Tơlơi Yap 11
11
Ană Plei Pla Pơhiăp Brŏk
1Hlăk anŭn, ană plei pla hiăp brŏk kơ Yêhôwa, tơlơi anŭn ngă brơi kơ Yêhôwa ƀu mơak ôh. Yêhôwa hmư̆ laih anŭn tơlơi hil Ñu tơgŭ đĭ. Apui Yêhôwa čuh hĭ ƀing ană plei pla laih anŭn čuh pơrai hĭ črăn akŏ kơ anih jưh. 2Ană plei iâu kơwưh kơ Môis. Môis iâu laĭ kơ Yêhôwa laih anŭn apui dơ̆ng hĭ. 3Arăng pơanăn anih anai jing Tabêra,#11:3 Tabêra: Boh hră anai hmâo dơnai arăng pơđok hrup hăng boh hră Hêbrơ kiăng pia “čuh”. yua kơ apui Yêhôwa hmâo čuh hĭ tơ̆ng krah ƀing gơñu.
4Ƀing djuai tuai dŏ amăng Israel mơhao kơ mơnơ̆ng ƀơ̆ng tơl ană Israel čŏk hia tui anai: “Hlơi či pha ƀing gơmơi ƀơ̆ng mơnơ̆ng? 5Ƀing gơmơi hơdơr kơ akan ƀing gơmơi ƀơ̆ng ƀu kla prăk ôh amăng čar Êjip, wơ̆t tơmŭn ia, tơmŭn tôk, dĭm, rơsŭn laih anŭn toih. 6Ră anai drơi jan ƀing gơmơi rơwang laih, ƀu hmâo hơgĕt gĕt ƀơ̆ng ôh, kơnơ̆ng ƀuh mana đôč.”
7Mana jing kar hăng jeh kôriander, khôr ñu kar hăng kơtăk hơngo.#Tơb 16:31. 8Ană plei pla bra hyu duñ mana, laih anŭn gơñu pơsăn hĭ ñu hăng rơsŭng glit ƀôdah rơsŭng tŏp, giơ̆ng anŭn gơñu tŭk amăng gŏ ƀôdah ngă ƀañ. Mơnâo ñu kar hăng ƀañ lŭk hăng ia rơmuă. 9Tơdang ia ngom lĕ trŭn amăng mlam ƀơi anih jưh, mana ăt trŭn mơ̆n.#Tơb 16:13-15.
10Môis hmư̆ ană plei pla amăng kơnŭng djuai ñu ur krao, rĭm čô gơñu leng čŏk hia ƀơi anăp bah amăng anih jưh gơñu. Tơlơi hil Yêhôwa tơgŭ laih anŭn Môis rơngot biă mă kơ tơlơi anŭn. 11Môis laĭ kơ Yêhôwa: “Yua hơgĕt Ih ngă pơtơnap kơ ding kơna Ih lĕ? Yua hơgĕt kâo ƀu hmâo tơlơi pap ôh ƀơi anăp Ih? Yua hơgĕt Ih pơđua boh kơtraŏ abih ană plei pla anai ƀơi kâo? 12Kâo hmâo pi kian ană plei anai hă? Kâo tơkeng rai abih bang ană plei pla anai hă? Yua hơgĕt Ih pơtă kơ kâo: ‘Pi bĕ ană plei pla anai ƀơi tơda ih kar hăng amĭ rong pi čơđai hlăk dŏ mĕm, tơl ƀing gơñu mŭt laih amăng lŏn čar Ih hmâo hơtŏm ƀuăn laih či pha brơi kơ ƀing ơi adon ƀing gơñu?’ 13Kâo či mă mơnơ̆ng mơ̆ng pă kiăng pơpha brơi abih bang ană plei pla anai? Yua kơ gơñu ur hia kơ kâo tui anai: ‘Pha brơi ƀing gơmơi añăm mơnơ̆ng ƀơ̆ng bĕ.’ 14Kâo ƀu dưi glăm ôh abih bang ană plei pla anai hơjan kâo, yua kơ gơñu jing sa tơlơi kơtraŏ biă mă kơ kâo! 15Tơdah Khua Yang ngă kơ kâo tui anŭn, laih anŭn tơdah kâo hmâo tơlơi pap ƀơi anăp Ih, hiam hloh pơdjai hĭ kâo bĕ kiăng kơ kâo ƀu ƀuh ôh tơlơi tơnap tap kâo!”
Ruah mă tơjuh pluh čô kŏng tha
16Yêhôwa laĭ kơ Môis: “Pơƀŭt glaĭ bĕ tơjuh pluh čô amăng ƀing kŏng tha ană plei pla Israel, jing ƀing mơnuih ih thâo gơñu jing ƀing kŏng tha laih anŭn ƀing khua djă akŏ ană plei pla. Ba rai bĕ ƀing gơñu rai pơ Sang Khăn Pơƀŭt kiăng kơ gơñu dŏ dơ̆ng pơ anŭn hrŏm hăng ih. 17Kâo či trŭn rai laih anŭn pơhiăp hăng ih ƀơi anŭn. Kâo či yua Yang Bơngăt Kâo dŏ ƀơi ih, laih anŭn pha brơi ƀing gơñu kiăng kơ gơñu glăm tơlơi kơtraŏ kơ ană plei pla anai hrŏm hơbĭt hăng ih, ƀu djơ̆ kơnơ̆ng hơjan ih glăm đôč ôh. 18Ih pơtă bĕ kơ ană plei pla tui anai: ‘Hrơi pơgi, brơi ƀing gih khŏm pơrơgoh hĭ ƀing gih pô laih anŭn ƀing gih či dưi ƀơ̆ng añăm mơnơ̆ng. Yua kơ tơngia Yêhôwa hmâo hmư̆ laih tơlơi ƀing gih čŏk hia tui anai “hlơi či pha brơi ƀing ta ƀơ̆ng añăm mơnơ̆ng” yua kơ ƀing gơmơi hmâo tơlơi hrăp mơak laih pơ čar Êjip. Yua kơ anŭn yơh, Yêhôwa či pha brơi añăm mơnơ̆ng kơ ƀing gih laih anŭn ƀing gih či dưi ƀơ̆ng añăm mơnơ̆ng. 19Ƀu djơ̆ ƀing gih kơnơ̆ng ƀơ̆ng mơnơ̆ng sa hrơi, dua hrơi, rơma hrơi, pluh hrơi ƀôdah dua pluh hrơi đôč ôh, 20samơ̆ ƀơ̆ng amăng abih sa blan, tơl mơnơ̆ng blai hĭ mơ̆ng drŏng adŭng laih anŭn ƀing gih bơrơmŭt hĭ mơnơ̆ng anŭn, yua kơ ƀing gih hơngah lui Yêhôwa jing Pô dŏ tơ̆ng krah ƀing gih laih anŭn ur hia ƀơi anăp Ñu tui anai: “Yua hơgĕt ƀing gơmơi tơbiă đuaĭ hĭ mơ̆ng čar Êjip?”’”
21Môis laĭ: “Ră anai kâo dŏ hrŏm hăng ană plei pla hmâo năm rơtuh rơbâo čô đah rơkơi, laih anŭn Ih pơtă tui anai: ‘Kâo či pha brơi añăm mơnơ̆ng kơ ƀing gơñu ƀơ̆ng djŏp tum amăng sa blan.’ 22Tơdah arăng pơdjai abih triu laih anŭn rơmo, tơlơi anŭn hmâo djŏp tum mơ̆ brơi kơ ƀing gơñu? Tơdah arăng mă abih akan amăng ia rơsĭ, tơlơi anŭn hmâo djŏp tum mơ̆ brơi kơ ƀing gơñu?” 23Yêhôwa laĭ hăng Môis: “Tơngan Yêhôwa ber đơi hă? Brơi ih dŏ tơguan kơsem bĕ tơlơi Kâo pơhiăp hăng ih či truh sĭt ƀôdah ƀu sĭt!”
24Môis tơbiă nao laih anŭn ruai glaĭ boh pơhiăp Yêhôwa laĭ kơ ană plei pla, giơ̆ng anŭn ñu iâu pơƀŭt tơjuh pluh ƀing kŏng tha ană plei pla jum dar Sang Khăn Pơƀŭt. 25Yêhôwa trŭn rai mơ̆ng gơnăm laih anŭn pơhiăp hăng Môis. Ñu yua Yang Bơngăt ƀơi Môis laih anŭn pha brơi tơjuh pluh čô ƀing kŏng tha. Tơdang Yang Bơngăt dŏ ƀơi tơjuh pluh čô ƀing kŏng tha, ƀing gơñu pơhiăp laĭ lui hlâo. Samơ̆ gơñu ƀu laĭ lui hlâo nanao ôh.
26Hmâo dua čô mơnuih dŏ glaĭ amăng anih jưh, sa čô mơnuih anăn ñu Êldat, sa čô anăn ñu Mêdat. Yang Bơngăt dŏ ƀơi dua čô mơnuih anai. Gơñu hmâo anăn amăng hră ƀing kŏng tha samơ̆ ƀu nao pơ Sang Khăn Pơƀŭt ôh. Samơ̆ gơñu pơhiăp laĭ lui hlâo amăng anih jưh. 27Sa čô hlăk ai đuaĭ nao laĭ pơthâo kơ Môis tui anai: “Êldat hăng Mêdat hlăk pơhiăp laĭ lui hlâo amăng anih jưh.” 28Yôsuê ană đah rơkơi Nun, jing ding kơna Môis mơ̆ng dŏ tơdăm, pơhiăp: “Ơ Môis, khua kâo, rơkâo ih khă găn gơñu!” 29Môis laĭ glaĭ: “Djơ̆ mơ̆ ih gar brơi kơ kâo? Aƀơih! Kiăng đơi yơh abih bang ană plei pla Yêhôwa leng kơ jing hĭ khua pô laĭ lui hlâo, kiăng kơ Yêhôwa dưm Yang Bơngăt Ñu ƀơi ƀing gơñu!” 30Môis hăng ƀing kŏng tha ană plei pla Israel wơ̆t glaĭ pơ anih jưh.
Čĭm Wăt
31Hlăk anŭn, Yêhôwa brơi sa glung angĭn ba čĭm wăt mơ̆ng ia rơsĭ rai pơ anih jưh, laih anŭn jai čĭm wăt anŭn jum dar anih jưh, rĭm akiăng anih jưh rơhaih ñu jing sa hrơi rơbat#11:31 Rĭm gah hmâo boh glong ñu jing rơma kilômet. laih anŭn mơ̆ng lŏn đĭ pơ ngŏ kơpal ñu jing sa met. 32Ană plei pla tơgŭ nao duñ čĭm wăt amăng hrơi anŭn, mlam anŭn laih anŭn wơ̆t kơ hrơi tơdơi. Pô duñ ƀiă hloh ăt hmâo pluh hômer mơ̆n. Gơñu phang hăng ƀơhu jum dar anih jưh. 33Tơdang añăm čĭm wăt ăt dŏ ƀơi tơgơi, aka pơmah ôh, tơlơi hil Yêhôwa tơgŭ đĭ hăng ană plei pla laih anŭn pơkơhmal gơñu hăng sa tơlơi răm ruă kơtang biă mă. 34Anih anai arăng pơanăn ñu Kibrôt Hatawa,#11:34 Kibrôt Hatawa: kiăng pia “pơsat kơ tơlơi hưp ham”. yua ƀơi anih anŭn arăng dơr ƀing mơnuih ră ƀơ̆ng huă. 35Mơ̆ng Kibrôt Hatawa, ană plei pla nao pơ Hasêrôt, laih anŭn gơñu dŏ jưh ƀơi anŭn.
Currently Selected:
Tơlơi Yap 11: JRA2016
Highlight
Copy
Compare
Share
Want to have your highlights saved across all your devices? Sign up or sign in
© 2016 United Bible Societies. All rights reserved.
