơsĭ jing hĭ drah, 9sa črăn amăng klâo črăn mơnơ̆ng hơdip amăng ia rơsĭ djai hĭ, laih anŭn sa črăn amăng klâo črăn kompăn răm rai hĭ.

10 # Êsai 14:12. Ling jang tal klâo ayŭp tơdiăp, laih anŭn sa boh pơtŭ prŏng apui ƀơ̆ng jă kar hăng sa ƀĕ apui arok lĕ trŭn mơ̆ng adai. Boh pơtŭ anŭn lĕ trŭn ƀơi sa črăn amăng klâo črăn khul ia krong laih anŭn khul akŏ ia. 11#Yêr 9:15.Anăn pơtŭ anŭn “Kơyâo phĭ”. Sa črăn amăng klâo črăn ia jing hĭ phĭ, laih anŭn lu mơnuih djai yua kơ ia anai, yua kơ ñu jing phĭ hĭ laih.

12 # Êsai 13:10; Êsê 32:7; Yôel 2:10,31; 3:15. Ling jang tal pă ayŭp tơdiăp, laih anŭn sa črăn amăng klâo črăn yang hrơi, sa črăn amăng klâo črăn yang blan, laih anŭn sa črăn amăng klâo črăn khul pơtŭ pơjrơ̆m kơtang tơl sa črăn amăng klâo črăn tơlơi bơngač gơñu jing hĭ mơmŏt, ngă brơi sa črăn amăng klâo črăn tơhrơi rơngiă hĭ tơlơi bơngač, laih anŭn mlam ăt kar kaĭ mơ̆n.

13Kâo lăng laih anŭn hmư̆ sa drơi čĭm klang tơdang ñu pơr tơ̆ng krah adai, ur kraih tui anai: “Răm ƀăm yơh! Răm ƀăm yơh! Răm ƀăm yơh kơ ƀing mơnuih dŏ ƀơi lŏn tơnah tơdang asăp tơdiăp klâo čô ling jang pơkŏn giăm či ayŭp dơ̆ng!”

Currently Selected:

Tơlơi Bơrơđah 8: JRA2016

Highlight

Copy

Compare