GENESIS 29
29
Jakob te Rachel Tungkunaw
1Jakob nynh po cceih zah nithua lang umpaw ccungccaw hae ram kya a thua. 2Jakob nynh dothung zah loo kya tuisung ccangkheit te tuh-e pe a rya hae paw tuu sa thum kha a muih; pawccecize tuuphu kha tuh-e tuisung kya tui leih a niasah hae. Tuisung ahukuhpaw lung tuh myarya ale. 3Tuu hae balyn nynh tuin kya a tungkuh vae hae ze, tuurin hae nynh tuisung ahukuhpaw lung kha nue hae zah tuu hae kha tui a niasah hae, te lung kha a umnaw kya bua leih a nung hae.
4Jakob nynh minmin kha, “Ka u te ka neitaw hae, tei te mou nae thua oh?” cite khia hae zah, minmin nynh, “Haran khua te nynh kae thua,” a ci hae. 5Jakob nynh minmin kha, “Nahor ccapaw Laban kha na nyh oh tou?” cite khia hae zah, minmin nynh, “Kae nyh,” a ci hae. 6Te aning nynh, “Ngedante a um tou?” cite khia hae zah, minmin nynh, “A dan, a ccanung Rachel mah tuu hae ryte yn thua cih,” a cipya hae. 7Te Jakob nynh, “Khuanin myarya asae ung; sahiin hae kha pynkheihlan suelua ccyh thua loh khyh. Tuu hae hynh tui niasah oh, cceih oh lah, paeesakuh hin oh,” a cipya hae. 8Thuasalama minmin nynh, “Tuu hae balyn kha pynkheihlan kae suelua zah tuisung ahukuhpaw lung kha kae nue makhia tuh tui kae niasah kho khyh hae; lung kae nue koute nynh tuu hae kha tui kae niasah hae,” a ci hae.
9Tuhte aning nynh minmin ryte bya a hokuh cciamang lya hae khe Rachel tuh a paaw tuu hae ryte yn thua vae; pawccecize Rachel tuh a paaw tuu a rintu nynh thua. 10Jakob nynh a nung raeepaw Laban ccanung Rachel te a nung raeepaw Laban a tuu hae kha a muih tuh, cceihthung zah tuisung ahukuhpaw lung kha a nue, te a nung raeepaw Laban tuu hae kha tui a niasah hae. 11Oute Jakob nynh Rachel kha myng zah thawte a rah. 12Te Jakob nynh Rachel kha, “Kae tuh na paaw ccianung Rebekah ccapaw nynh ka thua,” cite a hopya; Rachel nynh ccue zah, a paaw kha a hopya.
13Laban nynh a ccianung ccapaw kong kha a thae tuh, tungku khylan a ccuenua; Laban nynh aning kha pom zah a myng, te a inn lang a cciakhae. Jakob nynh Laban kha a konglang pong a hopya. 14Laban nynh Jakob kha, “Nang tuh ka ru te ka saw ccaccing nynh na thua,” a cipya. Te Jakob tuh Laban kya sawpaw sah kheit a umbua.
Jakob nynh Laban Ccanung Zu lang A Dy
15Oute Laban nynh Jakob kha, “Nang tuh ka uno na thua keiccuze alakawte rya nae lawpya lan accan zawtou? Na ryalaw mee hohzeihmou?” a cipya. 16Laban tuh ccanung lu ning a hoi; atawccanung min tuh Leah cikuh zah asoinung min tuh Rachel acikuh. 17Leah mitdae tuh sungsah lan a um, thuasalama Rachel tuh a pynrua hoy zah a puithya. 18Jakob nynh Rachel kha a sungsah; tukeiccuze Jakob nynh, “Na ccasoinung Rachel hanlan kum sari rya kae lawpah cih,” a ci. 19Laban nynh, “Rachel hynh ccangpaw pise lukhakheit kha pya laeze nang kae pyapaw tuh ahoyhua; kamaw kya umbua,” a cipya. 20Tukeiccuze Jakob nynh Rachel mue khylan kum sari rya a lawpya, Rachel tungvaw a hoipaw sungsahnaw keiccuze tuh-e kum sari tuh nin beihtaraw lan nynh a ria.
21Oute Jakob nynh Laban kha, “Kamaw te ikheih khylan ka zu kha yn pya ccavae, pawccecize accyh phe ccing vae,” a cipya. 22Tukeiccuze Laban nynh a umnaw e ccungccaw hae kha pynkheihlan suelua hae zah poi a tua. 23Thuasalama zete riryngmoh khe Laban nynh a ccanung Leah kha Jakob kalan a thuakhae; te Jakob nynh a ikhae. 24(Laban nynh a seenung Zilpah kha a ccanung Leah hanlan a thosakhaeku). 25Awkhua he thua tuh, Leah nynh athua cipaw Jakob nynh he nyh te, Laban kyakhe, “Pawcce ka tungvaw hynhte na cyi? Rya kae lawpyapaw kha Rachel mue khylan thua khyh tou? Pawcce nae ling?” a cipya. 26Laban nynh khung zah, “Kaening ram kya tuh asoinung nynh atawccanung laeze tungtuh ty phung thua khyh. 27Zuvaw lang na tangnaw oh hynh naw kheit ccing hin sah, te kum sari cia rya bua nae lawpya ung zetuh Rachel kha kae pya cih,” a cipya. 28Jakob nynh a nawccah zah zuvaw lang a tangnaw hae kha naw kheit a ccingsah; tukoute Laban nynh a ccanung Rachel kha Jakob zu lang a pya. 29(Laban nynh a seenung Bilhah kha a ccanung Rachel hanlan a thosakhaeku). 30Tukeiccuze Jakob nynh Rachel kha mah a ikhae vae, te aning nynh Rachel kha Leah laeze a sungsahua. Jakob nynh Laban kha kum sari cia rya bua a lawpya.
31Jakob nynh Leah a sungsah khyhpaw kha Bawipaw nynh he a nyh tuh, Leah kha ccaawsaah khonaw a pya; thuasalama Rachel tuh a tiin. 32Leah nynh ccaawpoi zah ccapaw lu kheit a saah, a min tuh Reuben#29.32 Reuben cipaw hynh Hebru bya te Muih cite roi apoupaw te nynh aloku. cite a phu; pawccecize Leah nynh, “Ka vawsawnaw kha Bawipaw nynh yn muihpya vae; tukeiccuze ka vawpaw nynh yn sungsah ccaccing vae cih,” a ci. 33Leah nynh ccaaw bua poi zah ccapaw lu kheit saah zah, “Huanaw ka teingpaw kha Bawipaw nynh thae zah, e ccapaw hynh mah yn pya,” cih zah Semeon#29.33 Semeon cipaw hynh Hebru bya te Thae cite roi apoupaw te nynh aloku. cite min a phu. 34Aning nynh ccaaw bua poi zah ccapaw lu kheit saah zah, “Ccapaw lu thum ka saahpya keiccuze atu tuh ka vawpaw nynh kamaw kya ccavyng a mungkuh vae cih,” a ci; tukeiccuze Levi#29.34 Levi cipaw hynh Hebru bya te Mungku cite roi apoupaw te nynh aloku. cite min a phu. 35Leah nynh ccaaw bua poi zah ccapaw lu kheit saah zah, “Atu tuh Bawipaw kha the ka hoysah vae cih,” a ci; tukeiccuze Judah#29.35 Judah cipaw hynh Hebru bya te Thehoysah cite roi apoupaw te nynh aloku. cite min a phu; oute aning tuh a ccasaah ady vae.
Currently Selected:
GENESIS 29: ZB16
Highlight
Copy
Compare
Share
Want to have your highlights saved across all your devices? Sign up or sign in
Zotung Bible © Bible Society of Myanmar, 2016.
