EXODUS 39
39
Ranpibawi hanlan Boeining
(Exo 28.1-14)
1Apiazon, sephaphuhpaw, asepaw law te nebaleih lan a kua hae paw boeining kha hmin thyaapaw kya ryalaw nawlan a rae hae; Bawipaw nynh Moses kya kaw a pya thyhte minmin nynh athyaapaw boeining kha Aaron hanlan a raepya hae.
2Bezalel nynh ranpibawi angkiccua kha sui te thuasah, meizong, sephaphuhpaw, asepaw law te nebaleih lan kuakuhpaw boeining te thuasah a rae. 3Sui pahsadyapaw kha tude zah arui lang a rae koute meizong, sephaphuhpaw, asepaw law te nebaleihpaw laaw te akuakuhpaw boei kyakhe pungsan kou puithya lante a raede. 4Raw kya bawkunawpaw arui ccangning kha angkiccua hanlan rae hae zah arui adung hae san ning te angkiccua kyakhe a huide hae. 5Bawipaw nynh Moses kya kaw a pya thyhte angkiccua vawlan khe byccia kha mah angkiccua hawte sui te thuasah, meizong, sephaphuhpaw, asepaw, nebaleihpaw laaw te akuakuhpaw boei te thuasah a rae hae.
6Oniks lung hae kha paccyn hae zah sui ang lungkhu khe a be hae, tazeih kya minkhia hawte Israel ccapaw hae mih min thyhte lung kyakhe a khia hae. 7Bawipaw nynh Moses kya kaw a pya thyhte Israel ccapaw hae kha ning leinawpaw lung hae lang a tang ccaw hae cite tuh-e lung hae tuh raw kya bawkupaw angkiccua arui hae vawlan khe a raede hae.
8Aning nynh bybe kha angkiccua a rae hawkhate sui te thuasah, meizong, sephaphuhpaw, asepaw, te nebaleihpaw laaw te akuakuhpaw boei khate thuasah kou hoy lan a rae. 9Tuh-e bybe tuh asaepaw te akopaw alokuh; thyh ning lang abikuh lante khaw kheit sae zah khaw kheit ako lante a rae. 10Bybe kyakhe lung hae kha ring pali lante a bede hae. Masaty ring kya tuh karnelian, krisolite te emeral; 11ring ningnaw kya tuh emeral, safaiar te daimon; 12ring thumnaw kya tuh jasin, agate te amethist; 13ring palinaw kya tuh beril, oniks te jasper nynh thua hae; tuh-e lung hae kha sui ang kyakhe a nung hae. 14Israel ccapaw hae mih min a khiakuhpaw lung ccanghaw lae ning a um; tuh-e hae tuh tazeih hae hawte thua zah minphuin phuin haw lae ning hanlan lung ccangkheit kyaze min minkheit cci a um. 15Arui hawte ruepaw, sui ccipaw te raepaw arui kha bybe vawlan khe a rae hae; 16sui ang ccangning te sui bawtary ccangning kha rae hae zah bawtary ccangning kha bybe apaki avawlan khe a tyngde hae; 17sui rui ccangning kha bybe apaki kya umpaw bawtary ccangning kyakhe a khii hae. 18Sui rui ccangning hae kya-e adung san ning kha sui ang ccangning kyakhe a khii hae; tuhawte tuh-e tuh angkiccua araw kya bawkupaw arui a malang khe a tyngde hae. 19Oute sui bawtary ccangning kha rae zah, bybe alia lang apaki kyakhe alungkhu langte ranpibawi angki te phang bekuh lante a tyngde. 20Sui bawtary ccangning kha rae hae zah angkiccua araw vawlan bawkupaw arui ccangning alia lang kya-e a malang khe a tyngde hae; tuh-e tuh angkiccua kya-e accaankuhpaw byccia palung lang kya nynh a tyngde hae. 21Bybe sui bawtary hae khate angkiccua bawtary hae kha meizong arui khate a khiide hae, ou tuhcite Bawipaw nynh Moses kya kaw a pya thyhte bybe tuh angkiccua kya umpaw byccia aluki khe um zah phoukuh vae khyh.
22Angkiccua vawlan e angkile kha meizong kyalya te kua zah a rae; 23te tuh-e angkile angaelung khe lu hoihku nawlan a ua san kheit um zah a ua tuh seikuh nan sah cite kuapaw uccawsah te angki a nging hawkhate po voilu lan a mia hae. 24Tuh-e angkile alia langkhe meizong, sephaphuhpaw, asepaw, te nebaleihpaw laaw te akuakuhpaw boei te ccalee thae kha a rae hae. 25Khinling hae kha athyaapaw sui ccipaw te rae hae zah, angkile alia langsang umpaw ccalee thae hae laku khe po voilu lan a raede; 26khinling te ccalee thae kha ataeleihkuh lante rae zah Bawipaw nynh Moses kya kaw a pya thyhte ranpibawi ryalaw nawlan angkile kha a rae hae.
27Aaron te a ccapaw hae hanlan ahoypaw law te kuakuhpaw angkile kha thuasah, 28nebaleihpaw laaw te akuakuhpaw pungde kha thuasah, nebaleihpaw laaw te akuakuhpaw lukhung kha thuasah, nebaleihpaw laaw te kuakuhpaw dya adynpaw kha thuasah, 29haetapaw soikuhpaw uccawsah, meizong, sephaphuhpaw, asepaw, nebaleihpaw laaw te akuakuhpaw taeccia kha mah phynbang te kou puithya lan a ccaan hae; tuh-e balyn kha Bawipaw nynh Moses kya kaw a pya thyhte a rae hae.
30Lukhung aphepaw kha sui ccipaw te rae hae zah tazeih kya minkhia hawte, “Bawipaw hanlan Athyaapaw” cite min a khia hae. 31Apiazon arui khate pungde vawlan khe a khiide hae; tuh-e tuh Bawipaw nynh Moses kya kaw a pya thyhte a rae hae.
Rya Lynnaw
(Exo 35.10-19)
32Ou tuhte tungkunaw bu kya-e beikbu ryalaw balyn tuh a thang vae; Bawipaw nynh Moses kya kaw a pya thyhte Israel hae nynh atyn-are kha a cyi vae hae. 33Oute minmin nynh beikbu kha Moses kalan cciakhae hae zah avawlan te dawpaw te a uccaw balyn, bawnawpaw hae, pang hae, pangccaw hae, tung hae te ccusy hae kha thuasah; 34Avawlan te dawpaw, anangkuh vae paw tuutepaw phua te avawlan te dawpaw, saphua ahoypaw te zokhawpaw boei kha thuasah; 35byakin thingkua, puihnawpaw ccong hae te thingkua ahu kha thuasah; 36ccaboi te a uccaw hae balyn, Umkhaenaw Sanlou kha thuasah; 37athyaapaw maeekhuatung te a maeekhua hae te a uccaw hae, te maee aw nawlan chitui kha thuasah; 38sui silawhang, thuhkupaw chitui, amynthuapaw zimuin, bu thuakaw kya zokhawpaw boei kha thuasah; 39sohin te raepaw silawhang, sohin pasaryh, puihnawpaw ccong hae te a uccaw balyn kha thuasah; pakepi te a thadynnawpaw kha thuasah; 40voidu kya zokhawpaw boei hae, a tung hae, a ccusy hae, voidu thuakaw kya zokhawpaw boei, arui hae, a pangreih hae kha thuasah, beikbu kya ryalawnaw lanpaw uccaw balyn, tungkunaw bu kya-e uccaw balyn kha thuasah; 41hmin thyaapaw kya ryalaw nawlan kou hoy lan raepaw boeining hae, ranpibawi Aaron hanlan athyaapaw boeining hae, a ccapaw hae nynh ranpibawi rya a lawnaw hae paw boeining hae kha thuasah Moses kalan a cciakhae hae. 42Bawipaw nynh Moses kha kaw a pya thyhte Israel hae nynh ryalaw balyn kha a law hae. 43Bawipaw nynh kawpya thyhte minmin nynh ryalaw balyn pong a law hae paw kha Moses nynh he a muih tuh minmin kha hythua a pya hae.
Currently Selected:
EXODUS 39: ZB16
Highlight
Copy
Compare
Share
Want to have your highlights saved across all your devices? Sign up or sign in
Zotung Bible © Bible Society of Myanmar, 2016.
