EXODUS 24
24
Byakin Chii
1Oute Bawipaw nynh Moses kha, “Nang te Aaron, Nadad, Abihu te Israel piccan hae sung sari tuh ka kalan oun kaethung oh lah asawnaw khate oun beik oh. 2Moses makhae nynh Bawipaw pe lang a cceih cih; thuasalama ming hae tuh naekuh lan khyh hae, te ccungccaw hae tuh Moses ryte kaethung bua lan khyh hae,” a ci.
3Moses tuh yn thua zah Bawipaw bya balyn te phungzae balyn kha ccungccaw hae kha a hopya hae; te ccungccaw balyn nynh, “Bawipaw nynh a hopaw bya balyn kha kae cyih cih,” cite roi roikheit te a leih hae. 4Te Moses nynh Bawipaw bya balyn kha a zei. Aning nynh awkhua takaw khe tho zah mua leihpaw khe silawhang kha a rae, Israel phin haw lae ning hanlan lungbing haw lae ning kha a bing. 5Aning nynh Israel ccangvae hae kha saw hae zah minmin nynh Bawipaw kalan maee-ute silawnaw kha a rae hae, ccawkunaw silawnaw hae lante tangnuapaw hae khate si a law hae. 6Moses nynh chii angankuh kha lah zah pakepi kya a nung, te chii angankuh kha silawhang vawlan a hei. 7Oute byakin ccauh kha lah zah ccungccaw hae a thaenaw hae khe a ria; te minmin nynh, “Bawipaw nynh a hopaw balyn kha kae cyih cih zah kaw kae ngae cih,” a ci hae. 8Moses nynh chii kha lah zah ccungccaw hae kha hei hae zah, “Ngaetua oh, e bya hae balyn ae pyanaw oh thyhte Bawipaw nynh nae tungvaw a raepaw byakinnaw kya-e chii nynh thua,” a ci.#Mat 26.28; Mar 14.24; Luk 22.20; 1Ko 11.25; Heb 9.19-20, 10.29
Pachia ryte Mua vawlan
9Oute Moses te Aaron, Nadab, Abihu te Israel piccan sung sari tuh kaethung hae zah 10Israel Pachia kha a muih hae. A ccu kaw khe safaiar lung te aphaekuhpaw alopaw, thyaararihpaw vaawlui alopaw a um. 11Pachia nynh Israel lupi hae tungvaw kuih hangnua khyh hae; minmin nynh Pachia kha mah a muih hae, te ae hae zah a neih hae.
12 Bawipaw nynh Moses kha, “Kamaw kalan mua vawlan yn kaethung lah yn umtua; minmin ccangpya nawlan cite upadi te kawbya ka zeinawpaw lungphe hae kha kae pya cih,” a cipya. 13Tukeiccuze Moses tuh ryalaw a bawmtu Joshua ryte a cceih hae, te Moses tuh Pachia mua lang a kaethung. 14Moses nynh piccan hae kha, “Nae kya kae thua mawlaezung hein kya nae la ngaw cih oh; Aaron te Hur tuh nae kya a umbua hae, tukeiccuze bya a lung hae paw humhung zemah minmin kalan a cceih cih hae,” a cipya hae.
15Oute Moses tuh mua vawlan a kaethung, te maeking nynh mua kha phang a zithin. 16Bawipaw phu-enaw tuh Sinai Mua vawlan um zah maeking nynh mua kha nin taruh lungkhu phang a bong; nin sarinaw nin khe Bawipaw nynh Moses kha maeking kyate a ko. 17Bawipaw phu-enaw tuh aruapaw maee hawte mua dung khe Israel hae muihnaw kya a langkuh. 18Moses tuh maeking lungkhu lang tee zah mua vawlan a kaethung, tuin kya nin sung pali te zi sung pali a um.#Deu 9.9
Currently Selected:
EXODUS 24: ZB16
Highlight
Copy
Compare
Share
Want to have your highlights saved across all your devices? Sign up or sign in
Zotung Bible © Bible Society of Myanmar, 2016.
