GENESIS 30
30
1Rachel nynh Jakob hanlan ccaaw a saahpya khyhpaw kha he nyhkuh tuh, a unung tungvaw a eiung zah Jakob kha, “Ccaaw yn pya, tuhkhyhze ka chih vae cih,” a cipya. 2Jakob nynh Rachel tungvaw myarya a thinria zah, “Kae tuh ccaawsaahnaw kaw ae pya leipaw Pachia lang tou nae ria?” a cipya. 3Oute Rachel nynh, “Ka seenung Bilhah hein kya mang um; cceih lah ikhae tua, aning tuh ccaaw a saah kho, aning liate kae zemah ccaaw ka hoi kho,” a ci. 4Tukeiccuze aning nynh a seenung Bilhah kha Jakob zu lang a pya; te Jakob nynh seenung kha a ikhae. 5Bilhah nynh ccaawpoi zah Jakob kha ccapaw lu kheit a saahpya. 6Oute Rachel nynh, “Pachia nynh kamaw hanlan bya yn piapya vae, ka roi kha mah Pachia nynh yn thaepah zah ccapaw lu kheit yn pya vae,” a ci; tukeiccuze Dan#30.6 Dan cipaw hynh Hebru bya te Bya a pia cite roi apoupaw te nynh aloku. cite min a phu. 7Rachel seenung Bilhah nynh ccaaw bua poi zah Jakob kha lu ningnaw ccapaw a saahpya. 8Oute Rachel nynh, “Ka unung tae khylan ka zuakuh zah phe ka tae vae,” a ci; tukeiccuze Naftali#30.8 Naftali cipaw hynh Hebru bya te zuaku cite roi apoupaw te nynh aloku. cite min a phu.
9Leah nynh a ccasaah ady vae paw kha he a nyhkuh tuh, a seenung Zilpah kha ko zah Jakob zu lang a pya. 10Tukoute Leah seenung Zilpah nynh Jakob kha ccapaw lu kheit a saahpya. 11Te Leah nynh, “Ka vehoy,” a ci. Tukeiccuze Gad#30.11 Gad cipaw hynh Hebru bya te vehoy cite roi apoupaw te nynh aloku. cite min a phu. 12Leah seenung nynh Jakob kha lu ningnaw ccapaw a saahpya. 13Te Leah nynh, “Lungtuanung nynh ka thua! Pawccecize nopi hae nynh a lungtuanung cite yn ko cih hae,” a ci; tukeiccuze Asher#30.13 Asher cipaw hynh Hebru bya te lungtua cite roi apoupaw te nynh aloku. cite min a phu.
14Ccathae rue ccyh he thua tuh, Reuben nynh cceih zah loo kya mandarek kha muih zah a nung Leah kalan a thuakhae. Rachel nynh Leah kha, “Thawccinawte na ccapaw kya-e mandarek abang kha yn pyabua,” a cipya. 15Thuasalama Leah nynh, “Ka vawpaw na ccuekhaepaw hynh adihpaw uccaw thua zawtou? Ka ccapaw kya-e mandarek hynh mah ccuekhae na ry ung tou?” a ci. Rachel nynh, “Na ccapaw kya-e mandarek nae pya zetuh atu khuazi Jakob te na ihkheih cih oh,” a cipya. 16Zete ccyh kya Jakob nynh loo kyate he yn thua tuh, Leah nynh cciadue zah, “Kamaw kalan na ryabua cih; pawccecize nang kha ka ccapaw kya-e mandarek te phe kae hoh vae,” a cipya. Tukeiccuze tuh-e khuazi kya Jakob tuh Leah te a ihkheih hae. 17Pachia nynh Leah kha thaepah zah ccaaw a poi, te Jakob hanlan lu pangawnaw ccapaw a saahpya. 18Leah nynh, “Ka seenung kha ka vawpaw kalan ka pya keiccuze Pachia nynh amee yn pya,” a ci; tukeiccuze Issakhar#30.18 Issakhar cipaw hynh Hebru bya te amee cite roi apoupaw te nynh aloku. cite min a phu. 19Te Leah nynh ccaawpoi zah Jakob hanlan lu taruhnaw ccapaw lu kheit a saahpya. 20Oute Leah nynh, “Ahoypaw lasung ccangkheit kha Pachia nynh yn pya; ccapaw lu taruh ka saahpya vae keiccuze ka vawpaw nynh kae kha yn thehoysah cih,” a ci; tukeiccuze Zebulun#30.20 Zebulun cipaw hynh Hebru bya te lasung ka ccou cite roi apoupaw te nynh aloku. cite min a phu. 21Tukoute Leah nynh ccanung lu kheit saah zah Dinah cite min a phu.
22Oute Pachia nynh Rachel kha liathuite a bya ngaepah zah ccaawsaah khonaw a pya. 23Aning nynh ccaawpoi zah ccapaw lu kheit saah zah, “Saryanaw ka teingpaw kha Pachia nynh yn lawpya vae,” a ci; 24te Rachel nynh Josef#30.24 Josef cipaw hynh Hebru bya te yn pyachih cite roi apoupaw te nynh aloku. cite minphu zah, “Bawipaw nynh ccangpaw ccapaw kha yn pya hin vae sah,” a ci.
Jakob te Laban Hoirumnaw Neekunaw
25Rachel nynh Josef he a saah tuh, Jakob nynh Laban kha, “Ka inn te ka ram lang yn cciasah ccavae. 26Ka ryalaw mee ka zu hae te ka ccaaw hae kha yn pya hae lah, ka la cceih ccavae; pawccecize myarya hoy lan rya kae lawpyapaw kha phe na ny,” a ci. 27Laban nynh Jakob kha, “Byahonaw kaw yn pyatua, Bawipaw nynh namaw liate hythua yn pya cipaw ka ny; 28na ryalaw mee hokuh lah kae pya cih,” a cipya. 29Jakob nynh, “Pawcihtemou rya kae lawpya cipaw te pawcihtemou na sahiin hae hynh kamaw kya a um hae cipaw phe na ny. 30Pawccecize ka thua maw tuh beihtaraw nynh na hoi, atu tuh myarya alungthung vae; te pawpaw kya ka ccia zemah Bawipaw nynh nang kha hythua ae pya. Ka innbyn hae so hohtuhmou ka do-oih cih hae?” a cipya. 31Tukeiccuze Laban nynh, “Pawmou kae pya cih?” cite khia zah Jakob nynh, “Pawpaw mah nae pya lan khyh. E uccaw hynh nae cyipya zetuh na sahiin hae kha bua ka dang cih hae zah ka rin ung cih hae: 32atunin na sahiin hae balyn laku ka la khiakuh cih zah apyaapaw te ccapoh-ccapoh apyaapaw tuu hae te man phaphuhpaw tuu taraw miakaw, te miaa hae lakuze apyaapaw te ccapoh-ccapoh apyaapaw miakaw kha ka phia cih hae zah tuh-e hae tuh ka ryalaw mee athua cih hae. 33Te ka ryalaw mee kha do khylan nyalang he nae thua te, ka dingnaw nynh kamaw kha yn thungkhaw cih. Miaa hae lakuze apyaa leipaw te ccapoh-ccapoh apyaa leipaw miakaw, te tuu taraw hae lakuze man phaphuh leipaw miakaw kha he na muih zetuh ka rupaw athua cih,” a ci. 34Laban nynh, “Ahoy! Na ho hawte thua vae sah,” a ci. 35Thuasalama tuh-e nin khe Laban nynh ccapoh-ccapoh apyaapaw te apyaapaw miaatepaw hae te miaapinung hae, mih pyn kya apyaapaw miakaw te man phaphuhpaw tuu taraw miakaw kha a ccapaw hae a rinsah hae; 36te Jakob umnaw te amaw umnaw kha nin thum laanccia a sawsakuh hae, te Laban kya-e alaepaw tuu hae te miaa hae kha Jakob nynh a rinbia hae.
37Oute Jakob nynh poplar thing, almond thing te plane thing ahinpaw akaran hae kha lah hae zah akaloh he kia hae tuh araw lante apyaa vae hae. 38Te tuu hae, miaa hae nynh tui nia lan oun ccia vae hae ze, sahpaw a dekuh ccaw hae cite tuh-e thingpyng hae kha sahiin tui nianawpaw kua malang khe a bing. 39Tukeiccuze tuu hae, miaa hae nynh tuh-e akaran hae malang khe sahpaw dekuh hae zah apyaapaw, ccapoh-ccapoh pyaapaw, aphae lante pyaapaw lang a than vae hae. 40Jakob nynh tuutaw hae kha phia hae zah Laban sahiin hae kya-e pong aman hae paw te apyaa hae paw kalan khe mih mae hawi sah hae; te a sahiin phu hae kha phia hae zah Laban sahiin hae te nungkheih khyh hae. 41Athawsaepaw sahiin hae nynh sahpaw he a ry vae hae ze, thingpyng hae laku khe sahpaw dekuh hae sah cite Jakob nynh thingpyng hae kha sahiin hae malang kua kyakhe a bingpya hae, 42thuasalama anyaa hae paw nynh sahpaw a ry hae zetuh mih malang thingpyng kha nungpah khyh hae; tukeiccuze anyaa hae paw tuh Laban kya-e thua hae zah athawsae hae paw tuh Jakob kya-e nynh thua hae. 43Tukeiccuze Jakob a hoirumnaw tuh lungthung zah sahiin phu patae, seepaw hae te seenung hae, kalauh hae te lann hae kha a hoi.
Currently Selected:
GENESIS 30: ZB16
Highlight
Copy
Compare
Share
Want to have your highlights saved across all your devices? Sign up or sign in
Zotung Bible © Bible Society of Myanmar, 2016.
