EXODUS 25
25
Beikbu hanlan Ahlu
(Exo 35.4-9)
1 Bawipaw nynh Moses kha, 2“Kamaw hanlan ahlu ccyng lan Israel hae kha hopah hae; nang kha pya lan mih thinlung atho thyhte a pya hae paw balyn kya-e ahlu kha kamaw hanlan na lah cih. 3Minmin kyate na law lanpaw ahlu tuh: sui, phua, sohin, 4meizong, sephaphuhpaw, asepaw, nebaleihpaw boei, miaa ming, 5anangkuh vae paw tuutepaw phua, ahoypaw saphua, eri thing, 6maee aw nawlan chitui, thuhkuhpaw chitui hanlan te zimuin aphuinphuin, 7ranpibawi lepaw angki kya te a bybe kya bede lanpaw oniks lung hae te aphutepaw lung hae nynh thua. 8Te minmin laku ka um ccaw, beikinnthyaa ccangkheit kha yn raepah hae sah. 9Kae muihsah cih paw accinccang balyn thyhte beikbu te a lungkhu e uccaw hae kha na rae cih oh.
Byakin Thingkua
(Exo 37.1-9)
10“Minmin nynh eri thing te thingkua kha a rae cih hae; tuh-e tuh asaepaw dong ning khaw kheit, akopaw dong kheit khaw kheit, ahangpaw dong kheit khaw kheit athua cih. 11Tuh-e alungkhu te atolang kha sui ccipaw te na thei cih, po voilu lan sui te arae kha na mia cih zah na rae cih. 12Sui bawtary ccangpali na rae cih zah thingkua apaki ki pali kyakhe, voikheit lang ze ccangning ccite na sae cih. 13Eri thing kha puihnawpaw ccong lang na rae cih zah sui te na thei cih. 14Te thingkua puih nawlan puihnawpaw ccong kha thingkua apaki kya umpaw sui bawtary hae lungkhu lang na ruh cih. 15Puinawpaw ccong tuh thingkua kya-e sui bawtary hae kya po a um cih zah ccanglang na lah lan khyh. 16Nang kae pya cih paw byakinnaw kha thingkua lungkhu na nung cih.
17Dong ning khaw kheit sae zah dong kheit khaw kheit akopaw thingkua ahu kha sui ccipaw te na rae cih.#Heb 9.5 18Sui te raepaw cherubim ccangning kha na rae cih; tuh-e hae tuh thingkua ahu voikheit voikheit langkhe na deihping cih. 19Thingkua hu voikheih lang dung khe cherubim ccangkheit, ccangpaw voikheit lang dung khe cherubim ccangkheit na rae cih zah, thingkua ahu dung san ning kyakhe cherubim hae kha na rae cih. 20Cherubim hae tuh mih sake kha avawlan a daw cih hae zah thingkua ahu kha phang a bong cih hae. Mih mae tuh a hawiliakuh cih hae zah, thingkua hu kalan khe a do cih hae. 21Ahu kha thingkua vawlan na khang cih zah, kae pya cih paw byakinnaw kha thingkua lungkhu na nung cih. 22Tuin kya namaw te tungku lan, te ahu vawlan, byakin thingkua vawlan umpaw cherubim ccangning laku kyate Israel hae hanlan kaw kae pyapaw balyn kha kae pya cih.
Umkhaenaw Sanlou hanlan Ccaboi
(Exo 37.10-16)
23Asaepaw dong ning, akopaw dong kheit, te dong kheit khaw kheit ahangpaw ccaboi ccangkheit kha eri thing khate na rae cih. 24Tuh-e tuh sui ccipaw te na thei cih zah, arae kha po voilu lan sui te na mia cih. 25Ccaboi arae kha zapae ko lante po voilu lan na rae cih zah, tuh-e arae kha sui te po na mia cih. 26Tuh-e ccaboi elang sui bawtary ccangpali kha na rae cih zah, ccaboi apaki ki pali kya umpaw ccaboi ccu ccupali kyakhe ccarou na heede cih. 27Ccaboi puihnawpaw ccong ruh nawlan raepaw bawtary hae tuh arae kya miapaw khate anaekuh cih hae. 28Puihnawpaw ccong eri thing hae kha na rae cih zah sui te na thei cih hae, te tuh-e hae khate ccaboi kha puih athua cih. 29Zimuin nung nawlan angphe hae te pakekhupaw hae, te niapaw ahlu ccae nawlan banang lepaw hae te ccekoh hae kha na rae cih zah, sui ccipaw te na thei cih. 30Ka malang ccaboi kyakhe Umkhaenaw Sanlou kha zungzae na nungpah cih.#Lev 24.5-8
Maee Tung
(Exo 37.17-24)
31Akaran pheipaw maee tung ccangkheit kha sui ccipaw te na rae cih. Maee tung aleihpaw te atungpi tuh deihde te raepaw athua cih; a banang hae, apaw pawnahpaw hae te apawkary hae kha atungpi ryte na raede cih hae; 32tuh-e akaran pheipaw maee tung kyatuin akaran ccangtaruh a um cih, akaran ccangthum tuh voikheit lang a um cih hae zah, ccangpaw akaran ccangthum tuh ccanglang a um cih hae; 33akaran ccangtaruh kya-e ccangkheit cci kyakhe almon haetapaw te alokuhpaw banang ccangthum kha apaw pawnahpaw te apawkary ryte a um hae. 34Maee tung kya mah almon haetapaw te alokuhpaw banang ccangpali um zah, ccangkheit cci tuh apaw pawnahpaw hae te apawkary hae a hoi hae. 35Akaran bua thum aleihpaw hae kyatuin apaw pawnahpaw ccangkheit cci a um cih. 36apaw pawnahpaw hae, akaran hae te maee tungpi tuh deihpingpaw sui ccipaw pynkheit athua cih hae. 37Maee tung hanlan maeekhua ccangsari kha na rae cih zah, malang a aw ccaw cite maeekhua hae kha na aw cih hae. 38A tetakia te maeloi luanawpaw hae kha sui ccipaw te na rae cih. 39Maee tung te a uccaw hae balyn kha rae nawlan sui ccipaw pung za kheit na mang cih. 40Mua vawlan kae muihsahpaw accinccang thyhte na rae ccaw syntawkuh.#Loc 7.44; Heb 8.5
Currently Selected:
EXODUS 25: ZB16
Highlight
Copy
Compare
Share
Want to have your highlights saved across all your devices? Sign up or sign in
Zotung Bible © Bible Society of Myanmar, 2016.
