Tơlơi Bơrơđah 3

Hră Mơit Kơ Phung Sang Ơi Adai Sardis

1“Čih bĕ kơ ling jang Phung Sang Ơi Adai Sardis tui anai: ‘Anai jing boh pơhiăp Pô hmâo tơjuh Yang Bơngăt Ơi Adai, laih anŭn tơjuh boh pơtŭ: “Kâo thâo khul bruă ih; ih hmâo anăn jing hơdip, samơ̆ biă mă ih djai laih. 2Tui anŭn, dŏ răng bĕ laih anŭn ngă pơkơjăp hơgĕt tơlơi dŏ glaĭ, jing khul tơlơi giăm djai, yua kơ Kâo ƀu ƀuh ôh khul bruă ih jing klă tum ƀơi anăp Ơi Adai Kâo. 3#Mat 24:43,44; Luk 12:39,40; Bơrđ 16:15.Tui anŭn brơi ih hơdơr glaĭ bĕ hyư̆m ih hmâo mă tŭ laih anŭn hmư̆; brơi ih djă pioh laih anŭn kơhmal bĕ. Tơdah ih ƀu dŏ mơdưh ôh, Kâo či rai kar hăng mơnuih klĕ, laih anŭn ih ƀu thâo ôh hrơi mông pă Kâo či rai. 4Samơ̆ pơ plei Sardis ih ăt hmâo đơđa mơnuih aka pơgrĭ ao gơñu ôh; ƀing gơñu či buh ao kŏ rơbat hrŏm hơbĭt hăng kâo, yua kơ ƀing gơñu năng lăp biă mă. 5#Tơb 32:32,33; Adoh 69:28; Bơrđ 20:12; Mat 10:32; Luk 12:8.Hlơi pô dưi, ñu či buh ao kŏ kar hăng anŭn, laih anŭn Kâo ƀu či sut hĭ ôh anăn ñu mơ̆ng hơdrôm hră tơlơi hơdip; laih anŭn Kâo či pơhaih anăn ñu ƀơi anăp Ama Kâo laih anŭn ƀơi ƀing ling jang Ñu.”

6Hlơi pô hmâo tơngia, brơi ñu hmư̆ bĕ tơlơi Yang Bơngăt Hiam laĭ kơ Phung Sang Ơi Adai.’”

Hră Mơit Kơ Phung Sang Ơi Adai Philadelphi

7 # Êsai 22:22; Jôp 12:14. “Čih bĕ kơ ling jang Phung Sang Ơi Adai Philadelphi tui anai: ‘Anai jing boh pơhiăp Pô Rơgoh Hiam laih anŭn Sĭt tơpă, Pô hmâo kơmla kăl Đawit; Ñu pŏk ƀu hmâo hlơi dưi krư̆, Ñu krư̆ ƀu hmâo hlơi dưi pŏk ôh: 8“Kâo thâo khul bruă ih. Anai nê, kâo hmâo pŏk laih ƀơi anăp ih sa boh bah amăng, ƀu hmâo hlơi pô dưi krư̆ hĭ ôh. Kâo thâo ih hmâo kơnơ̆ng ƀiă tơlơi kơtang, samơ̆ ăt djă pioh tơlơi kâo pơhiăp, laih anŭn ƀu hơngah anăn kâo ôh. 9#Êsai 49:23; 60:14; Êsai 43:4.Kâo pha brơi kơ ih ƀing lơ̆m kơ Satan, ƀing laĭ gơñu pô jing ƀing Yuđa samơ̆ ƀu djơ̆ ôh, gơñu ƀlor đôč. Kâo či ngă brơi ƀing gơñu rai bon kơkuh ƀơi tơkai ih laih anŭn ƀing gơñu či thâo Kâo hmâo khăp kơ ih. 10Yua kơ ih hmâo gir djă pioh boh pơhiăp Kâo laih, hnŭn yơh Kâo ăt či pơgang ih klaih mơ̆ng mông tơlơi lông lăng, jing mông či truh tar ƀar lŏn tơnah, kiăng lông lăng ƀing mơnuih dŏ ƀơi lŏn tơnah. 11Kâo či rai tañ. Djă pioh kơjăp bĕ hơgĕt tơlơi ih hlăk dŏ hmâo, kiăng kơ arăng ƀu sua mă hĭ ôh mŭk pơtao ih. 12#Bơrđ 21:2; Êsai 62:2; 65:15.Hlơi pô dưi, Kâo či pơjing ñu tơmeh amăng sang kơkuh pơpŭ Ơi Adai Kâo, ñu ƀu či tơbiă mơ̆ng anŭn ôh. Kâo či čih ƀơi ñu anăn Ơi Adai Kâo, laih anŭn anăn plei Ơi Adai Kâo, jing Yêrusalem phrâo pơ adai, trŭn rai mơ̆ng Ơi Adai, laih anŭn čih anăn phrâo Kâo.” 13Hlơi pô hmâo tơngia, brơi ñu hmư̆ bĕ tơlơi Yang Bơngăt Hiam laĭ kơ Phung Sang Ơi Adai.’”

Hră Mơit Kơ Phung Sang Ơi Adai Laôdisê

14 # Bơrt 8:22. “Čih bĕ kơ ling jang Phung Sang Ơi Adai Laôdisê tui anai: ‘Anai jing boh pơhiăp mơ̆ng Pô Amen, Pô ngă gơ̆ng jơlan hơnơ̆ng ten laih anŭn sĭt, Pô phŭn#3:14 phŭn; ƀôdah gĭt gai. kơ tơlơi Ơi Adai hrih pơjing. 15“Kâo thâo bruă ih; ih ƀu rơŏt kŏn pơ-iă lơi, Kâo kiăng kơ ih rơŏt sĭt ƀôdah pơ-iă sĭt. 16Tui anŭn, yua kơ ih pơđao hơhor đôč, ƀu rơŏt kŏn pơ-iă lơi, anŭn yơh Kâo či ĕk lui ih mơ̆ng amăng bah Kâo. 17Yua kơ ih laĭ: Kâo pơdrŏng, kâo đĭ kơyar laih, kâo ƀu kiăng hơgĕt dơ̆ng ôh. Samơ̆ ih ƀu thâo ôh ih hlăk tơnap tap, pap mơñai đơi, ƀun rin, bum mơta laih anŭn mơhlŭn. 18Tui anŭn, Kâo pơđur ih blơi bĕ mơ̆ng Kâo mah arăng hmâo pơrơgoh laih hăng apui, kiăng kơ ih dưi jing pơdrŏng; blơi mă khul ao kŏ laih anŭn buh kiăng kơ gom hĭ tơlơi mlâo kơ tơlơi mơhlŭn ih, laih anŭn blơi ia jrao pik mơta ih kiăng kơ ih dưi ƀuh. 19#Bơrt 3:12; Hêb 12:6.Ƀing mơnuih Kâo khăp, Kâo ƀuah laih anŭn pơkra pơjuăt; tui anŭn brơi ih hur har laih anŭn kơhmal bĕ. 20Anai nê, Kâo dŏ dơ̆ng ƀơi bah amăng laih anŭn khŏk, tơdah hlơi pô hmư̆ asăp Kâo laih anŭn pŏk bah amăng, Kâo či mŭt amăng sang ñu, ƀơ̆ng huă hrŏm hơbĭt hăng ñu, laih anŭn ñu hrŏm hơbĭt hăng Kâo. 21Hlơi pô dưi, Kâo či brơi ñu dŏ ber hrŏm hơbĭt hăng Kâo ƀơi gre pơtao Kâo, kar hăng Kâo pô dưi laih, laih anŭn dŏ ber laih hrŏm hơbĭt hăng Ama Kâo ƀơi gre pơtao Ñu.” 22Hlơi pô hmâo tơngia, brơi ñu hmư̆ bĕ tơlơi Yang Bơngăt Hiam laĭ kơ Phung Sang Ơi Adai.’”

Currently Selected:

Tơlơi Bơrơđah 3: JRA2016

Highlight

Copy

Compare