MATTHAI 3
3
Laanpi Paccynpyanaw
(Mar 1.1-8; Luk 3.1-18; Joh 1.19-28)
1Tuh ccyh lyakhe Baptisma pyatu Johan tuh yn langkuh zah Judea pee ramkaw khe phungho zah, 2“Ngaesikuh oh, pawccecize vaawlang peenaw tuh anae vae,” a ci.#Mat 4.17; Mar 1.15 3Profeh Isaiah nynh,
“Ramkaw kya a siapaw
ccungccaw lu kheitpaw roi nynh,
‘Bawipaw laanpi kha paccynpah oh,
a ccianaw laanpi kha
lawbabin lan raepah oh,’ a ci,”
cite a honuathepaw kha Johan nynh thua.#Isa 40.3 (LXX) 4Johan tuh kalauh ming te kuakuhpaw boeining kha lawkuh zah a tae kya saphua taeccia a cciaku; a aepaw tuh tungkhipaw te ramkaw e khoitui nynh thua.#2Si 1.8 5Te Jerusalem, Judea pee te Jordan vahue a um hae paw ccungccaw hae balyn tuh Johan kalan oun cceih hae zah, 6mih seinaw hae kha phykuh hae zah Johan nynh Jordan vaw khe baptisma a pya hae.
7Thuasalama baptisma in lan oun thua hae paw Farasi hae te Sadusi hae patae kha Johan nynh he a muih hae tuh minmin kha, “Pou huparepaw ciihan hae, yn thua cih paw thinrianaw kyate ccue lan hum nynh mou raeringnaw ae pya oh?#Mat 12.34, 23.33 8Ngaesikunaw te angaekuhpaw athae kha langsakuh oh; 9‘Abraham tuh kae paaw nynh thua,’ cite tuakuh nan oh. Pawccecize Pachia tuh hynh-e lung hae kyate Abraham ccaaw hae kha a rae kho cipaw kae hopya oh.#Joh 8.33 10Te atu mah hae tuh thingku leihpaw kya nungde athua vae; tukeiccuze ahoypaw athae thae leipaw thingku miakaw tuh nge thua zah maee lungkhu lang phung athua.#Mat 7.19
11“Ngaesikunaw hanlan kae nynh tui kya baptisma kae insah oh; thuasalama kamaw koute yn thua lanpaw aning tuh kae laeze a lesaehua, kae tuh tuh-e paw a phanah ccyngpya lan heize ka ngaekuh khyh; aning nynh nanning kha Thyaa Muisaw kya te maee kya baptisma ae insah cih oh. 12A kuih kya paraw ccyngkute a huihmin kha thyaapaping lan a cciccae koute a chanvuih kha byng lungkhu lang a ruin cih, thuasalama asipaw kha tuh a chih kho leipaw maee te a u cih,” a ci.
Jesu Baptisma Innaw
(Mar 1.9-11; Luk 3.21-22)
13Te Jesu tuh Galilee kyate Jordan vaw lang Johan kalan baptisma yn pya ccaw cite yn thua. 14Thuasalama Johan nynh, “Kae nynh khaw nang na kya baptisma in lan ka ccan, nang nynh tou ka kalan nae cceih?” cipah zah amaw kha a khee. 15Thuasalama Jesu nynh, “Atu tuh hynhcite cyihkuh hin sah, pawccecize dingnaw balyn marya accing nawlan aening nynh hynhcimawte cyi lanpaw nynh thua,” a cipya. Tetuh Johan tuh a nawccah. 16Te Jesu tuh baptisma a in koute tui kyate yn pou lyakhe vaawlang tuh vaekheihmawte yn hungkuh zah Pachia Muisaw tuh vahu hawte yn rungbung zah a tungvaw yn ccupaw kha a muih. 17Vaawlang te roi nynh, “E paw tuh a tungvaw ka lungryccingpaw, ka sungsahpaw ka Ccapaw nynh thua,” a ci.#Gen 22.2; Sam 2.7; Isa 42.1; Mat 12.18, 17.5; Mar 1.11; Luk 9.35
Currently Selected:
MATTHAI 3: ZB16
Highlight
Share
Copy
Want to have your highlights saved across all your devices? Sign up or sign in
Zotung Bible © Bible Society of Myanmar, 2016.