LEVITIKAS 22
22
Athyaapaw Ahlu hae Mangnaw
1 Bawipaw nynh Moses kha hynhte a hopya: 2Aaron te a ccapaw hae nynh athyaapaw ka min kha the oun thyasah khyh nawlan hae, Israel ccungccaw hae nynh kamaw yn pya hae paw athyaapaw ahlu hae kha hoyte mang khylan hopah hae; kae tuh Bawipaw nynh ka thua. 3Minmin kha hynhte hopah hae: Nae she takyh kya-e nae ciihan lukhakheit nynh, athyaa khyh ccyh lyakhe, Israel ccungccaw hae nynh Bawipaw kalan a pya hae paw athyaapaw ahlu pe lang a naeku lanze, amaw kha ka umnaw kyate vua athua cih: Kae tuh Bawipaw nynh ka thua. 4Vaethya ccinaw khyhze vaenae a hoipaw Aaron ciihan lukhakheit nynh a ccinaw athyaa mawlaezung athyaapaw ahlu kha ae lan khyh. Humhung zemah michi keiccuze athyaa leipaw ccangkhakheit a typaw thuasah, a buatui apoupaw thuasah, 5humhung zemah amaw kha a thusah khopaw avawpaw sarangpaw sakhakheit kha a typaw thuasah, amaw kha athyaa leipaw lang a tangsahpaw ccungccaw lukhakheit kha thuasah, athyaa leipaw ccangkhakheit keiccuze athupaw ccungccaw kha a typaw te, pawpaw tahawpaw thyaa khyhnaw keiccuze mah athyaa leipaw kha a typaw thuasah, 6tuhcihawpaw lukhakheit kha a typaw ccungccaw tuh zete cia thyaa lan khyh zah a pyn kha tui te a singku khyh zetuh athyaapaw ahlu kha ae lan khyh. 7Khuanin he accah te aning tuh athyaa cih; tukoute athyaapaw ahlu kha a ae cih, pawccecize tuh-e hae tuh amaw a looh nynh thua. 8Amaw chi lan achihpaw saw khyhze sarepaw nynh a teipaw saw kha ae lan khyh, tuh-e saw liate athyaa leipaw lang a tangsei cih: Kae tuh Bawipaw nynh ka thua. 9Minmin nynh seinaw kya a ccaw khyh nawlan hae, te beikinnthyaa kha a thethyasah keiccu hae ze, tuin kya a chi khyh nawlan hae, kaw ka pya hae paw kha a zui cih hae: Kae tuh Bawipaw nynh ka thua; kae nynh minmin kha ka thyaasah hae.
10Ccungccaw huataw nynh athyaapaw ahlu kha ae lan khyh. Ranpibawi a mikhia khyhze a hohpaw ccungccaw nynh mah athyaapaw ahlu kha ae lan khyh; 11thuasalama ranpibawi nynh a repaw lukhakheit nynh tuh khah-e hae kha a ae cih; te a inn kya a pui hae paw nynh mah a looh kha a ae cih hae. 12Ranpibawi a ccanung nynh pise huataw te zuvaw lang a tang hae ze, athyaapaw ahlu kya-e pyapaw kha ae lan khyh; 13thuasalama ranpibawi ccanung tuh phe a nomae ze thuasah, a vawpaw te a myaku hae ze thuasah, ccaawsaah leite, a liaccaw lya hawte a paaw inn lang bua yn ki zetuh, a paaw looh kha a ae cih. Ccungccaw huataw nynh tuh-e tuh ae lan khyh. 14Lukhakheit nynh athyaapaw ahlu kha tuaku ty leite a aesei lanze, tuh-e ahlu mee pum pangaw pum kheit kha a biachih cih zah tuh-e athyaapaw ahlu kha ranpibawi kalan a pya cih. 15Bawipaw kalan a pya hae paw Israel ccungccaw hae kya-e athyaapaw ahlu kha humhung nynh mah thusah lan khyh, 16minmin kya-e athyaapaw ahlu kha a aesei keiccu hae ze, cyiseinaw silawnaw rae lan ciate mih tungvaw seinaw a hoi hae, pawccecize kae tuh Bawipaw nynh ka thua; kae nynh minmin kha ka thyaasah hae.
Ccoupyapaw Ahlu
17 Bawipaw nynh Moses kha hynhte a hopya: 18Aaron te a ccapaw hae te Israel ccungccaw balyn kha hynhte hopah hae: Israel ccungccaw lukhakheit nynh thuasah, Israel hae kya a um buapaw ramccang ccungccaw lukhakheit nynh thuasah byakinkute a pyapaw ahlu khyhze amaw a lungtho thyhte Bawipaw kalan maee-u te a pyapaw ahlu kha he a pya vae ze, 19amaw hanpaw lante ccoupya athua nawlan, douccahpaw tangnuapaw khyhze tuutepaw khyhze miaatepaw kha a pya cih. 20Ccaenaw umpaw kha na pya lan khyh, pawccecize tuh-e tuh namaw hanpaw lante ccoupya thua lan khyh.#Deu 17.1
21Lukhakheit nynh byakinkupaw ccingsahnaw kya thuasah, lungthote silawnaw kha thuasah, Bawipaw kalan ccawkunaw silawnaw kha vaetua phu kya-e khyhze, tuuphu kya-e khate he a rae vae ze, ccoupya athua nawlan, tuh-e tuh accingpaw athua cih; a pyn kya ccaenaw um lan khyh. 22A mitmohpaw, vaemaw muepaw, kuihccu accing leipaw, vaenae a hoipaw, laethah, aphawpaw, tuhcihawpaw sahiin-awvaw kha Bawipaw kalan na pya lan khyh, Bawipaw kalan maee te silawnaw ahlu lante silawhang vawlan na khang lan khyh. 23A ccu myaryamaw asaepaw khyhze myaryamaw adynpaw tangnuapaw khyhze tuutepaw kha lungtho thyhte pyapaw ahlu lang na pya cih; thuasalama tuh-e tuh byakinkupaw ahlu lang ccoupya thua lan khyh. 24A bualua aduinpaw, akoipaw, apeipaw, a vaemaw umpaw sahiin-awvaw kha Bawipaw kalan na pya lan khyh; tuhcihawpaw pyanaw kha nae ram lungkhu na rae lan khyh oh, 25ramccang ccungccaw kyate na mue oh paw tuhcihaw sahiin-awvaw kha Bawipaw nae Pachia looh lang na pya lan khyh oh; tuh-e hae tuh a pyn kya ccing khyh zah ccaenaw a um keiccuze nanning hanpaw lante ccoupya thua lan khyh hae.
26 Bawipaw nynh Moses kha hynhte a hopya: 27Tangnuapaw thuasah, tuu thuasah, miaa thuasah a pi nynh he a thang vae ze, a pi te nin sari a umkheih cih hae, nin taryanaw nin kyate vae tuh maee te silawnaw Bawipaw kya-e ahlu lante ccoupya athua vae cih. 28Thuasalama vaetua thuasah, tuu, miaa thuasah api te ataw parouhte nin kheit lungkhu kya na theih lan khyh oh. 29Bawipaw kalan lungtuanaw silawnaw kha he na rae vae oh ze, naemaw ccelang tuh-e tuh ccoupya athua nawlan, tuhcite si na lawkuh cih oh. 30Tuh-e nin khe ae athua cih; awkhualan awkhua cia ccapyh sanmah na laesah lan khyh oh: kae tuh Bawipaw nynh ka thua.
31Ou tuhte ka kawbya hae kha na tynsah cih oh zah na zui cih oh: kae tuh Bawipaw nynh ka thua. 32Israel ccungccaw hae laku kamaw kha thyaasah ka thua nawlan, athyaapaw ka min kha the na thyasah lan khyh oh: kae tuh Bawipaw nynh ka thua; kae nynh nanning kha kae thyaasah oh, 33kae tuh nae Pachia lang tang khylan Izip ram kyate ae poukhae oh paw nynh ka thua: kae tuh Bawipaw nynh ka thua.
Currently Selected:
LEVITIKAS 22: ZB16
Highlight
Copy
Compare
Share
Want to have your highlights saved across all your devices? Sign up or sign in
Zotung Bible © Bible Society of Myanmar, 2016.
