GENESIS 33
33
Jakob te Esau Tungkunaw
1Jakob nynh dothung zah Esau te ccungccaw za pali oun ccia hae paw kha a muih. Tukeiccuze imua hae kha Leah, Rachel te seenung lu ning kyakhe a nee hae. 2Seenung hae kha mih ccaaw hae ryte malang khe a nung hae, tukoute Leah te a ccaaw hae, te Rachel te Josef kha nulang kou khe a nung hae. 3Jakob tuh minmin malang khe cceih zah a upaw pe a thua maw laephi kya vae sari a bakhung.
4Esau nynh Jakob kha ccuenua zah phang a pom, te Jakob kha myng zah lu ning te a rawkhaekuh hae. 5Esau nynh dothung zah nopi hae te ccaaw hae kha he muih tuh, “Namaw kya a um hae paw khuh hum hae mou?” cite khia zah Jakob nynh, “Pachia nynh na seepaw kae kha thawccinawte yn pyapaw ccaaw hae nynh thua hae,” a ci. 6Oute seenung hae tuh mih ccaaw hae ryte oun naekuh hae zah a bakhung hae; 7Leah tuh a ccaaw hae ryte oun naekuh hae zah a bakhung hae; te nyathyakou kya Josef te Rachel oun naekuh hae zah a bakhung hae. 8Esau nynh, “Kae tungkuhpaw aphu hae balyn kha paw suilan mou athua?” cite khia zah Jakob nynh, “Ka bawipaw, na malang maehoynaw ka mue ccaw cite kae saw hae paw nynh thua,” cite a leih. 9Thuasalama Esau nynh, “Ka neitaw, phe azaw lan mang ka hoi; na hoipaw kha namaw hanlan nungkuh,” a cipya. 10Jakob nynh, “Tuhte thua khyh, na malang maehoynaw ka mue zetuh kae pyapaw lasung hynh yn lawpakuh; pawccecize hynhcite maehoynaw he ka mue tuh na mitmae muihpaw hynh Pachia mitmae muihpaw te nynh a loku. 11Namaw kalan kae ccyngpyapaw ka lasung hynh beih yn lawpakuh, Pachia nynh thaw yn ccih zah ka rypaw tynre kha yn pya,” a ci. Jakob nynh Esau kha a soihbia keiccuze Esau nynh khah-e kha a lawku.
12Oute Esau nynh, “Cceih ccavae oh sih, kamaw laan ka maw cih,” a ci. 13Thuasalama Jakob nynh Esau kha, “Ka bawipaw, imua hae tuh mih thaw azya, tuu hae, miaa hae te vaetua hae tuh mih taw hae ryte ka do-oih lan hae paw nynh thua cipaw kha na ny; arangte eih ka cciakhae hae zetuh sahiin hae hynh nin kheit mawte pong chih cih hae. 14Tukeiccuze ka bawipaw, nang tuh ka malang la cceihlo, kae tuh ka malang umpaw sahiin hae te imua hae nynh a ccia kho hae thyhte ka bawipaw na umnaw Seir ram kae thua makhia byabyate kae cciakhae cih hae,” a ci.
15Te Esau nynh, “Ka kya umpaw ccungccaw abang hynh na kyakhe kae cciataw hae sah,” a ci. Thuasalama Jakob nynh, “Pawccemou ka bawipaw nang nynh ka tungvaw hynhcih baban na hoy?” a ci. 16Te Esau tuh tuh-e nin khe Seir ram lang bua a ki. 17Jakob tuh Sukkoth#33.17 Sukkoth cipaw tuh Bu cipaw nynh thua. lang cceih zah amaw hanlan inn te a sahiin hae hanlan bu kha a sak; tukeiccuze tuh-e hmin tuh Sukkoth a ci hae.
Jakob Shekhem A Thua
18Jakob tuh Mesopotamia ram kyate yn ki zah Kanaan ram umpaw Shekhem khua kya khyndadyh lante a thua; te tuh-e khua malang khe bu kha a sakku. 19Te Shekhem paaw Hamor a ccapaw hae kyate bu a saknawpaw laephi hmin kha ngunphua za kheit te a re.#Jos 24.32; Joh 4.5 20Tuin kyakhe silawhang kha rae zah El, Elohe-Israel#33.20 El, Elohe-Israel cipaw tuh Pachia, Israel Pachia cipaw nynh thua. cite min a phu.
Currently Selected:
GENESIS 33: ZB16
Highlight
Copy
Compare
Share
Want to have your highlights saved across all your devices? Sign up or sign in
Zotung Bible © Bible Society of Myanmar, 2016.
