LEVITIKAS 21
21
Ranpibawi hae Thyaanaw
1 Bawipaw nynh Moses kha hynhte a hopya: Ranpibawi hae Aaron ccapaw hae kha hynhte hopah hae: Humhung nynh mah a puizia hae laku e michi hanlan amaw te amaw kha thusakuh lan khyh, 2amaw te anaekuh huapaw a vaeccaw hae: a nung, a paaw, a ccapaw, a ccanung, a u te a neitaw; 3tuhawte vawpaw a hoi leipaw a ccianung liaccaw hanlan kha tuh a thusakuh kho. 4Thuasalama a ccungccaw hae laku kya zuvaw umkheihnaw te asekuhpaw kya amaw te amaw kha thusakuh lan khyh. 5Minmin nynh mih lu kha okuh lan khyh hae, mih khawming adung kha mah ngokuh lan khyh hae, mih ngesaw kha pawpaw kya mah awkuh lan khyh hae.#Lev 19.27-28; Deu 14.1 6Minmin tuh mih Pachia hanlan a thyaa cih hae zah mih Pachia min kha thethyasah lan khyh hae; pawccecize minmin nynh maee te silawnaw Bawipaw kya-e ahlu, mih Pachia looh kha a pya keiccu hae ze, a thyaa cih hae. 7Ohhuanung kha thuasah, thusah athua vae paw nopi kha thuasah zu lang hoi lan khyh hae, a vawpaw te a mahkuh hae paw nopi kha mah zu lang hoi lan khyh hae. Pawccecize minmin tuh mih Pachia elang athyaa hae paw nynh thua hae. 8Nae Pachia kha looh a pyatu thua hae zah minmin kha athyaa hae paw lante na ccuepe cih oh; minmin tuh nanning elang a thyaa hae paw athua cih hae, pawccecize nanning ae thyaasahtu oh paw Bawipaw , kae tuh ka thyaa. 9Ranpibawi ccanung nynh ohhuakunaw khate amaw te amaw kha a thethyasahku lanze, a paaw kha a thethyasah vae; amaw kha maee te phe chih lan u athua cih.
10A uno hae laeze hangthung thua zah a lu vawlan chitui thuh athua vae paw te boeining lawsahku khylan thyaasah athua vae paw ranpibawi tuh a sang kha phuasalae lan nung lan khyh, a boeining kha thoh sei lan khyh. 11Michi rhua a umnaw lang cceih lan khyh; a nung, a paaw elang heize amaw te amaw kha thusakuh lan khyh. 12Beikinnthyaa atolang pou lan khyh zah a Pachia kya-e beikinnthyaa kha thethyasah lan khyh; pawccecize a Pachia kya-e thuhkupaw chitui athyaapaw tuh a tungvaw a um vae: Kae tuh Bawipaw nynh ka thua. 13Liaccady athuapaw nopi kyalya kha zu lang a hoi cih. 14Nomaenung, vawpaw te a phiakuh hae paw nopi, thusah athua vae paw nopi, ohhuanung, hynh-e hae lukhakheit kha zu lang hoi lan khyh. Amaw a phin kya-e liaccady kha zu lang a hoi cih, 15A ccaaw hae kha a ccungccaw hae laku kya thethyasah lan khyh hae; pawccecize kae tuh Bawipaw nynh ka thua; kae nynh amaw kha ka thyaasah.
16 Bawipaw nynh Moses kha hynhte a hopya: 17Aaron kha hynhte hopah: Na ciihan hae mih she takyh kya ccaenaw a umpaw nynh a Pachia looh kha pya lan naekuh nan sah. 18Pawccecize ccaenaw a umpaw, a mitmohpaw, a ccukhoupaw, a maesue arohpaw, a kuihccu myaryamaw asaepaw, 19a ccu khyapaw, a kuih khyapaw, 20a kekypaw, ccungccaw anepaw a mit kya ccaenaw umpaw, thyapaw ccinaw a hoipaw, laethah a kaepaw, a tiin rohpaw nynh naekuh lan khyh. 21Aaron ciihan kya-e ranpibawi ccaenaw umpaw nynh maee te silawnaw Bawipaw kya-e ahlu kha pya khylan naekuh lan khyh; aning tuh ccaenaw a um keiccuze a Pachia looh kha pya lan naekuh lan khyh. 22Aning nynh a Pachia looh athyaa kha thuasah, athyaa huapaw kha thuasah a ae cih. 23Thuasalama aning tuh ccaenaw a um keiccuze aning nynh ka beikinnthyaa hae kha a thethyasah khyh nawlan, zokhawpaw boei kalan te silawhang kalan naeku lan khyh. Pawccecize kae tuh Bawipaw nynh ka thua; kae nynh minmin kha ka thyaasah hae. 24Tuhcite Moses nynh Aaron te a ccapaw hae te Israel ccungccaw balyn kalan a hopya hae.
Currently Selected:
LEVITIKAS 21: ZB16
Highlight
Copy
Compare
Share
Want to have your highlights saved across all your devices? Sign up or sign in
Zotung Bible © Bible Society of Myanmar, 2016.
