LEVITIKAS 15
15
Pyn kyate Apoupaw Anae
1 Bawipaw nynh Moses te Aaron kha, 2Israel hae kyakhe hynhte hopah oh:
Pise lukhakheit nynh a ngesaw kyate anae apou lanze, tuh-e anae tuh nynh amaw kha athyaa leipaw lang a tangsah. 3Tuh-e anae a hoitupaw kya-e thyaa leinaw tuh hynh-e nynh thua: a pyn kyate apoupaw anae tuh a pou lanze thuasah, phe a kang vae ze thuasah, tuh-e tuh a tungvaw thyaa leinaw nynh thua. 4Anae a hoitupaw nynh a inaw ikhung miakaw tuh thyaa khyh; te a haungnawpaw pawpaw balyn mah thyaa lan khyh. 5A ikhung a typaw miakaw tuh a uccaw kha a sukuh cih zah tui a singkuh cih, te aning tuh zete cia thyaa lan khyh. 6Anae a hoitupaw nynh a haungnaw ccangkhakheit kya a haung hae paw balyn tuh mih boeining a sukuh cih hae zah tui a singkuh cih hae, te zete cia thyaa lan khyh hae. 7Anae a poutupaw pyn kha a typaw balyn tuh mih boeining a sukuh cih hae zah, tui a singkuh cih hae, te zete cia thyaa lan khyh hae. 8Anae a hoitupaw nynh athyaa hae paw kha a thoisei hae ze, mih boeining a sukuh cih hae zah tui a singkuh cih hae, te zete cia thyaa lan khyh hae. 9Anae a hoitupaw nynh a ccikunawpaw khungnin miakaw tuh thyaa lan khyh. 10Amaw akaw kya umpaw ccangkhakheit kha a typaw balyn tuh zete cia thyaa lan khyh, te tuhcihawpaw uccaw kha a phupaw balyn tuh boeining a sukuh cih hae zah tui a singkuh cih hae, te zete cia thyaa lan khyh hae. 11Anae a hoitupaw nynh a singku leipaw a kuih khate a hae paw ccungccaw balyn tuh mih boeining a sukuh cih hae zah tui a singkuh cih hae, te zete cia thyaa lan khyh hae. 12Anae a hoitupaw nynh a typaw laephi ang miakaw kha koi athua cih; te thing angphe miakaw kha tui te sing athua cih.
13Anae a hoitupaw nynh tuh-e anae he athyaa koute a thyaanaw hanlan nin sari a ngaw cih; te a boeining kha vadungtui te a sukuh cih zah a pyn kha a singkuh cih, te aning tuh athyaa cih. 14Nin taryanaw nin khe vahu anopaw sa ning khyhze valaele sa ning kha a lah cih zah Bawipaw malang tungkunaw bu thuakaw kalan cciate ranpibawi kha a pya cih. 15Ranpibawi nynh sa kheit tuh seithyaanaw silawnaw hanlan, ccangpaw sa kheit tuh maee-ute silawnaw hanlan a mang cih; te ranpibawi nynh Bawipaw malang khe anae a hoipaw hanlan seingaethyanaw kha a raepah cih.
16Pise nynh a buatui apou lanze, a pyn balyn kha tui a singkuh cih zah zete cia thyaa lan khyh. 17Buatui nynh a ccawphupaw boeining te raepaw thuasah, saving te raepaw thuasah pawpaw balyn kha tui te su athua cih, te zete cia thyaa lan khyh. 18Pise nynh nopi te ihkheih hae zah buatui a pou lanze, parouhte tui a singkuh cih hae, te zete cia thyaa lan khyh hae.
19Nopi nynh nopiny a ny vae ze, nin sari lungkhu thyaa lan khyh, te tuh-e nopi kha a typaw humhung zemah zete cia thyaa lan khyh. 20A thyaa khyh lyaze a inawpaw pawpaw balyn mah thyaa lan khyh; a dahungnawpaw pawpaw balyn zemah thyaa lan khyh. 21Tuh-e nopinung a ikhung kha a typaw humhung zemah a boeining a sukuh cih zah tui a singkuh cih, te zete cia thyaa lan khyh. 22A dahungnawpaw miakaw kha a typaw humhung zemah a boeining kha a sukuh cih zah tui a singkuh cih, te zete cia thyaa lan khyh; 23ikhung kha thuasah, a dahungnawpaw ccangkhakheit kha thuasah a ty lanze, tuh-e ccungccapaw tuh zete cia thyaa lan khyh. 24Pise lukhakheit nynh tuh-e nopinung te ihkheih hae zah nopi a thyaa leinaw tuh pise tungvaw accaw lanze, pise tuh nin sari lungkhu thyaa lan khyh; te pise nynh a inawpaw ikhung tuh thyaa lan khyh.
25Nopi nynh nopiny a ny ccyh thua leite, nin patae a chii apou ze thuasah, nopiny a nyh koute a chii apou ze thuasah a chii apou nin balyn tuh po thyaa lan khyh; nopiny a ny nin lya hawmawte thyaa lan khyh. 26A chii apou nin balyn kya a inawpaw ikhung miakaw tuh nopiny a ny lya-e ikhung hawte tua athua cih; te a dahungnawpaw balyn tuh nopiny a ny lyaze a thyaa khyh hawte thyaa lan khyh. 27E uccaw hae a typaw humhung zemah thyaa lan khyh, a boeining a sukuh cih zah tui a singkuh cih, te zete cia thyaa lan khyh. 28A chii apoupaw kha athyaa koute nin sari he acih te, aning tuh athyaa cih. 29Nin taryanaw nin khe vahu anopaw sa ning khyhze valaele sa ning kha a lah cih zah tungkunaw bu thuakaw kya ranpibawi kalan a ccyng cih. 30Ranpibawi nynh sa kheit kha seithyaanaw silawnaw hanlan, ccangpaw sa kheit kha maee-ute silawnaw hanlan a mang cih; te ranpibawi nynh Bawipaw malang khe athyaa leipaw apoupaw tuh-e ccungccanung hanlan seingaethyanaw kha a raepah cih.
31Tuhcite Israel ccungccaw hae nynh minmin laku umpaw beikbu kha thusahte mih thyaa leinaw kya a chi khyh nawlan hae, mih thyaa leinaw kyakhate na phia cih hae.
32E hynh anae a hoi hae paw hanlan phungzae nynh thua: a buatui pou zah tuh-e buatui liate a thyaa leipaw hanlan thuasah, 33nopiny a nyhpaw hanlan thuasah, humhung zemah nopi thuasah pise thuasah anae a hoipaw hanlan thuasah, athyaa leipaw nopi te a ihkheih paw pise hanlan thuasah phungzae nynh thua.
Currently Selected:
LEVITIKAS 15: ZB16
Highlight
Copy
Compare
Share
Want to have your highlights saved across all your devices? Sign up or sign in
Zotung Bible © Bible Society of Myanmar, 2016.
