LEVITIKAS 3
3
Ccawkunaw Silawnaw
1Lukhakheit nynh a pyapaw tuh ccawkunaw silawnaw athua ze vaetua phu kya-e sahiin, nopi thuasah, pise thuasah na pya lanze, douccahpaw kha Bawipaw malang na pya cih. 2Silawnawpaw a lu vawlan khe na kuih kha na khang cih zah tungkunaw bu thuakaw kyakhe na theih cih; te ranpibawi athua hae paw Aaron ccapaw hae nynh a chii kha silawhang po voilu lan a hei cih hae. 3Ccawkunaw silawnawpaw a lungkhu e kha Bawipaw kalan maee te silawnaw hae lante aring hae kha phang a bongpaw atho, aring pepan umpaw atho balyn; 4akia lungkhu lang te umpaw akin ccangning te tuh-e hae vawlan abahkuhpaw atho, akin ryte a lawde cih paw athin kya abahkuhpaw arui-arae hae kha na pya cih. 5Oute Aaron nynh tuh-e hae tuh silawhang vawlan umpaw maee vawlan e maeething kya umpaw maee-ute silawnawpaw ryte a u cih hae, tuh-e tuh Bawipaw kalan maee te silawnaw, amynthuapaw nynh thua.
6 Bawipaw kalan ccawkunaw silawnaw hanlan na pyapaw tuh tuuphu, miaa phu kya-e athua ze, douccahpaw nopi khyhze pise sa kheit kha na pya cih. 7Tuu kha silawnaw lante na pya lanze, Bawipaw malang na thuakhae cih zah 8na kuih kha silawnawpaw alu vawlan khe na khang cih. Tuh-e tuu tuh tungkunaw bu malang khe chia athua cih, te Aaron ccapaw hae nynh a chii kha silawhang po voilu lan a hei cih hae. 9Ccawkunaw silawnawpaw kya-e atho kha Bawipaw kalan maee te silawnaw lante na pya cih: azungru pe te thoh paepaw aleihmae abalyn, aring phang abongpaw atho, aring pepan umpaw atho balyn; 10akia lungkhu lang te umpaw akin ccangning te khah-e hae kha phang a bongpaw atho, akin hae ryte na lawdepaw athin kya bahkuhpaw arui-arae hae kha na pya cih. 11Oute ranpibawi nynh khah-e hae kha silawhang vawlan khe Bawipaw kalan maee te looh silawnaw lante maee te a u cih.
12Si na lawnawpaw kha miaa athua lanze, Bawipaw malang na thuakhae cih zah 13na kuih kha a lu vawlan na khang cih; tuh-e tuh tungkunaw bu malang khe chia athua cih; te Aaron ccapaw hae nynh a chii kha silawhang po voilu lan a hei cih hae. 14Bawipaw kalan maee te silawnaw hanlan tuh-e miaa lungkhu e aring a bongpaw atho, aring pepan umpaw atho balyn; 15akia lungkhu lang te umpaw akin ccangning te khah-e hae vawlan abahkuhpaw atho, akin hae ryte na lawdepaw athin kya bahkuhpaw arui-arae hae kha na pya cih. 16Oute ranpibawi nynh khah-e hae kha silawhang vawlan khe maee te a u cih, amynthuapaw lante maee te silawnawpaw looh nynh thua. Atho balyn tuh Bawipaw kya-e nynh thua. 17Atho thuasah, achii thuasah na ae lan khyh oh; tuh-e tuh nae she takyh kya, nae umnaw balyn kya, zungzae tynpaw phunglang athua cih.
Currently Selected:
LEVITIKAS 3: ZB16
Highlight
Copy
Compare
Share
Want to have your highlights saved across all your devices? Sign up or sign in
Zotung Bible © Bible Society of Myanmar, 2016.
