Tơlơi Bơrơđah 22
22
Mơyun Hiam Kơ Ƀing Mơnuih Ơi Adai Ruah Mă
1 #
Êsê 47:1; Sak 14:8. Ling jang kơčrâo brơi kâo ƀuh ia krong tơlơi hơdip, bơngač jơngeh hrup hăng mơnĭl, tơbiă ro mơ̆ng gre pơtao Ơi Adai laih anŭn Ană Triu, 2#Čơd 2:9.ro tơ̆ng krah jơlan plei anŭn; Ƀơi dua gah hang ia krong anŭn hmâo phŭn kơyâo tơlơi hơdip, ñu mơboh pluh dua wơ̆t amăng sa thŭn, rĭm blan ñu mơboh sa wơ̆t, laih anŭn hla ñu arăng yua kiăng pơsuaih ƀing djuai mơnuih. 3#Sak 14:11; Čơd 3:17.Amăng plei anŭn ƀu či hmâo tơlơi hơtơ̆m pah dơ̆ng ôh, samơ̆ gre pơtao Ơi Adai laih anŭn Ană Triu či dŏ amăng plei anŭn. Ƀing ding kơna Ñu či buih bruă kơ Ñu; 4Ƀing gơñu či ƀuh ƀô̆ mơta Ñu, laih anŭn anăn Ñu či dŏ ƀơi athơi ƀing gơñu. 5#Êsai 60:19; Đaniel 7:18.Mlam ƀu či hmâo dơ̆ng ôh, ƀing gơñu ƀu kiăng kơ tơlơi bơngač kơ apui kơđen ƀôdah yang hrơi dơ̆ng ôh, yua kơ Khua Yang jing Ơi Adai či pơčrang bơngač kơ ƀing gơñu. Laih anŭn ƀing gơñu či wai lăng hlŏng lar.
Yêsu Či Trŭn Rai Dơ̆ng
6Giơ̆ng anŭn ling jang laĭ kơ kâo: “Boh pơhiăp anŭn năng lăp đaŏ kơnang laih anŭn tơpă sĭt. Khua Yang jing Ơi Adai kơ bơngăt ƀing pô laĭ lui hlâo, hmâo pơkiaŏ nao laih ling jang Ñu kiăng bơrơđah brơi kơ ƀing ding kơna Ñu khul tơlơi giăm khŏm truh.
7Anai nê, Kâo rai tañ. Mơyun hiam yơh kơ hlơi gưt tui khul boh pơhiăp laĭ lui hlâo amăng sŏp hră anai!”
8Kâo jing Yôhan, pô hmâo hmư̆ laih, laih anŭn hmâo ƀuh laih tơlơi anŭn. Giơ̆ng kâo hmư̆ laih anŭn ƀuh, kâo bon kơkuh pơpŭ ƀơi tơkai ling jang, pô hmâo bơrơđah laih khul tơlơi anŭn kơ kâo. 9Samơ̆ ñu laĭ kơ kâo: “Anăm ngă tui anŭn ôh! Kâo jing pô mă bruă hrŏm hơbĭt hăng ih, laih anŭn hăng ƀing adơi ayŏng ih jing ƀing pô laĭ lui hlâo, laih anŭn hrŏm hơbĭt hăng ƀing gưt tui boh pơhiăp amăng sŏp hră anai. Kơkuh pơpŭ bĕ kơ Ơi Adai.”
10Giơ̆ng anŭn ñu laĭ kơ kâo: “Anăm kơđŏm hĭ ôh khul boh pơhiăp laĭ lui hlâo amăng sŏp hră anai, yua kơ mông giăm truh yơh. 11#Đaniel 12:10.Hlơi pô ƀu tơpă ăt ngă nanao tơlơi ƀu tơpă; hlơi pô hơƀak drak ăt ngă tơlơi hơƀak drak nanao; hlơi pô jing tơpă ăt ngă tơlơi tơpă nanao; hlơi pô hơdip rơgoh hiam ăt hơdip rơgoh hiam nanao.”
12 #
Êsai 40:10; 62:11; Adoh 28:4; Yêr 17:10. “Anai nê, Kâo rai tañ, djă ba gơnam apah bơni hrŏm hơbĭt hăng Kâo, kiăng apah bơni kơ rĭm čô tui hăng bruă gơñu hmâo ngă laih. 13#Bơrđ 1:8,17; 2:8; Êsai 44:6; 48:12.Kâo jing Alpha laih anŭn Ômêga, Pô blŭng hlâo laih anŭn đŭt tơdơi, jing Čơdơ̆ng Phŭn laih anŭn Hnal Tuč.”
14 #
Čơd 2:9; 3:22. Mơyun hiam yơh kơ ƀing mơnuih boh ao phyung gơñu, kiăng kơ hmâo tơlơi dưi ƀơ̆ng boh kơyâo mơ̆ng phŭn kơyâo tơlơi hơdip, laih anŭn dưi mŭt amăng plei găn mơ̆ng khul amăng jang. 15Khul ƀing asâo, ƀing mơnuih ngă pơjâu, ƀing rih răm, ƀing pơdjai mơnuih, ƀing kơkuh kơ rup trah, wơ̆t ƀing khăp laih anŭn ngă tơlơi pleč ƀlor, leng kơ dŏ gah rơngiao plei.
16 #
Êsai 11:1,10. “Kâo jing Yêsu, hmâo pơkiaŏ nao laih ling jang Kâo kiăng ră pơthâo khul tơlơi anai kơ ƀing gih amăng phung sang Ơi Adai. Kâo jing Phŭn Akha laih anŭn Ană Tơčo Đawit, Pơtŭ Sêng mơguah.”
17 #
Êsai 55:1. Yang Bơngăt Hiam laih anŭn Dra Pơkô̆ hrŏm hơbĭt laĭ: “Rai bĕ!” Laih anŭn brơi abih bang hlơi pô hmư̆ laĭ: “Rai bĕ!” Hlơi pô mơhao, brơi ñu rai bĕ! Hlơi pô kiăng, brơi ñu mă tŭ bĕ đôč đač ia tơlơi hơdip. 18#Mơñă 4:2; 12:32.Kâo pơhiăp pơsĭt hăng abih bang hlơi pô hmư̆ boh pơhiăp laĭ lui hlâo amăng sŏp hră anai: Tơdah hlơi thim tơlơi hơgĕt dơ̆ng amăng khul tơlơi anai, Ơi Adai či thim brơi kơ gơñu khul tơlơi răm ruă hmâo čih laih amăng sŏp hră anai. 19Laih anŭn tơdah hlơi pơhrŏ hĭ khul boh pơhiăp amăng sŏp hră tơlơi laĭ lui hlâo anai, Ơi Adai či mă hĭ črăn ñu dưi hmâo kơ phŭn kơyâo tơlơi hơdip, laih anŭn tơlơi ñu dưi mŭt amăng plei rơgoh hiam, hmâo čih laih amăng sŏp hră anai.
20Pô ngă gơ̆ng jơlan brơi kơ khul tơlơi anai laĭ: “Sĭt biă mă, Kâo rai tañ.” Amen. Rai bĕ, Ơ Khua Yang Yêsu!
21Rơkâo tơlơi pap mơ̆ng Khua Yang Yêsu dŏ hrŏm hơbĭt hăng abih bang phung rơgoh hiam. Amen.
Currently Selected:
Tơlơi Bơrơđah 22: JRA2016
Highlight
Copy
Compare
Share
Want to have your highlights saved across all your devices? Sign up or sign in
© 2016 United Bible Societies. All rights reserved.
