EXODUS 40
40
Boei Beikbu Thadynsahnaw
1 Bawipaw nynh Moses kha hynhte a hopya: 2Masaty sawpaw kya-e masaty nin kyakhe tungkunaw beikbu kha na sak cih. 3Tuh-e beikbu lungkhu khe byakin thingkua kha na nung cih, te thingkua kha zokhawpaw boei khate na zokhaw cih. 4Ccaboi kha a lungkhu lang na teekhae cih zah a uccaw hae balyn kha na paccyn cih hae; te maeekhuatung kha na teekhae cih zah maeekhua hae kha na aw cih. 5Zimuin hanlan sui silawhang kha byakin thingkua malang khe na nung cih, te beikbu thuakaw kyakhe zokhawpaw boei kha na zo cih. 6Maee-ute silawnawpaw silawhang kha tungkunaw bu kya-e beikbu thuakaw malang khe na nung cih, 7te pakepi kha tungkunaw bu te silawhang laku khe na nung cih zah a lungkhu khe tui na the cih. 8Voidu kha po voilu lan na rae cih zah, voidu sakoih kyakhe zokhawpaw boei kha na zo cih. 9Oute thuhkupaw chitui kha na lah cih zah beikbu te a lungkhu umpaw balyn kha na thuh cih, beikbu te a ccinccang balyn kha na thyaasah cih, ou tuhte beikbu tuh athyaapaw lang a tang cih. 10Maee-ute silawnawpaw silawhang te a uccaw balyn kha mah chitui na thuh cih zah silawhang kha na thyaasah cih, ou tuhte silawhang tuh myarya athyaapaw lang a tang cih. 11Pakepi te a ccu kha mah chitui na thuh cih zah na thyaasah cih. 12Oute Aaron te a ccapaw hae kha tungkunaw bu thuakaw kalan na cciakhae cih hae zah tui te na sing cih hae, 13te Aaron nynh ranpibawi lante rya oun lawpya ccaw cite athyaapaw boeining kha na lawsakuh cih, chitui na thuh cih zah na thyaasah cih. 14A ccapaw hae kha mah na cciakhae cih hae zah angki kha na kisakuh cih hae, 15te mih paaw kha chitui na thuh hawkhate chitui na thuh cih hae zah ranpibawi hae lante ka rya kha a lah cih hae: tuh-e chitui thuhnaw tuh nynh yn thua cih paw she takyh kya minmin kha ranpibawi lang zungzae a tangsah cih hae.
16 Bawipaw nynh kaw a pya thyhte Moses nynh atyn-are kha pong a cyi. 17Kum ningnaw kya masaty sawpaw kya-e masaty nin kyakhe beikbu kha a sak. 18Moses nynh beikbu kha a sak; beikbu accusy hae kha a nung hae, pang hae kha a thung hae, te puihnawpaw ccong hae kha ruh zah tung hae kha a thadynsah; 19beikbu a vawlan khe dawpaw kha a daw, tuh-e dawpaw vawlan khe ccangpaw dawpaw kha bua a dawthin; tuh-e tuh Bawipaw nynh kaw a pya thyhte Moses nynh a cyipaw nynh thua. 20Moses nynh byakinnaw kha lah zah thingkua lungkhu khe a sang, puihnawpaw ccong hae kha ruh hae zah ahu kha thingkua vawlan khe a hu; 21te thingkua kha beikbu lungkhu lang teekhae zah zokhawpaw boei khate byakin thingkua kha phang a zokhaw; tuh-e tuh Bawipaw nynh kaw a pya thyhte Moses nynh a cyipaw nynh thua. 22Ccaboi kha tungkunaw bu alungkhu, beikbu palung lang, zokhawpaw boei atolang khe a nung, 23Bawipaw malang, ccaboi vawlan khe sanlou kha a nung; tuh-e tuh Bawipaw nynh kaw a pya thyhte Moses nynh a cyipaw nynh thua. 24Maeekhuatung kha tungkunaw bu lungkhu, ccaboi te arawsekuh lante beikbu alia langkhe a nung, 25te maeekhua hae kha Bawipaw malang khe a aw; tuh-e tuh Bawipaw nynh kaw a pya thyhte Moses nynh a cyipaw nynh thua. 26Sui silawhang kha tungkunaw bu lungkhu, zokhawpaw boei malang khe nung zah, 27amynkhuhpaw zimuin kha tuh-e silawhang vawlan khe a pya; tuh-e tuh Bawipaw nynh kaw a pya thyhte Moses nynh a cyipaw nynh thua. 28Beikbu thuakaw kyakhe zokhawpaw boei kha a zo. 29Bawipaw nynh Moses kya kawpya thyhte maee-ute silawnawpaw silawhang kha tungkunaw bu thuakaw kyakhe a nung, te tuh-e silawhang vawlan khe maee-ute silawnaw te ccathae silawnaw kha a rae. 30Pakekhupaw kha tungkunaw bu te silawhang laku khe nung zah alungkhu khe singkunaw lanpaw tui kha a ccae, 31tuh-e tui khate Moses, Aaron te a ccapaw hae nynh mih kuih te mih ccu kha a singku hae. 32Minmin nynh tungkunaw bu lungkhu lang tee hae zah silawhang kalan he a naekuh hae te, a singku hae; tuh-e tuh Bawipaw nynh kaw a pya thyhte Moses nynh a cyipaw nynh thua. 33Beikbu te silawhang po koihlu lante voidu kha thadynsah zah, voidu sakoih kyakhe zokhawpaw boei kha a zo. Ou tuhte Moses nynh ryalaw kha a thangsah.
Maeking te A Phu-enaw
(Nam 9.15-23)
34Maeking nynh tungkunaw bu kha phang a bong, te Bawipaw phu-enaw tuh beikbu kya phe a beih.#1Si 8.10-11; Isa 6.4; Eze 43.4-5; Bya 15.8 35Maeking nynh tungkunaw bu kha phang bong zah Bawipaw phu-enaw nynh beikbu kya phe abia keiccuze Moses tuh tungkunaw bu lungkhu lang tee kho khyh. 36Beikbu kyate maeking kha hangthung a thua takyh vae ze, Israel hae tuh san kheit kyate san kheit lang leih a cceih hae, 37thuasalama maeking kha hangthung nin a thua makhia tuh mih malang cceih khyh hae. 38Pawccecize Israel ccungccaw balyn nynh a ccianaw takyh hae, mih malang khe Bawipaw maeking tuh khuadae ccyh kyaze beikbu vawlan um zah, khuazi ccyh kyaze maeking kyakhe maee a um.
Currently Selected:
EXODUS 40: ZB16
Highlight
Copy
Compare
Share
Want to have your highlights saved across all your devices? Sign up or sign in
Zotung Bible © Bible Society of Myanmar, 2016.
