GENESIS 34
34
Dinah kha A Kyngde hae
1Jakob te Leah nynh a saah hae paw mih ccanung Dinah tuh tuh-e ram kya umpaw nopi hae kalan a paebua. 2Tuh-e ram kyaze bawi athuapaw, Hiv minphuinpaw Hamor ccapaw Shekhem nynh Dinah kha he a muih tuh kyngdete ikhae zah a thethyasah. 3Te a thinlung tuh Jakob ccanung Dinah kyakhe phang a um; aning nynh liaccanung kha sungsah zah nebaleih lante bya leih a beih. 4Shekhem nynh a paaw Hamor kha, “E liaccanung hynh ka zu lang yn dypah,” a cipya.
5Jakob nynh a ccanung Dinah kha Shekhem nynh a thethyasah cipaw a ny; thuasalama a ccapaw hae tuh a sahiin hae ryte ramkaw kya a um hae keiccuze Jakob tuh minmin oun thua hae makhia daebabi lan a um. 6Te Shekhem paaw Hamor tuh Jakob te byahoku khylan cceih zah 7tuh lyatuin Jakob ccapaw hae tuh ramkaw kyate la thua hae. Shekhem nynh Jakob ccanung kha ikhae zah Israel minphuin kya ahoy leipaw, cyi lan accan leipaw kha a cyi keiccuze minmin tuh mih thinlungccih zah myarya mih thinria.
8Hamor nynh minmin kyakhe, “Ka ccapaw Shekhem nynh nae ccanung kha a sungsah; tukeiccuze a zu lang beih pya oh. 9Nanning nynh kaening te zudykunaw kha rae oh lah nae ccanung hae kha zu lang oun pya oh, te kae ccanung hae hynh mah zu lang dykuh oh. 10Nanning tuh kaening kya umbua oh lah, e ram tuh nanning elang ua athua cih, e ram kya khuasah oh lah kungkunaw kha rae oh, te na hoi oh paw uccaw tuh nae uccaw lang a tang cih,” a ci. 11Shekhem nynh Dinah a paaw te a raee hae kyakhe, “Ngaethya oun umsah oh lah, na ho oh paw miakaw kae pya cih oh. 12Lasung te mee zemah na ry oh zeihte hokuh oh lah nae ngia oh paw miakaw kae pya cih oh; liaccanung rou kha ka zu lang oun pya oh,” a cipya hae.
13Shekhem nynh mih ccianung Dinah kha a thethyasah keiccuze Jakob ccaaw hae nynh Shekhem te a paaw Hamor kha lingpaw bya te a leih hae. 14Jakob ccaaw hae nynh, “Kae ccianung tuh vingdungawkuh leipaw kalan kae pya kho khyh, pawccecize kae pya zetuh kaening kha the oun thyasah cih. 15Kae nawccaw kho nawlan ccangkheit kyalya um zah tuh-e tuh: nanning nynh kaening hawte pise miakaw vingdung na awkuh cih oh. 16Tuhteze nynh kae ccianung hae kha nae zu lang kae pya cih oh zah nae ccianung hae kha zu lang kae dykuh cih, te nanning kya kae umbua cih zah minphuin phuin kheit lang ah tang cih oh. 17Thuasalama kae bya kha na ngae khyh oh zah vingdung na awkuh khyh oh zetuh kae ccanung kha kae ko cih zah kae cceih vae cih,” a ci hae.
18Mih bya tuh Hamor te a ccapaw Shekhem nynh mih nawccah. 19Te ccangvaepaw tuh Jakob ccanung kha a lungrythua zah cyi lanpaw kha arangte a cyi vae. Aning tuh a innbyn hae balyn kyaze sawtua lan um huapaw nynh thua. 20Oute Hamor te a ccapaw Shekhem nynh mih khua koikua tungkunaw hmin kalan cceih hae zah mih khuaccaaw hae kyakhe, 21“E ccungccaw hae tuh aening te ccawku lan a um hae; ah ram kya khuasah hae sah lah kungku hae sah, pawccecize ah ram tuh minmin hanlan mah phe azawbia; mih ccanung hae kha zu lang dy oh sih lah ah ccanung hae kha mah zu lang dy hae sah. 22Thuasalama minmin nynh vingdung a awku hae hawte aening pise miakaw vingdung ah awku oh ze rou nynh aening ryte umkheih lan te minphuin phuin kheit lang tang lang mih nawccah cih. 23Minmin kya-e sahiin hae, sisua te sahiin-awvaw balyn tuh aening uccaw lang a tang cih khaw? Minmin rynaw kha ah nawccaw ze rou nynh aening kya a umbua cih hae,” a ci hae. 24Hamor te a ccapaw Shekhem nynh a ho hae paw kha a khua koikua kyate a pou hae paw balyn nynh mih nawccah zah pise miakaw tuh vingdung a awkuh vae hae.
Dinah A Raee hae kyate Liarunaw
25Tukoute nin thumnaw kya mih vaemaw a cci lyakhe Jakob ccaaw hae lu ning Simeon te Levi, Dinah a raee hae nynh mih thaloi hae kha lawkuh hae zah aphirute tuh-e khua lungkhu lang tee hae zah pise balyn kha pong a chia hae. 26Hamor te a ccapaw Shekhem kha thaloi te phe a chia hae, te Dinah kha Shekhem inn kyate ko hae zah a cciakhae hae. 27Mih ccianung tuh a thethya vae keiccuze ccangpaw Jakob ccaaw hae nynh a chia vae hae paw ccungccaw hae kalan cceih hae zah, khua kha thiing hae zah 28mih sahiin hae, mih lann hae, te khua kya te loo kya umpaw atyn-are kha phe lawpya hae. 29Mih sisua balyn, mih ccaaw hae balyn te mih zu hae, inn kya umpaw balyn kha pong lua hae zah a cciakhae hae. 30Oute Jakob nynh Simeon te Levi kha, “E ram kya umpaw Kanaan hae te Periz hae nynh kamaw kha nae huasah vae oh keiccuze vawsawnaw nae thuakhaepya vae oh; ka ccungccaw hae tuh a zya hae, te minmin nynh sueluakuh hae zah kamaw kha rawsete oun tuk hae zetuh kamaw te ka innbyn hae tuh kae chih vae cih,” a cipya hae. 31Thuasalama minmin nynh, “Kae ccianung tuh ohhuanung hawte cyisah lan accan tou?” a ci hae.
Currently Selected:
GENESIS 34: ZB16
Highlight
Copy
Compare
Share
Want to have your highlights saved across all your devices? Sign up or sign in
Zotung Bible © Bible Society of Myanmar, 2016.
