LEVITIKAS 2
2
Ccathae Silawnaw
1Lukhakheit nynh Bawipaw kalan ccathae silawnaw kha a rae ry ze, a pyapaw tuh ahoypaw vaekhui athua cih; a beiktu nynh chitui kha vaekhui vawlan a bu cih zah frankinsen kha vaekhui vawlan a nung cih, 2tuh-e tuh ranpibawi athua hae paw Aaron ccapaw hae kalan a thuakhae cih. Ranpibawi nynh kuihphe te huukhinpaw vaekhui ahoypaw, chitui te frankinsen balyn kha a lah cih zah, silawhang vawlan khe maee te a u cih, Bawipaw kalan maee te silawnaw amynthuapaw nynh thua. 3Ccathae silawnaw kyaze alaepaw tuh Aaron te a ccapaw hae hanlan athua cih, tuh-e tuh maee-ute Bawipaw kalan pyapaw hae kyaze athyaa huaccepaw athua cih.
4Talyng-ang te thoupaw ccathae silawnaw kha na rae ry ze, ahoypaw vaekhui athua cih: ransi phing leipaw sanlou, chitui te pydepaw athua cih, tuhkhyhze ransi phing leipaw sanlou apahpaw, chitui thuhkuhpaw athua cih. 5Na pyapaw sanlou tuh talyng-ang te thoupaw ccathae silawnaw athua ze, ransi phingkuh leipaw vaekhui ahoypaw, chitui pydepaw athua cih; 6tuh-e sanlou tuh na eih cih zah chitui na bu cih; tuh-e tuh ccathae silawnaw nynh thua. 7Na pyapaw tuh talyng-ang kya roupaw sanlou athua ze, chitui pydepaw vaekhui ahoypaw te raepaw athua cih. 8Tuhcite aphuinphuin te na paccynpaw ccathae silawnaw kha Bawipaw kalan na cciakhae cih; te tuh-e tuh ranpibawi kalan he na pya te, aning nynh tuh-e tuh silawhang kalan a cciakhae cih. 9Ranpibawi nynh ccathae silawnaw kyate abang kha a phia cih zah silawhang vawlan khe maee te a u cih, Bawipaw kalan maee te silawnaw, amynthuapaw nynh thua. 10Te ccathae silawnaw kya-e alaepaw kha Aaron te a ccapaw hae hanlan athua cih, tuh-e tuh maee-ute Bawipaw kalan pyapaw hae kyaze athyaa huaccepaw athua cih.
11 Bawipaw kalan na pya oh paw ccathae silawnaw tuh ransi te raepaw thua lan khyh, pawccecize ransi thuasah, khoilutui thuasah maee-ute silawnaw lante Bawipaw hanlan maee te na u lan khyh oh. 12Thaety pyapaw kha Bawipaw kalan na thuakhae cih oh, tuhzemah khah-e hae kha silawhang vawlan khe amynthuapaw hanlan maee te na u lan khyh oh. 13Ccathae silawnaw balyn kya loi na phing cih; na Pachia ryte byakinku nawpaw loi kha na ccathae silawnawpaw hae kya phing leite na um lan khyh; na pyapaw balyn ryte loi kha na pyabia cih. 14Thaety hae kya-e ccathae silawnaw kha Bawipaw kalan na thuakhae ze, thaety pyapaw hanlan ccathae athawpaw kya-e lawpaw, maee te rousahpaw ccathae kha na thuakhae cih. 15Avawlan khe chitui na bu cih zah frankinsen kha mah avawlan khe na nung cih; tuh-e tuh ccathae silawnaw nynh thua. 16Te maee te rousahpaw ccathae abang, chitui te frankinsen balyn kha ranpibawi nynh maee te a u cih; tuh-e tuh Bawipaw kalan maee te silawnaw nynh thua.
Currently Selected:
LEVITIKAS 2: ZB16
Highlight
Copy
Compare
Share
Want to have your highlights saved across all your devices? Sign up or sign in
Zotung Bible © Bible Society of Myanmar, 2016.
