ROM 9
9
Pachia te Israel hae
1Khri kya byaccing nynh ka ho, ka hyn khyh. Kamaw nykunawpaw thinlung nynh Thyaa Muisaw liate kamaw kalan te ccaekia a khanpaw tuh: 2Kae tuh myarya ka ngaethah zah ka thinlung kya lungriathaenaw thang boi khyh. 3Pawccecize pynsaw lante ka minphuin hae athua hae paw ka vaeccaw hae hanlan kamaw te kamaw hynh Khri te thoh phiaku lan zah thyalawnaw ccou lan cia heize ka ry. 4Tuh-e hae tuh Israel hae thua hae zah, ccaaw thuanaw, phu-enaw, byakinnaw hae, kawbya pyanaw, Pachia beiknaw, byakinpyakupaw hae te a sekuh hae paw nynh thua.#Exo 4.22 5Minmin tuh minpaaw hae te mah sekuh hae zah, pynsaw lante Messiah tuh minmin kyate nynh yn thua. Aning tuh tynre balyn kya kawhoitu thua zah zungzae hythuapyatu Pachia nynh thua. Amen.
6Pachia bya tuh tyn khyh cite ka ho rypaw thua khyh. Pawccecize Israel hae balyn hynh Israel ccaccing marya thua khyh hae. 7Abraham ciihan balyn mah Abraham ccaaw hae ccaccing marya thua khyh hae; pawccecize, “Isak kya rou nynh na ciihan atyn cih,” acikuh.#Gen 21.12 8Tuh-e asuilan tuh pynsaw ccaaw hae tuh Pachia ccaaw hae thua khyh hae; byakinpyakupaw kya-e ccaaw hae kha nynh ciihan lang ria athua hae. 9Byakinpyakupaw kya-e bya tuh hynhte acikuh: “Atu ccyh yn thua te, bua kae thua cih zah Sarah nynh ccapaw lu kheit a saah cih,” a ci.#Gen 18.10 10Tuh-e kyalya thua khyh, Rebeka nynh ah minpaaw Isak lu kheit liate ccaaw lu ning a poi lya mah tuh-e hawte acyihkuh. 11Tuh-e ccaaw hae a pui maw hae, ahoypaw te athahpaw mah a rae maw hae khe, ponaw te asekuhpaw Pachia paccynnaw tuh ryalawnaw liate thua leite, amaw nynh a konaw thyhte athua nawlan, 12Rebeka kyakhe, “Atawccapaw nynh asoipaw kha rya a lawpah cih,” cite a hopya.#Gen 25.23 13Ccathyaa kyaze,
“Jakob tuh ka sungsah,
Esau tuh ka hua,”
cite azeiku thyhte nynh thua.#Mal 1.2-3
14Tuhteze pawcihte ah ho cih oh? Pachia tuh ding khyh tou? Tuhte thua khyh. 15Pawccecize Pachia nynh Moses kyakhe, “Ngaethya ka umsah rypaw kha ngaethya ka umsah cih zah thaw ka cci rypaw kha thaw ka ccih cih,” cite a hopya.#Exo 33.19
16Tukeiccuze Pachia ponaw tuh ccungccaw rynaw liate thuasah, ryalawnaw liate thuasah thua leite, ngaethyaumsahnaw a langsakuhpaw Pachia liate nynh thua. 17Pawccecize Ccathyaa kyaze Faro kalan a hopaw tuh: “Nang kae hangthungnawpaw hynh nang na kya ka thungnaw langsaku khylan te ka min hynh laephi vaw balyn po thaansah khylan nynh thua,” a cipya.#Exo 9.16 (LXX) 18Tukeiccuze Pachia nynh ngaethyaumsah rypaw kha ngaethyaumsah zah lungkhungsah rypaw kha a lungkhungsah.
19Tuhteze, “Pawccemou Pachia nynh ccungccaw hynh sei oun be? Hum nynh mou a rynaw kha a khee kho cih?” cite kae hynh nae khia cih oh. 20Thuasalama, pou ccungccapaw, Pachia kha rawsete byakhung lan ciate nang tuh hummou na thua? Raepaw uccaw nynh a raetupaw kha, “Pawccemou hynhcite nae rae?” cite a hopah cih tou?#Isa 29.16, 45.9 21Ang raetupaw nynh anglae pum kheit mawkhate ang hoypaw lang te ang hoyleipaw lang raenaw kaw hoi khyh tou? 22Pachia nynh amaw thinrianaw kha langsaku lan te a thungnaw kha nysah lan hae mang a ry pite, ro lan a paccyn vae paw a thinrianuapaw ang hae kya lungsaenaw pipi te phang a ngaesang lanze pawmou ho lan ung? 23Pachia nynh phu-enaw hanlan a paccyn ty vae paw, ngaethyaumsahnaw a ccou hae paw ang hae tungvaw kya a phu-enaw kya-e hoirumnaw kha langsaku khylan phe a cyi vae zeso pawmou ho lan ung? 24Tuh-e ang hae kyatuin Pachia nynh oun kopaw aening mah ah umbua oh; Pachia nynh Judah hae kyate kyalya ko leite Zenta hae kyate mah oun ko. 25Hosea kya mah Pachia nynh,
“Ka ccungccaw athua
lei hae paw kha,
‘ka ccungccaw hae’ cite
ka ko cih hae zah
ka sungsah athua leipaw kha
‘ka sungsah’ cite ka ko cih.#Hos 2.23
26‘Nanning tuh ka ccungccaw hae
na thua khyh oh,’ cite hopya
athuanaw hae hmin kyakhe
minmin kha ahiinpaw
Pachia ccaaw hae cite
hopya athua cih hae,” a ci.#Hos 1.10
27Israel hae te asekuh lante Isaiah nynh, “Israel hae milu tuh rili kya-e laesia zeih cih hae salamah a laehy hae paw rou nynh khum athua cih hae.#Isa 10.22-23 (LXX) 28Pawccecize Bawipaw nynh laephi vawlan hin arangte bya a pia cih,” cite a sia. 29Tukoute Isaiah nynh,
“Vaaw Bawipaw nynh
aening elang ciihan abang kha
oun la haangpya khyh ze,
aening tuh Sodom khua hawte
ah thua cih oh zah
Gomorrah khua te
ah lokuh vae cih oh,”
cite a ho.#Isa 1.9 (LXX)
30Tuhteze pawcihte ah ho cih oh? Dingnaw mue lan a zuakuh lei hae paw Zenta hae nynh dingnaw kha a mue vae hae, tuh-e tuh zynnaw liate muepaw dingnaw nynh thua. 31Thuasalama kawbya te asekuhpaw dingnaw kha mue lan a zuakuh hae paw Israel hae tuh tuh-e dingnaw kha mue khyh hae. 32Pawccemou a mue khyh hae? Pawccecize dingnaw kha zynnaw liate thua leite, cyisahnaw liate mue khopaw hawte a zuaku hae keiccu nynh thua. Minmin tuh tuh-e thykunawpaw lung kya phe a thykuh hae. 33Ccathyaa kyaze,
“Dotua oh! Ccungccaw hae
a thyku nawlan hae paw
lung te a khuliaku nawlan hae paw
lung kha Zion mua kya ka nung;
humhung zemah
amaw a zynpaw tuh
maethyanaw ccou vae lan khyh,”
cite azeikuh hawte nynh thua.#Isa 28.16 (LXX)
Zotung Bible © Bible Society of Myanmar, 2016.