Lêwi 4
4
Mơnơ̆ng Ngă Yang Song Mă Tơlơi Soh
1Yêhôwa pơhiăp hăng Môis: 2“Brơi ih laĭ bĕ kơ ƀing ană Israel: Tơ hmâo sa čô ƀu pơrơ̆ng ngă soh ôh, laih anŭn ñu ngă gao hĭ sa amăng khul tơlơi Yêhôwa pơtă ƀu dưi ngă:
3Tơdah khua ngă yang prŏng tŭ arăng truač laih ia jâu kơ ñu samơ̆ ñu ngă soh, yua kơ tơlơi soh anŭn yơh ñu ngă brơi ană plei pla jing soh hĭ, yua kơ tơlơi soh ñu hmâo ngă anŭn ñu khŏm pơyơr đĭ kơ Yêhôwa sa drơi rơmo ƀu hmâo rơka rơkeñ ôh, kiăng kơ ngă mơnơ̆ng ngă yang song mă tơlơi soh. 4Mơnuih anŭn či ba rơmo ƀơi bah amăng Sang Khăn Pơƀŭt, ƀơi anăp Yêhôwa, ah tơngan ƀơi akŏ ñu laih anŭn pơdjai hĭ gơ̆ ƀơi anăp Yêhôwa. 5Khua ngă yang prŏng hloh pô hmâo tŭ laih tơlơi truač ia jâu či mă sa črăn drah rơmo anŭn ba mŭt amăng Sang Khăn Pơƀŭt, 6añrŭ čơđeng tơngan ñu amăng drah laih anŭn hơprah tơjuh wơ̆t ƀơi anăp Yêhôwa, gah anăp kơ bơnal amăng Anih Rơgoh. 7Khua ngă yang či pik drah ƀơi khul tơki kơƀang ngă yang čuh mơnơ̆ng ƀâu mơngưi pioh amăng Sang Khăn Pơƀŭt, ƀơi anăp Yêhôwa laih anŭn tuh hơdôm drah dŏ glaĭ gah yŭ kơ tơkai kơƀang ngă yang čuh pioh ƀơi anăp bah amăng Sang Khăn Pơƀŭt. 8Pô anŭn khŏm mă lui abih rơmuă kơ rơmo kiăng ngă mơnơ̆ng ngă yang song mă tơlơi soh, kar hăng rơmuă lom jum dar hăng pruăi hlŭng laih anŭn rơmuă klep mŭt amăng pruăi hlŭng, 9dua boh ƀleh, rơmuă ƀơi dua boh ƀleh jĕ kơiăng laih anŭn črăn jơman hloh amăng hơtai pô anŭn hmâo yaih mă laih mơ̆ng dua asar boh ƀleh, 10kar hăng mă hơdôm črăn anai kơ rơmo pơyơr amăng tơlơi ngă yang rơnŭk rơnua yơh. Khua ngă yang či čuh hơdôm mơnơ̆ng anŭn ƀơi kơƀang ngă yang pơyơr mơnơ̆ng ngă yang čuh. 11Bơ kơ klĭ, abih bang añăm, akŏ, tơkai, pruăi hlŭng laih anŭn eh ñu, 12kiăng laĭ abih bang črăn dŏ glaĭ kơ rơmo, khua ngă yang khŏm ba pơ gah rơngiao anih jưh, ba nao pơ anih rơgoh jing anih tuh hơbâo tơpur, giơ̆ng anŭn pioh hăng ngŏ djuh kiăng čuh hĭ, kiăng laĭ čuh hĭ ƀơi anih tuh hơbâo tơpur.
13Tơdah abih bang ană plei pla Israel ngă soh sa amăng khul tơlơi Yêhôwa pơtă hăng tơlơi ƀu pơrơ̆ng laih anŭn ngă tơlơi ƀu dưi ngă ôh, anŭn jing ană plei pla hmâo ngă soh laih, wơ̆t dah gơñu ƀu thâo ôh tơlơi anŭn. 14Samơ̆ tơ gơñu thâo laih tơlơi soh ñu pô hmâo ngă djơ̆, tui anŭn gơñu khŏm pơyơr rơmo ngă mơnơ̆ng ngă yang song mă tơlơi soh laih anŭn ba rơmo anŭn ƀơi anăp Sang Khăn Pơƀŭt. 15Hơdôm ƀing khua ngă yang khŏm ah tơngan ƀơi akŏ rơmo laih anŭn pơdjai ƀơi anăp Yêhôwa. 16Khua ngă yang prŏng hloh hmâo tŭ laih tơlơi truač ia jâu či ba nao sa črăn drah rơmo mŭt amăng Sang Khăn Pơƀŭt, 17añrŭ čơđeng tơngan ñu amăng drah laih anŭn hơprah tơjuh wơ̆t ƀơi anăp Yêhôwa, jing gah anăp khăn păng. 18Khua ngă yang prŏng hloh ăt či pik drah ƀơi hơdôm tơki kơƀang ngă yang amăng Sang Khăn Pơƀŭt, ƀơi anăp Yêhôwa, laih anŭn tuh hơdôm drah dŏ glaĭ gah yŭ tơkai kơƀang ngă yang pơyơr mơnơ̆ng ngă yang čuh pioh gah anăp bah amăng Sang Khăn Pơƀŭt. 19Khua ngă yang ăt mă abih bang rơmuă ba nao čuh pơ kơƀang ngă yang. 20Khua ngă yang prŏng hloh khŏm pơyơr rơmo anai hrup hăng pơyơr rơmo amăng phĕt song mă tơlơi soh mơ̆n. Tui anŭn, khua ngă yang či song mă tơlơi soh kơ ană plei pla laih anŭn tơlơi soh gơñu či dưi pap brơi. 21Tơdơi kơ anŭn, ñu khŏm ba rơmo gah rơngiao anih jưh laih anŭn čuh ñu hrup hăng čuh rơmo hlâo anŭn mơ̆n. Anŭn jing mơnơ̆ng ngă yang song mă tơlơi soh brơi kơ ană plei pla.
22Tơdah sa čô khua djă akŏ ngă soh sa amăng khul tơlơi Yêhôwa jing Ơi Adai ñu pơtă hăng tơlơi ƀu pơrơ̆ng, ngă tơlơi ƀu dưi ngă ôh, anŭn jing ngă soh laih. 23Tơdah mơnuih anŭn thâo tơlơi soh ñu hmâo ngă laih, khŏm ñu ba nao sa drơi bơbe tơno ƀu hmâo rơka rơkeñ kiăng ngă mơnơ̆ng ngă yang. 24Mơnuih anŭn či ah tơngan ƀơi akŏ bơbe tơno anŭn laih anŭn pơdjai ñu ƀơi anăp Yêhôwa, ƀơi anih pơdjai hlô mơnơ̆ng ngă yang čuh. Anŭn jing mơnơ̆ng ngă yang song mă tơlơi soh. 25Khua ngă yang či yua hăng čơđeng tơngan mă ƀơƀiă drah hlô mơnơ̆ng song mă tơlơi soh laih anŭn pik ƀơi tơki kơƀang ngă yang pơyơr mơnơ̆ng ngă yang čuh, laih anŭn tuh hơdôm drah dŏ glaĭ gah yŭ tơkai kơƀang ngă yang. 26Ñu ăt čuh abih bang rơmuă ƀơi kơƀang ngă yang hrup hăng čuh rơmuă kơ hlô mơnơ̆ng ngă yang amăng mơnơ̆ng ngă yang rơnŭk rơnua. Tui anŭn, khua ngă yang či ngă phĕt song mă tơlơi soh kơ mơnuih djă akŏ laih anŭn tơlơi soh pô anŭn či dưi pap brơi.
27Tơdah sa čô ană plei pla ngă soh sa tơlơi soh amăng khul tơlơi Yêhôwa pơtă hăng tơlơi ƀu pơrơ̆ng, laih anŭn ngă tơlơi ƀu dưi ngă ôh, anŭn jing ngă soh laih.#Yap 15:27-28. 28Tơdah mơnuih anŭn thâo tơlơi soh ñu hmâo ngă, khŏm ñu ba nao sa drơi bơbe ania ƀu hmâo rơka rơkeñ kiăng ngă mơnơ̆ng ngă yang song mă tơlơi soh ñu hmâo ngă laih. 29Mơnuih anŭn či ah tơngan ƀơi akŏ hlô mơnơ̆ng ngă yang song mă tơlơi soh laih anŭn pơdjai ñu ƀơi anih pơdjai khul hlô mơnơ̆ng ngă yang čuh. 30Khua ngă yang či yua hăng čơđeng tơngan mă ƀơƀiă drah laih anŭn pik ƀơi tơki kơƀang ngă yang pơyơr mơnơ̆ng ngă yang čuh, laih anŭn tuh hơdôm drah dŏ glaĭ gah yŭ tơkai kơƀang ngă yang. 31Ñu ăt mă abih bang rơmuă hrup hăng ngă amăng mơnơ̆ng ngă yang rơnŭk rơnua laih anŭn ba nao čuh ƀơi kơƀang ngă yang, ngă brơi mơnơ̆ng ngă yang hmâo mơnâo ƀâu mơngưi bơmơak kơ Yêhôwa. Tui anŭn, khua ngă yang či ngă phĕt song mă tơlơi soh kơ mơnuih anŭn, laih anŭn tơlơi soh mơnuih anŭn či dưi pap brơi.
32Tơdah mơnuih anŭn pơyơr triu ană ngă hlô mơnơ̆ng ngă yang song mă tơlơi soh, khŏm ñu ba nao sa drơi triu ania ƀu hmâo rơka rơkeñ ôh. 33Mơnuih anŭn či ah tơngan ƀơi akŏ hlô mơnơ̆ng ngă yang song mă tơlơi soh laih anŭn pơdjai ñu ƀơi anih pơdjai khul hlô mơnơ̆ng ngă yang čuh. 34Khua ngă yang či yua čơđeng tơngan mă ƀơƀiă drah laih anŭn pik ƀơi tơki kơƀang ngă yang pơyơr mơnơ̆ng ngă yang čuh, laih anŭn tuh hơdôm drah dŏ glaĭ gah yŭ tơkai kơƀang ngă yang. 35Ñu ăt mă abih bang rơmuă hrup hăng mă hĭ rơmuă mơ̆ng triu ană pơyơr amăng mơnơ̆ng ngă yang rơnŭk rơnua laih anŭn ba nao čuh ƀơi kơƀang ngă yang, hrŏm hăng hơdôm mơnơ̆ng ngă yang yua hăng apui pơyơr đĭ kơ Yêhôwa. Tui anŭn, khua ngă yang či ngă phĕt song mă tơlơi soh kơ mơnuih anŭn, laih anŭn tơlơi soh mơnuih anŭn či dưi pap brơi.”
Currently Selected:
Lêwi 4: JRA2016
Highlight
Copy
Compare
Share
Want to have your highlights saved across all your devices? Sign up or sign in
© 2016 United Bible Societies. All rights reserved.
