ROM 8
8
Muisaw kya Hiin
1Tukeiccuze atu Khri Jesu kya a um hae paw tuh seibenaw um vae khyh. 2Pawccecize Khri Jesu kya umpaw hiinnaw kha yn pyatupaw Muisaw kawbya nynh seinaw kawbya kyate thuasah, chinaw kawbya kyate thuasah kae kha phe yn luesah vae. 3Pawccecize pynsaw keiccuze a thawzyapaw Kawbya nynh a cyi kho leipaw kha Pachia nynh a cyi. A seipaw pynsaw muinsan lante seinaw hanlan a Ccapaw kha yn saw zah, pynsaw kya umpaw seinaw kha sei a be. 4Tuhte pynsaw rynaw thyhte hiin vae leite Muisaw rynaw thyhte a hiin hae paw aening kya Kawbya kya-e bya hae tuh accing nawlan nynh thua. 5Pawccecize pynsaw rynaw thyhte a hiin hae paw nynh tuh pynsaw te asekuhpaw uccaw hae kha nynh a tua hae; thuasalama Muisaw rynaw thyhte a hiin hae paw nynh tuh Muisaw te asekuhpaw uccaw hae kha nynh a tua hae. 6Pynsaw te asekuhpaw tuanaw tuh chinaw nynh thua, thuasalama Muisaw te asekuhpaw tuanaw tuh hiinnaw te daenaw nynh thua. 7Pawccecize pynsaw te asekuhpaw tuanaw tuh Pachia te arawsekuh, pawccecize tuh-e tuanaw tuh Pachia Kawbya kha zui khyh, zui mah zui kho khyh. 8Tukeiccuze pynsaw rynaw kya um hae paw nynh tuh Pachia lungtung kho khyh hae.
9Thuasalama nanning tuh pynsaw rynaw kya na um khyh oh; Pachia Muisaw tuh nae kya a um ccaccing ze, nanning tuh Muisaw kya nynh na um oh. Khri Muisaw a hoi leipaw tuh Khri te sekuh khyh. 10Khri tuh nae kya a um lanze, pyn tuh seinaw keiccu chih salamah muisaw tuh dingnaw keiccu a hiin. 11Jesu kha chinaw kyate a thoosahtupaw Pachia Muisaw tuh nae kya a um lanze, Khri kha chinaw kyate a thoosahtupaw Pachia nynh nae kya a umpaw amaw Muisaw liate a chihthyapaw nae pyn kha ae hiinsah cih oh.#1Ko 3.16
12Tukeiccuze uteno hae, aening tuh pynsaw rynaw thyhte hiin khylan pynsaw kya laebah ah hoi vae khyh oh. 13Pawccecize pynsaw rynaw thyhte na hiin oh ze na chih cih oh; thuasalama Muisaw liate pyn a cyisahnaw kha na chisah oh ze na hiin cih oh. 14Pawccecize Pachia Muisaw nynh a cciakhae hae paw balyn tuh Pachia ccaaw hae nynh thua hae. 15Pawccecize nanning nynh bua a rihthyapaw see thinlung kha Pachia kyate mue leite, ccaaw thinlung kha nynh na mue oh. “Ka Paaw! Ka Paaw!” cite aening nynh ah sia vae oh ze,#Gal 4.5-7 16aening tuh Pachia ccaaw hae nynh ah thua oh cipaw Muisaw amaw ccaccei nynh aening muisaw ryte ccaekia a khan. 17Ccaaw hae ah thua oh ze rhoccoutu hae nynh ah thua vae oh, Pachia rho a ccoutu hae te Khri ryte rho a ccoukheih hae paw nynh ah thua oh; Khri ryte ah teingkheih oh ze, amaw ryte phu-enaw kha mah ah ccoubua cih oh.
18Pawccecize atu lya ah teing oh paw hynh aening kya yn langkuh cih paw phu-enaw te khinkhia lanze hosyn um khyh cite ka tua. 19Pawccecize raepaw uccaw hae nynh Pachia ccaaw hae oun langku lan hae paw kha myarya ngaehoite a ngawdae hae. 20Pawccecize raepaw uccaw hae tuh accakaepaw lang rae athua hae; mimaw nynh tuhte raeku a ry hae paw thua leite, a raetupaw rynaw thyhte thua zah,#Gen 3.17-19 21raepaw uccaw hae maw mah ronaw seetangnaw kyate a lue cih hae zah, Pachia ccaaw hae kya-e aphu-epaw luenaw kha a ccoubua cih hae cite ngaehoinaw a um keiccu nynh thua. 22Pawccecize raepaw uccaw hae balyn tuh atu cia neitangia accihpaw hawte a hawkhaekuh hae cipaw ah ny oh. 23Raepaw uccaw hae kyalya thua leite, Muisaw kya-e masaty athae a mue hae paw aening kha mah ccaaw thuanaw athuapaw ah pyn shawkhawnaw kha ngaehoi biate ahmaw lungkhu kya ah hawkhaekuh oh.#2Ko 5.2-4 24Pawccecize aening tuh ngaehoinaw liate khum ah thua oh; thuasalama phe muih vae paw ngaehoinaw tuh ngaehoinaw thua vae khyh; pawccecize lukhakheit nynh phe a muih vae paw uccaw kha pawccemou a ngaehoi ung cih? 25Thuasalama aening nynh ah muih lei oh paw kha ah ngaehoi oh ze, tuh-e tuh lungsaete ah ngaw oh.
26Tuhawte aening ah thawzyanaw kya Muisaw nynh oun bawm; pawccecize aening nynh pawtemou sawsang lan accan cipaw kha ah nyh khyh oh; thuasalama bya te ho kho leipaw hawkhaekunaw khate Muisaw amaw ccaccei nynh aening hanlan oun ngiapya. 27Thinlung a ccungtupaw Pachia nynh tuh Muisaw tuanaw kha a ny; pawccecize Muisaw nynh mithyaa hae hanlan Pachia rynaw thyhte a ngiapya hae.
28Pachia kha sungsah hae zah amaw a eenaw thyhte ko athua hae paw hanlan tuh Pachia nynh pawpaw balyn kha ahoy lante cci nynh pynkheihlan rya a law cipaw ah ny oh. 29Pawccecize Pachia nynh a Ccapaw kha uno hae patae laku kya ccatawccaw lang a tang ccaw cite Pachia nynh a ny typaw ccungccaw hae kha a Ccapaw muinsan te losaku khylan ccangte a nung hae. 30Tuhte ccangte a nung hae paw kha ko mah a ko hae; te a ko hae paw kha thyaa a ccousah hae; thyaa a ccousah hae paw kha phu-enaw a ccousah bua hae.
Jesu Khri kya Pachia Sungsahnaw
31Tuhteze hynh-e uccaw hae kong hynh pawtemou ah ho cih oh? Pachia tuh aening kalan a pan ze, hum nynh mou oun rawse kho cih? 32A Ccapaw heize haang leite aening balyn hanlan oun pyatupaw Pachia nynh Ccapaw ryte pawpaw balyn kha alakawte oun pya lan khyh tou? 33Pachia nynh a po hae paw kha hum nynh mou sei a be cih hae? Thyaaccousahtupaw tuh Pachia nynh thua. 34Seibetupaw tuh hummou? Chih zah a chi kyalya thua leite thoothui zah Pachia ranglang a umpaw, aening hanlan oun ngiapahtupaw tuh Jesu Khri nynh thua. 35Khri sungsahnaw kyate hum nynh mou oun phia kho cih? Vawsawnaw nynh tou? Riathaenaw nynh tou? Tuaasahkunaw nynh tou? Ccakannaw nynh tou? Ccakaete umnaw nynh tou? Rinaw nynh tou? Zunghe nynh tou oun phia kho cih?
36“Nang keiccuze kaening tuh
anin ninlang oun chia hae;
chia lanpaw tuu lang nynh
oun ria hae,”
cite Ccathyaa kya azeiku hawte nynh thua.#Sam 44.22 37Oun phia kho lanpaw um khyh. Aening oun sungsahtupaw amaw liate, aening tuh hynh-e uccaw hae balyn kya taetu hae pasing nynh ah thua oh. 38Pawccecize chinaw thuasah, hiinnaw thuasah, vaaw hae thuasah, uktu hae thuasah, atu a umpaw uccaw hae thuasah, oun um cih paw uccaw hae thuasah, thungnaw huhan thuasah, 39ahangnaw thuasah, akhunaw thuasah, raepaw uccaw hae balyn kya-e pawpaw uccaw nynh mah thuasah, ah Bawipaw Jesu Khri kya umpaw Pachia sungsakunaw kyate aening kha oun phia kho lan khyh cipaw ccaerarih lan ka ny.
Zotung Bible © Bible Society of Myanmar, 2016.