EXODUS 10
10
Vaetaryanaw Shethya: Tungkhipaw
1Oute Bawipaw nynh Moses kha, “Faro kalan la cceih; pawccecize kamaw kya-e muihsahnaw hae kha minmin kya langsaku ka ry keiccuze Faro te a ryalahtu bawi hae mih lung kha ka khungsah vae hae, 2Tuh-e tuh Izip hae kha a ngaeepaw ccungccaw lang pawtemou ka rae hae cipaw te minmin kya pawcihawpaw ngaeangnaw mou ka rae cipaw kha nae ccaaw hae te nae mintaw hae kha na hopah oh zah, tuhcite kae tuh Bawipaw nynh ka thua cipaw nae nyh cih oh,” a cipya.
3Moses te Aaron nynh Faro kalan cceih hae zah, “Hebru hae Pachia Bawipaw nynh hynhte a ho, ‘Ka malang zakawsangsaku lanpaw kha hohsemou na ei ung cih? Kamaw kha beik khylan ka ccungccaw hae kha cciasah hae. 4Ka ccungccaw hae kha cciasah lan na ei zetuh, la do vae, tungkhipaw hae kha na ram lungkhu lang awkhualan kae thuakhae cih. 5Tuh-e tungkhipaw hae nynh laephi kha hung nynh san muih kho um lei lan, a lang lei lan a bong cih hae; naemaw kya alaepaw, hya nynh a ro leipaw miakaw kha a ae cih hae. Nae loo kya apopaw aku miakaw kha a ae cih hae. 6Na inn hae, na ryalahtu bawi hae inn balyn te Izip hae inn balyn kya phe a beih cih hae; tuh-e tuh na paaw, na minpaaw hae nynh laephi vawlan a um takaw hae te atu cia muih boi lan khyh hae,’ a ci,” cite a hopya hae. Te Faro kyate maeleihkuh hae zah a pou vae hae.
7Faro a ryalahtu bawi hae nynh Faro kha, “E ccungccapaw nynh hohsemou vawsawnaw oun pya ung cih? Minmin nynh mih Bawipaw Pachia kha a beik ccaw hae, cceih ccavae hae sah; Izip ram phe roh vae cipaw na nyh loh khyh tou?” a cipya hae. 8Tukeiccuze Moses te Aaron kha Faro kalan bua cciakhae hae zah Faro nynh, “Cceih oh lah Bawipaw nae Pachia kha la beik oh! Thuasalama a cceih cih hae paw tuh hum hae mou?” a ci. 9Moses nynh, “Kae mino hae te kae piccan hae ryte kae cceih cih; kae ccapaw hae, kae ccanung hae, kae tuu hae te kae miaa hae, te kae vaetua hae ryte kae cceih cih, pawccecize Bawipaw kalan beiknaw poi kha kae tua cih,” a ci. 10Faro nynh minmin kha, “Bawipaw nynh ae umkhae ccaccing cih oh, nae ccaaw hae hynh nae kya ka cciasah bua hae lanze, nae thinlung kya ahoy leipaw eenaw na hoi oh cipaw phe aria. 11Tuhte thua lan khyh! Nae ngia oh hawte pise hae nynh la cceih oh lah Bawipaw kha la beik oh,” a cipya hae. Te minmin kha Faro umnaw kyate a dee hae.
12Oute Bawipaw nynh Moses kha, “Tungkhipaw hae nynh Izip ram kya oun thua hae zah hya nynh a ro leipaw aku miakaw, laephi kya alaepaw balyn kha pong a ae ccaw hae, Izip ram vawlan khe na kuih dyngtua,” a cipya. 13Tukeiccuze Moses nynh Izip ram vawlan khe a kuih a dyng, te Bawipaw nynh tuh-e nin kya khuazi khuadae nithua lang e khisan kha a zawsah; awkhua he yn thua tuh, nithua lang e khisan nynh tungkhipaw hae kha oun thuakhae vae hae. 14Tungkhipaw hae tuh Izip ram balyn kya oun thua hae zah Izip ram pynpi kya a um hae, tuhcih alungpaw tungkhipaw phu hae tuh langmaw zemah um boi khyh zah malang zemah um boi vae lan khyh.#Bya 9.2-3 15Tuh-e tungkhipaw hae nynh ram balyn kha phe man lan a bong hae; ram kya umpaw aku balyn te hya nynh a ro leipaw, alaepaw thingthae balyn kha pong a ae hae; Izip ram balyn kya umpaw loo kya-e thingku-ruaku hae kya ahinpaw anaw um vae khyh. 16Tetuh Faro nynh Moses te Aaron kha arangte ko hae zah, “Nae Bawipaw Pachia tungvaw te nanning tungvaw phe ka sei vae. 17Tukeiccuze atu vaekheit kyalya ka seinaw kha yn ngaethya oh lah, e chinaw detahnaw kyalya hynh Bawipaw nae Pachia nynh yn vuapya kho nawlan amaw kalan saw yn sangpah oh,” a ci. 18Tukeiccuze Moses nynh Faro kyate toikuh zah Bawipaw kalan saw a sang. 19Bawipaw nynh khisan kha myarya athawsaepaw niccaw lang e khisan lang tangsah zah tuh-e khisan nynh tungkhipaw hae kha hangthung hae zah Rili Se kalan pong a mung hae. 20Thuasalama Bawipaw nynh Faro thinlung kha khungsah zah Faro nynh Israel hae kha cciasah lae khyh hae. Izip ram balyn kya tungkhipaw sa kheit sanmah um vae khyh.
Vae Takuanaw Shethya: Mohnaw
21Oute Bawipaw nynh Moses kha, “Izip ram balyn kya mohnaw a um nawlan te tuh-e mohnaw tuh hae khopaw mohnaw athua nawlan, na kuih kha vaawlang khe dyngtua,” a cipya. 22Tukeiccuze Moses nynh a kuih kha vaawlang khe dyng zah varyng zipingpaw mohnaw tuh Izip ram kya nin thum lungkhu a um.#Sam 105.28; Bya 16.10 23Izip hae tuh lu kheit te lu kheit muihkuh kho khyh hae, nin thum lungkhu mih umnaw kyate thokuh kho khyh hae; thuasalama Israel hae balyn tuh mih umnaw kya awnaw a mue hae. 24Oute Faro nynh Moses kha ko zah, “Cceih oh lah Bawipaw tuh la beik oh. Nae tuu hae, nae miaa hae, te nae vaetua hae kyalya kha nungsya oh. Nae ccaaw hae kha naemaw kya cceihbua hae sah,” a cipya. 25Thuasalama Moses nynh, “Bawipaw kae Pachia kalan pya lanpaw silawnawpaw hae te maee-ute silawnaw lanpaw sahiin hae kha nae pya cih. 26Kae sahiin-awvaw mah kaemaw kya a cceihbua cih hae, sa kheit sanmah kae cciataw lan khyh, pawccecize sahiin hae laku e abang kha Bawipaw kae Pachia beik nawlan kae po cih. Bawipaw beik nawlan pawcihawpaw sahiin mou kae mang cih cipaw kha tuin kya kae thua maw tuh kae nyh lan khyh,” a ci. 27Thuasalama Bawipaw nynh Faro kha a lungkhungsah zah, Faro nynh Israel hae cciasah lanpaw kha ry khyh. 28Oute Faro nynh Moses kha, “Kamaw kyate pou! Ka mae bua nae muih khyh nawlan raeringkuh, pawccecize ka mae he nae muih nin tuh na chih cih,” a cipya. 29Moses nynh, “Na ho hawte thuasah! Na mae kha nyalang kharouh kae muih vae lan khyh,” a cipya.
Currently Selected:
EXODUS 10: ZB16
Highlight
Copy
Compare
Share
Want to have your highlights saved across all your devices? Sign up or sign in
Zotung Bible © Bible Society of Myanmar, 2016.
