Tơlơi Bơrơđah 6

Năm Mơnơ̆ng Kơđŏm Blŭng Hlâo

1Kâo ƀuh tơdang Ană Triu pŏk mơnơ̆ng kơđŏm tal sa amăng tơjuh mơnơ̆ng kơđŏm, laih anŭn kâo hmư̆ sa amăng pă drơi hlô mơnơ̆ng hơdip laĭ kraih kar hăng dơnai grơ̆m: “Rai bĕ!” 2#Sak 1:8; 6:3,6.Kâo lăng, anai nê hmâo sa drơi aseh kŏ. Pô đĭ aseh anŭn djă sa ƀĕ hraŏ, laih anŭn arăng brơi kơ ñu sa boh mŭk pơtao. Ñu đuaĭ nao kar hăng sa čô mơnuih pơblah dưi laih anŭn pơpă ñu nao pơ anŭn ñu dưi.

3Tơdang Ană Triu pŏk mơnơ̆ng kơđŏm tal dua, kâo hmư̆ hlô mơnơ̆ng hơdip tal dua laĭ tui anai: “Rai bĕ!” 4#Sak 1:8; 6:2.Laih anŭn sa drơi aseh pơkŏn, mriah hêm tơbiă rai. Pô đĭ aseh anŭn hmâo tơlơi dưi mă lui hĭ tơlơi rơnŭk rơnua mơ̆ng lŏn tơnah, kiăng kơ ƀing mơnuih pơdjai tơdruă gơñu; laih anŭn arăng ăt brơi kơ ñu sa ƀĕ đao prŏng.

5 # Sak 6:2,6. Tơdang Ană Triu pŏk mơnơ̆ng kơđŏm tal klâo, kâo hmư̆ hlô mơnơ̆ng hơdip tal klâo laĭ: “Rai bĕ!” Kâo lăng, anai nê hmâo sa drơi aseh jŭ. Pô đĭ aseh anŭn amăng tơngan ñu djă boh kơnăng. 6Laih anŭn kâo hmư̆ kar hăng sa asăp tơ̆ng krah pă drơi hlô mơnơ̆ng hơdip laĭ: “Sa ƀuat pơdai tơpŭng mơdôm sa đơniê,#6:6 Sa đơniê: nua apah kơ sa hrơi mă bruă. laih anŭn klâo ƀuat pơdai ôrgơ mơdôm sa đơniê, samơ̆ anăm ngă răm ôh kơ ia ôliwơ laih anŭn ia tơpai!”

7Tơdang Ană Triu pŏk mơnơ̆ng kơđŏm tal pă, kâo hmư̆ asăp hlô mơnơ̆ng hơdip tal pă laĭ: “Rai bĕ!” 8#Êsê 14:21.Kâo lăng, anai nê hmâo sa drơi aseh ƀhul. Anăn pô đĭ aseh anŭn jing Tơlơi Djai, laih anŭn plei Ƀing Djai#6:8 Hades: Plei ƀing djai (lăng 1:18). tui klon ñu. Gơñu hmâo tơlơi dưi ƀơi sa črăn amăng pă črăn lŏn tơnah, kiăng pơdjai hăng đao, hăng tơlơi ư̆ rơpa, hăng tơlơi ruă klin, laih anŭn hăng khul hlô glai hơtai ƀơi lŏn tơnah.

9Tơdang Ană Triu pŏk mơnơ̆ng kơđŏm tal rơma, kâo ƀuh gah yŭ kơƀang ngă yang hmâo bơngăt ƀing arăng pơdjai laih yua kơ boh pơhiăp Ơi Adai laih anŭn yua kơ tơlơi gơñu ngă gơ̆ng jơlan. 10Gơñu ur kraih tui anai: “Ơ Khua Yang jing Pô rơgoh hiam laih anŭn sĭt, hơdôm sui dơ̆ng Ih či phat kơđi, laih anŭn rŭ nua kơ ƀing dŏ ƀơi lŏn tơnah yua kơ drah ƀing gơmơi?” 11Arăng brơi kơ rĭm čô gơñu sa blah ao phyung kŏ, laih anŭn arăng pơtă gơñu khŏm pơdơi sui ƀiă dơ̆ng, tơl mrô ƀing mă bruă hrŏm hơbĭt hăng gơñu tum laih, laih anŭn ƀing adơi ayŏng gơñu khŏm tŭ tơlơi djai kar hăng gơñu tŭ laih.

12 # Bơrđ 11:13; 16:18; Êsai 13:10; Yôel 2:10,31; 3:15; Mat 24:29; Mar 13:24,25; Luk 21:25. Tơdang Ană Triu pŏk mơnơ̆ng kơđŏm tal năm, kâo ƀuh tơlơi pơpư̆ lŏn tơnah kơtang kơtĭt; yang hrơi jing hĭ kơnăm kar hăng bơnal jŭ, yang blan jing hĭ mriah kar hăng drah, 13#Êsai 34:4.khul pơtŭ amăng adai lĕ trŭn ƀơi lŏn tơnah kar hăng khul boh hra mơtah ruh trŭn mơ̆ng phŭn hra hlăk angĭn kơtang. 14#Bơrđ 16:20.Adai rơngiă hĭ kar hăng čơkul hră klĭ lom glaĭ, abih bang khul čư̆, abih bang khul plao ia leng kơ tơglưh đuaĭ mơ̆ng anih gơñu. 15#Êsai 2:19,21.Laih anŭn ƀing pơtao ƀơi lŏn tơnah, ƀing khua prŏng, ƀing khua tơhan, ƀing pơdrŏng, ƀing hmâo tơlơi dưi, abih bang ƀing hlŭn laih anŭn ƀing rơngai leng kơ đuaĭ kơdŏp amăng par laih anŭn amăng anih boh pơtâo ƀơi čư̆. 16#Ôsê 10:8; Luk 23:30.Gơñu laĭ hăng čư̆ laih anŭn khul boh pơtâo tui anai: “Lĕ trŭn bĕ ƀơi gơmơi laih anŭn pơdŏp gơmơi mơ̆ng ƀô̆ mơta Pô dŏ ber ƀơi gre pơtao laih anŭn mơ̆ng tơlơi Ană Triu hil. 17#Yôel 2:11; Mal 3:2.Yua kơ hrơi ƀing Gơñu hil kơtang truh laih, laih anŭn hlơi dưi dŏ dơ̆ng?”

Currently Selected:

Tơlơi Bơrơđah 6: JRA2016

Highlight

Copy

Compare