LEVITIKAS 27
27
Byakinkute Silawnawpaw hae
1 Bawipaw nynh Moses kha hynhte a hopya: 2Israel ccungccaw hae kyakhe hynhte hopah hae: Lukhakheit nynh Bawipaw kalan a raepaw byakinnaw keiccuze ccungccaw lu kheit phu hanlan atekuhpaw amee kha Bawipaw kalan a pya lanze, 3pise lu kheit elang atekuhpaw amee tuh: kum kuin te kum sung taruh laku hanlan atekuhpaw amee tuh beikinnthyaa e shekel thyhte ngun shekel sung pangaw athua cih. 4Nopi athua lanze, atekuhpaw amee tuh sung thum athua cih. 5Kum pangaw te kum kuin laku hanlan atekuhpaw amee tuh, pise hanlan shekel ccangkuin athua cih zah nopi hanlan shekel ahaw athua cih. 6Sawpaw sah kheit te kum pangaw laku hanlan atekuhpaw amee tuh, pise lu kheit hanlan ngun shekel pangaw athua cih zah nopi hanlan ngun shekel ccangthum athua cih. 7Te kum sung taruh te palung lang hanlan atekuhpaw amee tuh shekel haw lae pangaw athua cih zah nopi hanlan shekel ahaw athua cih. 8Lukhakheit nynh atekuhpaw amee kha a taening khyh ze, ranpibawi malang thuakhae athua cih zah ranpibawi nynh amee a khya cih; lu kheit cci nynh byakinnaw a raeku kho thyhte, ranpibawi nynh amee a khya cih.
9Sarangpaw kha Bawipaw kalan ahlu lang pya athua lanze, tuhcite Bawipaw hanlan pya athuapaw miakaw tuh athyaa cih. 10Athahpaw hanpaw ahoypaw kha thuasah, ahoypaw hanpaw athahpaw kha thuasah tuh-e sarangpaw hanpaw lante ccangpaw kha rulae thua lan khyh; te sarangpaw sa kheit kha ccangpaw hanpaw lante rulae athua lanze, rulaepaw te rulaenawpaw tuh sa ning maw te athyaa kalang cih hae. 11Bawipaw kalan ahlu lang pya kho athua leipaw, athyaa leipaw sarangpaw athua lanze, tuh-e sarangpaw kha ranpibawi malang thuakhae athua cih. 12Ranpibawi nynh tuh-e sarangpaw kha amee a khya cih: sarangpaw anyaa ahoy thyhte ranpibawi nynh amee a khya cih zah, amee tuh tuhcite athua cih. 13Thuasalama tuh-e tuh a pyatu nynh a shaw ry lanze, amee khyapaw vawlan khe pum pangaw pum kheit kha biachih athua cih.
14Lukhakheit nynh a inn kha Bawipaw kalan thyaasahte a pya lanze, ranpibawi nynh amee a khya cih: ranpibawi nynh inn kha anyaa ahoy thyhte amee a khya cih zah, amee tuh tuhcite athua cih. 15Te inn a pyatupaw nynh inn kha a shaw ry lanze, amee pum pangaw pum kheit kha amee khyapaw vawlan khe a biachih cih zah, inn tuh a hoitupaw kalan kii athua cih.
16Lukhakheit nynh rho lang a ccoupaw ram ramkhakheit kha Bawipaw hanlan a pya lanze, amee khyanaw tuh alungkhu ccacii ccou athua zeihte khya athua cih: barli amung kha homer#27.16 homer: phupaw phu haw loukaw aripaw. ccangkheit ccounaw tuh ngun shekel sung pangaw te khya athua cih. 17Lukhakheit nynh a loo kha jubilee kum khe thyaasahte a pya lanze, amee khya thyhte athua cih; 18thuasalama loo kha jubilee koute thyaasah athua lanze, ranpibawi nynh nyalang e jubilee kum cia alae ungpaw kum thyhte amee kha a tuaa cih zah amee a khyapaw kha sohpya bang athua cih. 19Te loo kha thyaasahte a pyapaw nynh a loo kha a shaw ry lanze, amee pum pangaw pum kheit kha amee khyapaw vawlan a biachih cih zah loo tuh a hoitupaw kalan kii athua cih. 20thuasalama loo kha shaw vae khyh zah, tuh-e loo tuh ccangpaw lukhakheit kalan zua athua vae lanze, tuh-e loo tuh shaw kho thua vae lan khyh. 21Thuasalama tuh-e loo tuh jubilee kya kii he athua te, tuh-e loo tuh thyaasahte pyapaw loo lante Bawipaw elang athyaa cih; ranpibawi uccaw lang a tang cih. 22Lukhakheit nynh rho lante a ccoupaw thua leite a repaw loo kha Bawipaw hanlan a thyaasah lanze, 23ranpibawi nynh jubilee kum cia amee kha a tuaa cih zah amee akhyapaw kha Bawipaw elang athyaapaw ahlu lante tuh-e nin khe a pya cih. 24Jubilee kum khe loo kha atakaw a la zuatupaw kalan kii athua cih. 25Amee khyapaw balyn tuh beikinnthyaa e shekel thyhte athua cih: shekel ccangkheit ze kerah ccangkuin nynh thua.
26Sahiin-awvaw thanty tuh Bawipaw uccaw athua keiccuze hum nynh sanmah Pachia kalan pyathui ho vae khyh; tangnuapaw thuasah, tuu thuasah Bawipaw uccaw nynh thua. 27Tuh-e tuh athyaa leipaw sahiin-awvaw athua lanze, amee khyanaw kyakhe pum pangaw pum kheit biachih te shaw athua cih; tuh-e tuh shaw athua khyh lanze, amee khyanaw thyhte zua athua cih.
28 Bawipaw kalan thyalawkute pyapaw ccungccaw thuasah, sahiin-awvaw thuasah, rho lan ccoupaw loo thuasah zua kho thua khyh zah shaw kho mah thua khyh; thyaasahte pyapaw uccaw miakaw tuh Bawipaw elang athyaa huaccepaw nynh thua.#Nam 18.14 29Thyalawkute pyapaw ccungccaw kha shaw kho thua khyh; chia athua cih.
30Laephi kya-e acii-amung thuasah, aku kya-e athae thuasah laephi kya-e pumhaw pumkheit balyn tuh Bawipaw uccaw nynh thua; Bawipaw hanlan athyaapaw nynh thua.#Nam 18.21; Deu 14.22-29 31Lukhakheit nynh amaw a nungpaw pumhaw pumkheit kya-e hankhakheit kha shaw a ry lanze, pum pangaw pum kheit kha amee vawlan a biachih cih. 32Vaetua phu kya-e thuasah, tuuphu kya-e thuasah a rintu hoitang zakaw kya a cceihpaw pumhaw pumkheit miakaw tuh Bawipaw elang athyaapaw athua cih. 33Humhung nynh mah tuh-e tuh ahoy hoy khyh cipaw khia nan sah lah, tuh-e hanpaw rulae nan sah, lukhakheit nynh tuh-e hanpaw a rulae zetuh, tuh-e te a rulaenawpaw tuh parouhte athyaa cih hae zah shawkhaw kho thua vae lan khyh.
34Hynh-e hae tuh Israel ccungccaw hae hanlan Sinai Mua kya Bawipaw nynh Moses a pyapaw kawbya hae nynh thua.
Currently Selected:
LEVITIKAS 27: ZB16
Highlight
Copy
Compare
Share
Want to have your highlights saved across all your devices? Sign up or sign in
Zotung Bible © Bible Society of Myanmar, 2016.
