LEVITIKAS 14
14
Vaethya Ccinaw te Inn Thyaasahnaw
1 Bawipaw nynh Moses kha hynhte a hopya: 2E hynh vaethya akaepaw nynh a thyaa ccyh kya a zui lanpaw phungzae athua cih:
Amaw kha ranpibawi kalan cciakhae athua cih;#Mat 8.4; Mar 1.44; Luk 5.14, 17.14 3ranpibawi nynh ryahmin atolang a cceih cih zah a do cih. Vaethya akaepaw ccungccaw tuh a ccinaw a dan vae lanze, 4thyaasah athua cih paw ccungccaw hanlan hiin zah a thyaapaw pavaw sa ning, sidar thing te law asepaw te hyssop thing ange kha law lan ranpibawi nynh kaw a pya cih hae. 5Ranpibawi nynh vadungtui a ruinkuhpaw laephi ang a vawlan khe pavaw sa kheit kha chia lan kaw a pya cih hae. 6A hiinpaw pavaw kha sidar thing, law asepaw te hyssop thing ryte a lah cih zah, vadungtui vawlan chia a thuapaw pavaw chii kyakhe tuh-e hae tuh ahiinpaw pavaw ryte moh a dung cih. 7thyaasah athua cih paw vaethya ccinaw akaepaw ccungccaw tungvaw khe tuh-e tuh vae sari a hei cih; tukoute ranpibawi nynh aning tuh a thyaa vae cite a ho cih zah ahiinpaw pavaw kha atolang po a zousah cih. 8Thyaasah athua cih paw ccungccaw nynh a boeining kha a sukuh cih zah a ming balyn kha a ngokuh cih, te tui a singkuh cih zah athyaapaw athua vae cih. Tukoute ryahmin lungkhu lang a cceih cih, thuasalama a bu atolang khe nin sari a um cih. 9Nin sarinaw nin khe a ming balyn: a sang, a khawming te a mitming kha a ngokuh cih; a ming balyn kha a ngokuh cih. Oute a boeining hae kha a sukuh cih zah a pyn kha a singkuh cih, te aning tuh a thyaa cih.
10Nin taryanaw nin khe douccahpaw tuutaw pise sa ning te douccahpaw tuutaw nopi sa kheit kum kheit acih vae paw kha thuasah, ccathae silawnaw hanlan chitui pykuhpaw vaekhui ahoypaw ephah pum haw pum thum te chitui lita pum thum pum kheit kha a lah cih. 11A thyaasahtu ranpibawi nynh a thyaasah cih paw ccungccaw kha hynh-e uccaw hae ryte Bawipaw kalan tungkunaw bu thuakaw kyakhe a nung cih. 12Ranpibawi nynh tuutaw pise hae kyaze sa kheit kha a lah cih zah chitui lita pum thum pum kheit ryte cyiseinaw silawnaw lante a pya cih, te tuh-e hae tuh Bawipaw malang khe hangthung-hebiate silawnaw lante a hangthung cih. 13Aning nynh seishawnaw silawnawpaw te maee-ute silawnawpaw kha chia a thuanaw hae, hminthyaa kyakhe tuh-e tuutaw kha a theih cih; pawccecize cyiseinaw silawnaw tuh seithyaanaw silawnaw hawte ranpibawi kya-e nynh thua: tuh-e tuh athyaa huapaw nynh thua. 14Ranpibawi nynh cyiseinaw silawnaw kya-e chii abang kha a lah cih zah thyaasah athua cih paw ccungccaw a ranglang nakua alia lang, a ranglang kuihpi te a ranglang ccupi kyakhe a noi cih. 15Ranpibawi nynh chitui abang kha a lah cih zah amaw a voilang kuihphe kyakhe a bu cih, 16te a ranglang kuihdung kha a voilang kuih kya umpaw chitui kyakhe a dung cih a kuihdung khate chitui abang kha Bawipaw malang khe vae sari a hei cih. 17Ranpibawi nynh a kuih kya alaepaw chitui abang kha thyaasah athua cih paw ccungccaw a ranglang nakua alia lang, a ranglang kuihpi te a ranglang ccupi kya noikuhpaw cyiseinaw silawnaw achii vawlan khe a noichih cih. 18Ranpibawi nynh a kuih kya alaepaw chitui kha thyaasah athua cih paw ccungccaw a lu vawlan khe a thuh cih. Oute aning nynh tuh-e ccungccaw hanlan seingaethyanaw kha Bawipaw malang a raepah cih: 19a thyaa khyhnaw kyate thyaasah athua cih paw ccungccaw hanlan seingaethyanaw kha raepya khylan ranpibawi nynh seithyaanaw silawnaw kha a rae cih. Tukoute maee-ute silawnawpaw kha a theih cih; 20te ranpibawi nynh silawhang vawlan khe maee-ute silawnaw te ccathae silawnaw kha a rae cih. Ou tuhte ranpibawi nynh tuh-e ccungccaw hanlan seingaethyanaw kha a raepah cih zah aning tuh a thyaa cih.
21Thuasalama a ryachi zah, tuhcih alung lan a taening khyh ze, cyiseinaw silawnaw hanlan tuutaw pise sa kheit kha thuasah, ccathae silawnaw hanlan chitui te pydepaw vaekhui ephah pumhaw pumkheit te chitui lita pum thum pum kheit kha thuasah a cciakhae cih. Cyiseinaw silawnaw tuh hangthungte pya athua cih, ou tuhte tuh-e ccungccaw ccelang seingaethyanaw kha raepya athua cih; 22a taening thyhte, vahu anopaw sa ning khyhze valaele sa ning kha, seithyaanaw silawnaw hanlan sa kheit, maee-ute silawnaw hanlan sa kheit a ccyng cih. 23Nin taryanaw nin khe tuh-e hae tuh a thyaanaw hanlan ranpibawi kalan, tungkunaw bu thuakaw pe, Bawipaw malang a thuakhae cih; 24te ranpibawi nynh cyiseinaw silawnaw tuutaw te chitui lita pum thum pum kheit kha a lah cih zah Bawipaw malang khe hangthung-hebiate silawnaw lante a hangthung cih. 25Ranpibawi nynh cyiseinaw silawnaw tuutaw kha a theih cih zah achii abang kha a lah cih, te thyaasah athua cih paw ccungccaw a ranglang nakua alia lang, a ranglang kuihpi te a ranglang ccupi kyakhe a noi cih. 26Ranpibawi nynh chitui abang kha amaw a voilang kuihphe kya a bu cih, 27te a voilang kuih kya umpaw chitui abang kha a ranglang kuihdung khate Bawipaw malang khe vae sari a hei cih. 28Ranpibawi nynh a kuih kya umpaw chitui abang kha thyaasah athua cih paw ccungccaw a ranglang nakua alia lang, a ranglang kuihpi te a ranglang ccupi, cyiseinaw silawnaw chii noi a thuanaw kyakhe a noi cih. 29Ranpibawi nynh thyaasah athua cih paw ccungccaw ccelang seingaethyanaw kha Bawipaw malang raepya khylan a kuih kya alaepaw chitui kha a lu vawlan khe a thuh cih. 30Te a taening thyhte, vahu anopaw khyhze valaele kha, 31seithyaanaw silawnaw hanlan sa kheit, maee-ute silawnaw hanlan sa kheit, ccathae silawnaw ryte a pya cih; te ranpibawi nynh thyaasah a thuapaw ccungccaw ccelang Bawipaw malang khe seingaethyanaw kha a raepah cih. 32E tuh vaethya ccinaw hoi zah amaw a thyaanaw elang a taening leipaw ccungccaw hanlan phungzae nynh thua.
33 Bawipaw nynh Moses te Aaron kha hynhte a hopya hae:
34Nanning ccou khylan kae pya oh paw Kanaan ram lungkhu he na thua oh te, na ccou oh paw ram kya umpaw innkhakheit kyakhe vaethya ccinaw ka thuasah lanze, 35inn a hoitu nynh ranpibawi kalan a cceih cih zah, “Ka inn kya ccinaw phinkhakheit a umpaw nynh lo,” cite a hopah cih. 36Ranpibawi nynh ccinaw do khylan a ccia mawkhe, inn kha ccawngsah han khylan kaw a pya cih hae, tuhkhyhze tuh inn kya umpaw balyn tuh athyaa leipaw lang a tang cih; tukoute ranpibawi nynh inn do khylan a tee cih. 37Aning nynh ccinaw kha a do cih; ccinaw tuh inn kya-e pang hae kyakhe ahin lante khyhze ase lante um zah, ccangpaw kya laeze akhuhua lante a langku lanze, 38ranpibawi tuh inn thuakaw atolang a pou cih zah inn kha nin sari lungkhu a khaw cih. 39Nin sarinaw nin khe ranpibawi tuh bua yn thua cih zah inn kha a do cih; ccinaw tuh inn kya-e pang hae kya a pazaeku vae ze, 40ccinaw alangkunaw lung hae kha poukhaete khua atolang umpaw athyaa leipaw hmin san kheit kyakhe vua oh cite ranpibawi nynh kaw a pya cih. 41Tuh-e inn alungkhu e anglae rynpaw balyn kha a khawsah cih hae, te a khawnaw hae paw anglae kha khua atolang umpaw athyaa leipaw hmin kya a lae cih hae. 42Ccangpaw lung hae kha a lah cih hae zah atakaw e lung hae a umnaw kyakhe a nungru cih hae, te ccangpaw anglae kha a lah cih hae zah inn kha a be cih hae.
43Aning nynh lung hae kha lah zah inn kya-e anglae rynpaw kha phe khawte bua a bethui koute, inn kya ccinaw bua alangku lanze, 44ranpibawi nynh a cceih cih zah a do cih; ccinaw tuh inn kya phe a pazaeku vae ze, tuh-e tuh inn kya umpaw apazaekuh thyapaw vaethya ccinaw nynh thua; tuh-e tuh thyaa khyh. 45Inn kha a phou cih, inn kya-e lung hae, thing hae te benawpaw anglae balyn kha khua atolang umpaw athyaa leipaw hmin kalan khe a cciakhae cih. 46Tuh-e inn kha phang khaw athua lyakhe, a lungkhu lang a teepaw balyn tuh zete cia thyaa lan khyh; 47te inn lungkhu a ih hae paw balyn nynh mih boeining kha a sukuh cih hae; te inn lungkhu a ae hae paw balyn nynh mih boeining kha a sukuh cih hae.
48Inn kha anglae bethui athua koute ranpibawi nynh do zah inn kya ccinaw tuh a pazaeku vae khyh ze, ranpibawi nynh inn tuh athyaa cite a ho cih; ccinaw tuh dansah athua vae. 49Tuh-e inn athyaanaw hanlan pavaw sa ning kha sidar thing, asepaw laawrui, hyssop ryte a lah cih, 50te pavaw sa kheit kha laephi ang a lungkhu kya accaekuhpaw vadungtui vawlan khe a theih cih, 51te sidar thing, hyssop, asepaw laawrui ryte ahiinpaw pavaw kha a lah cih zah, chia a thuapaw pavaw chii kya te vadungtui kyakhe a dung cih, te inn kha vaesari a hei cih. 52Tuhcite aning nynh inn kha pavaw chii, vadungtui, ahiinpaw pavaw, sidar thing, hyssop, asepaw laawrui khate a thyaasah cih; 53te ahiinpaw pavaw kha khua atolang ramkaw langkhe a zousah cih; tuhcite inn hanlan seingaethyanaw kha a raepah cih zah inn tuh a thyaa cih.
54E hynh vaethya ccinaw aphuinphuin hanlan phungzae nynh thua; laethah hanlan thuasah, 55inn hae kya te boeining kya umpaw vaethya ccinaw hae hanlan thuasah, 56aphinpaw, aphawpaw te ccapoh rawpaw hanlan thuasah, 57hohtuhmou thyaa khyh zah, hohtuhmou athyaa cipaw riasah nawlan nynh thua. E hynh vaethya ccinaw hae hanlan phungzae nynh thua.
Currently Selected:
LEVITIKAS 14: ZB16
Highlight
Copy
Compare
Share
Want to have your highlights saved across all your devices? Sign up or sign in
Zotung Bible © Bible Society of Myanmar, 2016.
