MATTHAI 2
2
Nithua langte Mihaw hae
1Herod siapharan lang a tang lya Judea ram Bethlehem khua kya Jesu a pui koute nithua langte awsi dothya hae paw mihaw hae tuh Jerusalem khua oun thua hae zah, 2“Judah siapharan lang a puipaw imua tuh teisangmou a um? Nithua langte yn thuapaw amaw awsi kha kae muih zah amaw beik lan nynh kae thua,” a ci hae. 3Herod siapharan nynh e bya kha he a thae tuh a thinphang zah Jerusalem khuaccaaw hae balyn mah mih thinphang. 4Aning nynh ranpibawi lepaw hae mih balyn te ccungccaw hae kyaze kawbya sazae hae balyn kha pynkheihlan ko hae zah, “Teisangmou Messiah tuh a pui cih?” cite a khia hae. 5Minmin nynh, “Judea ram Bethlehem khua kya nynh a pui cih; pawccecize profeh nynh hynhte a zei:
6‘Judah ram umpaw Bethlehem,#Mik 5.2
nang tuh Judah ram
khuapi hae lakuze
adih huapaw na thua khyh;
pawccecize na kyate
ka ccungccaw Israel hae
tuurintu yn pou cih!’ a ci,” cite a hopya hae.
7Tetuh Herod nynh mihaw hae kha aruh lante ko hae zah, hohtuh ccyh kya mou awsi yn langku cite akaw-aleih a khia hae. 8Tuinte minmin kha Bethlehem lang saw hae zah, “La cceih oh lah imua kha thawte oun ccung oh; amaw kha nae muih oh te, nae hopah bua cih oh, kae mah kae cceih cih zah ka beikbua ccaw,” a cipya hae. 9Siapharan bya he a thae kou hae te minmin tuh a pou hae; te nithua lang a muih hae paw awsi tuh mih malang khe cceih zah imua a umnaw luki khe a thadyn. 10Awsi a thadynpaw kha a muih hae tuh myaryamaw mih lungtua. 11Te inn lungkhu lang tee hae zah imua te a nung Mary kha a muih hae, te ccukharutungte amaw kha a beik hae; minmin nynh mih sisua bawng hae kha hung hae zah sui, frankinsen te mura kha lasung lang a pya hae. 12Minmin tuh Herod kalan a ki vae khyh nawlan hae Pachia nynh mih maan kya raeringnaw a pya hae keiccuze laanpi ccanglang te mih ram lang a ki hae.
Izip lang Ccuekhaenaw
13Minmin he a cceih kou hae te, Bawipaw vaawpaw tuh Josef a maan kya yn langkuh zah, “Thokuh lah imua te a nung kha hoei hae lah Izip ram lang ccuekhae hae, bya kae hopya makhia tuin kya la um, pawccecize Herod nynh imua kha chia khylan yn ccung vae cih,” a cipya. 14Josef nynh thokuh zah imua te a nung kha hoei hae zah khuazi khe Izip ram lang a cciakhae hae. 15Herod a chi mawlaezung tuin kya nynh a um. E tuh Bawipaw nynh profeh kyate, “Ka ccapaw kha Izip ram kyate ka ko vae,” cite a hopaw kha accingnawpaw nynh thua.#Hos 11.1
16Mihaw hae nynh yn ling vae hae cipaw kha Herod nynh he a nyh tuh myaryamaw a thinria, te mihaw hae nynh a ho hae paw accyh kha a khyase koute ccungccaw saw zah Bethlehem khua te a pepan umpaw, kum ning te akaw lang e pise imua hae balyn kha marya a chiasah hae. 17Tuhcite profeh Jeremiah nynh a la hopaw bya tuh accing vae.
18“Ramah khua kya
rawkhuinaw te
myarya ccihpaw
rawnaw roi kha thae athua.
Rachel tuh a ccaaw hae hanlan
rawkhuite a um;
a ccaaw hae tuh
a um vae khyh hae keiccuze
soihbiaku ry vae khyh.”#Jer 31.15
Izip Ram kyate A Ki hae
(Luk 2.39-40)
19Herod he a chih te, Bawipaw vaawpaw tuh Izip ram kya Josef a maan kya yn langkuh zah, 20“Thokuh lah imua te a nung kha hoei hae lah Israel ram lang kikhae ccavae hae, pawccecize imua hiinnaw a ccung hae paw tuh phe chih vae hae,” a cipya. 21Te Josef tuh thokuh zah imua te a nung kha hoei hae zah Israel ram lang a kikhae hae. 22Thuasalama Arkhelaus nynh a paaw Herod ccelang Judea ram kha a uk cipaw Josef nynh he a thae tuh tuh-e ram lang ccia lan a rih; tuhzemah Pachia nynh a maan kya a hopya thyhte Galilee ram lang a cceih. 23Te Nazareth cikuhpaw khua kyakhe a um. “Aning tuh Nazareth khuapaw cite ko athua cih,” cite profeh hae nynh a ho hae paw kha accingnawpaw nynh thua.#Mar 1.24; Luk 2.39; Joh 1.45
Currently Selected:
MATTHAI 2: ZB16
Highlight
Share
Copy
Want to have your highlights saved across all your devices? Sign up or sign in
Zotung Bible © Bible Society of Myanmar, 2016.