Tơlơi Yap 20
20
HʼMiriam djai
1Amăng blan sa, abih bang ană plei pla Israel truh pơ tơdrŏn har Sin laih anŭn jưh pơ Kadês. HʼMiriam djai laih anŭn arăng dơr ñu ƀơi anŭn.
Ia Tơbiă Mơ̆ng Boh Pơtâo
(Tơb 17:1-7)
2Hlăk anŭn, ƀu hmâo ôh ia brơi kơ ană plei pla mơñum, tui anŭn gơñu pơƀŭt glaĭ kiăng pơkơdơ̆ng hăng Môis laih anŭn Arôn.#Tơb 17:1-7. 3Ƀing gơñu pơkơdơ̆ng hăng Môis laih anŭn laĭ tui anai: “Ayŏng adơi ƀing gơmơi hmâo djai ƀơi anăp Yêhôwa; hiam hloh ƀing gơmơi ăt djai hrŏm hăng ƀing gơñu đôč! 4Yua hơgĕt ih ba ană plei pla Yêhôwa nao pơ tơdrŏn har anai, kiăng ƀing gơmơi laih anŭn hlô mơnơ̆ng ƀing gơmơi rong djai hĭ pơ anai hă? 5Yua hơgĕt ih ba ƀing gơmơi đuaĭ hĭ mơ̆ng čar Êjip laih anŭn ba gơmơi rai pơ anih sat răm anai, jing anih arăng ƀu thâo sai pơjeh ôh, ăt ƀu thâo pla lơi phŭn hra, phŭn boh kơƀâu, phŭn pom granat laih anŭn kŏn hmâo lơi mơ̆n ia mơñum?”
6Môis hăng Arôn tơbiă đuaĭ mơ̆ng ană plei pla, nao gah anăp bah amăng Sang Khăn Pơƀŭt hăng bon kŭp ƀơi lŏn. Tơlơi ang yang Yêhôwa pơrơđah rai hăng dua gơñu. 7Yêhôwa laĭ kơ Môis: 8“Djă bĕ gai jra, ih hăng ayŏng ih Arôn pơƀŭt glaĭ ană plei pla. Pơđar bĕ kơ boh pơtâo ƀơi anăp ană plei pla, tui anŭn boh pơtâo či tơbiă ia yơh. Ih či ngă ia tơbiă rai mơ̆ng boh pơtâo brơi kơ ană plei pla hăng hlô mơnơ̆ng gơñu rong dưi mơñum.”
9Tui anŭn, Môis djă gai jra ƀơi anăp Yêhôwa kar hăng Ñu hmâo pơtă laih. 10Môis hăng Arôn pơƀŭt glaĭ ană plei pla ƀơi anăp boh pơtâo anŭn hăng laĭ: “Ơ ƀing ană plei pla pơkơdơ̆ng ah, hmư̆ bĕ! Dưi mơ̆ ƀing gơmơi či ngă ia tơbiă rai mơ̆ng boh pơtâo anai brơi kơ ƀing gih?” 11Tơngan Môis djă gai jra yơr đĭ hăng taih ƀơi boh pơtâo dua wơ̆t. Ia tơbiă rai mơtam; abih bang ană plei pla hăng hlô mơnơ̆ng gơñu rong hrŏm hơbĭt mơñum ia.
12Samơ̆ Yêhôwa laĭ kơ Môis hăng Arôn: “Yua kơ ƀing gih ƀu đaŏ kơ Kâo ôh, kiăng pơrơđah tơlơi rơgoh hiam Kâo ƀơi anăp ană plei pla Israel, anŭn yơh ƀing gih ƀu dưi ba ană plei pla anai mŭt amăng lŏn Kâo hmâo pha brơi laih kơ gơñu.” 13Ia mơñum anŭn arăng pơanăn ia mơñum Mêriba,#20:13 Mêriba: Amăng tơlơi Hêbrơ, boh hră anai kiăng pia jing “ngă tơhnal”. jing anih ană plei pla Israel hmâo pơkơdơ̆ng glaĭ hăng Yêhôwa laih anŭn jing anih Yêhôwa pơrơđah Ñu pô jing rơgoh hiam ƀơi anăp gơñu.
Pơtao Êđôm ƀu brơi ƀing Israel rơbat găn čar gơñu
14Mơ̆ng Kadês, Môis pơkiaŏ nao ƀing mơnuih nao bưp pơtao Êđôm, laĭ tui anai: “Israel jing adơi ih hmâo laĭ: Ih thâo hơdôm tơlơi tơnap tap hmâo truh kơ ƀing gơmơi 15laih anŭn bruă ơi adon ƀing gơmơi trŭn nao pơ čar Êjip. Ƀing gơmơi hmâo hơdip pơ anŭn lu thŭn; ƀing Êjip hmâo kơtư̆ juă ƀing gơmơi hăng ơi adon gơmơi. 16Ƀing gơmơi kơwưh rơkâo Yêhôwa; Ñu hmư̆ asăp iâu kơwưh ƀing gơmơi hăng pơkiaŏ ling jang Ñu ba ƀing gơmơi đuaĭ mơ̆ng čar Êjip. Ră anai, ƀing gơmơi hơdip ƀơi Kadês jing plei hmâo guai hăng lŏn ih. 17Rơkâo ih brơi ƀing gơmơi găn nao amăng čar ih. Ƀing gơmơi ƀu či nao găn ôh đang hmua ƀôdah đang boh kơƀâu ih, laih anŭn ƀing gơmơi ăt ƀu či mơñum ia dơmun ih lơi. Ƀing gơmơi či rơbat tui jơlan prŏng pơtao, gơmơi ƀu weh gah hơnuă ƀôdah gah iao ôh, tơl gơmơi găn hloh hĭ guai lŏn ih anai.”
18Samơ̆ pơtao Êđôm laĭ glaĭ: “Ƀing gih ƀu dưi găn ôh lŏn kâo anai; tơdah ƀing gih găn nao, kâo či mă đao gưm kơsung blah ƀing gih yơh.” 19Ƀing Israel laĭ glaĭ: “Ƀing gơmơi rơbat tui jơlan phŭn, laih anŭn tơdah ƀing gơmơi hăng khul hlô mơnơ̆ng ƀing gơmơi hmâo mơñum ia ih, ƀing gơmơi či kla prăk kơ ih. Kơnơ̆ng rơkâo kơ ih brơi ƀing gơmơi rơbat găn nao đôč, ƀing gơmơi ƀu hmâo ngă tơlơi hơgĕt gĕt ôh.” 20Samơ̆ pơtao Êđôm laĭ: “Ƀing gih ƀu dưi rơbat găn nao ôh!” Giơ̆ng anŭn ƀing Êđôm ba nao sa khul tơhan khĭn kơtang nao čơgăn ană plei pla Israel. 21Tui anŭn, Êđôm ƀu brơi ƀing Israel rơbat găn lŏn ñu ôh, hnŭn yơh ƀing Israel weh đuaĭ ataih mơ̆ng gơñu.
Arôn Djai
22Abih bang ană plei pla Israel rơbat mơ̆ng Kadês truh pơ čư̆ Hor. 23Yêhôwa laĭ kơ Môis hăng Arôn ƀơi čư̆ Hor, jĕ guai Êđôm tui anai: 24“Arôn či glaĭ pơ ơi adon ñu pô; ñu ƀu dưi mŭt ôh pơ anih Kâo hmâo pha brơi laih kơ ană plei pla Israel yua kơ ƀing gih hmâo pơkơdơ̆ng laih anŭn ƀu gưt boh hiăp Kâo pơ ia Mêriba. 25Ba nao bĕ Arôn hăng Êlêasar ană đah rơkơi ñu đĭ nao pơ čư̆ Hor, 26toh hĭ sum ao Arôn hăng buh brơi bĕ ană ñu Êlêasar. Ƀơi anŭn Arôn či wơ̆t glaĭ pơ ơi adon ñu laih anŭn ñu tơĭ pran.” 27Tui anŭn, Môis ngă tui hăng tơlơi Yêhôwa hmâo pơtă laih kơ ñu. Klâo čô gơñu đĭ nao pơ čư̆ Hor ƀơi anăp abih bang ană plei pla. 28Môis toh sum ao Arôn laih anŭn buh brơi ană đah rơkơi ñu Êlêasar. Arôn tơĭ pran ƀơi akŏ čư̆ anŭn. Giơ̆ng anŭn Môis hăng Êlêasar trŭn rai mơ̆ng čư̆.#Tơb 29:29; Yap 33:38; Mơñă 10:6. 29Tơdang abih bang ană plei pla Israel thâo Arôn hmâo djai laih, ƀing gơñu čŏk hia amăng klâo pluh hrơi.
Currently Selected:
Tơlơi Yap 20: JRA2016
Highlight
Copy
Compare
Share
Want to have your highlights saved across all your devices? Sign up or sign in
© 2016 United Bible Societies. All rights reserved.
