LOCCEIHTU 9
9
Saul A Lungpaleihkunaw
(Loc 22.6-16, 26.12-18)
1Saul tuh Bawipaw zuitu hae kha hurawte chia lanpaw kha hy lang a sue, te ranpibawi lupi kalan cceih zah, 2Bawipaw Laanpi a zuipaw ka muih ze, nopi pise ci leite ka kyng cih zah Jerusalem lang ka cciakhae ccaw cite Damaskas khua e sinakok uktu hae kalan pya lanpaw ccaw kha a ngiaku. 3Saul tuh cceih zah Damaskas khua a thuadyn khe, vaekheihmawte vaawlang te awnaw nynh a pepan balyn khe phaephae a ak. 4Saul tuh laekhu kya a khuliakuh; te, “Saul, Saul, pawccemou kae hynh nae tuaa nae sah?” cite a hopahpaw roi ccangkheit kha a thae. 5Saul nynh, “Bawipaw, nang tuh hummou?” cite a khung. Tuh-e roi nynh, “Kae tuh na tuaa na sahpaw Jesu nynh ka thua. 6Thokuh lah khualae lungkhu lang cceih lah, na cyi lanpaw kha hopya na thua cih,” a cipya. 7Amaw ryte khuaccongkheih hae paw tuh yccae leite a thadyn hae, roi kha a thae hae zemah hum sanmah muih khyh hae. 8Saul tuh laekhu kyate thokuh zah a mit he dae tuh, pawpaw mah muih kho vae khyh; tukeiccuze a kuih te kyng hae zah Damaskas khua lungkhu lang a cciakhae hae. 9Saul tuh nin thum cia ngawmuih khyh, looh mah ae khyh zah tui mah neih khyh.
10Damaskas khua kya Ananias a ci hae paw zuitu lu kheit a um; Bawipaw nynh tuh-e paw tuh vizin kyate, “Ananias” cite a ko. Aning nynh, “Bawipaw, hein kya mang ka um,” a cipya. 11Bawipaw nynh, “Thokuh lah Laan Ding a ci hae paw laanpi langkhe cceih lah, Judas inn kyakhe Tarsas khuapaw Saul a ci hae paw kha la ccung, aning tuh saw a sang cciamang. 12Ananias a ci hae paw nynh yn tee zah a mit ngaw a muih nawlan a tungvaw kya a kuih khangpaw kha vizin kyate a muih vae,” a cipya. 13Ananias nynh, “Bawipaw, tuh-e paw nynh Jerusalem kya na mithyaa hae tungvaw kya hoyleinaw kha pawcih nynh a rae cipaw kha ccungccaw patae nynh a ho hae paw ka thae. 14Hein kya mah na min a kopaw balyn kha kyng kho nawlan kawhoinaw kha ranpibawi lepaw hae kyate a mue,” cite a khung. 15Thuasalama Bawipaw nynh, “La cceih, pawccecize aning tuh Zenta hae, siapharan hae te Israel hae kalan ka min cciakhae nawlan ka po vae paw uccaw nynh thua. 16Pawccecize aning tuh ka min keiccuze pawcih nynh vawsaw a teing cih cipaw kha ka muihsah cih,” a cipya. 17Tukeiccuze Ananias tuh cceih zah inn lungkhu lang a tee; a kuih kha Saul tungvaw khang zah, “Ka neitaw Saul, hynhlang nae ccia lya laanpi kya na kalan yn langkuhpaw Bawipaw Jesu nynh, nang ngaw na muih nawlan te Thyaa Muisaw te phe na bia nawlan kae hynh yn saw,” a cipya. 18Vaekheihmawte Saul mit kyate ngasawphaluh alopaw tuh yn ccah zah ngaw a muih vae. Te thokuh zah baptisma a in. 19Aning tuh looh ae zah a thaw yn sae vae. Saul tuh Damaskas khua kya umpaw zuitu hae ryte nin beihtaraw a umkheih hae.
20Paul nynh sinakok kyakhe, “Jesu tuh Pachia Ccapaw nynh thua,” cite Jesu kong kha palou a ho kangmaw vae. 21A hopaw kha a thaepaw balyn nynh mih ngaeangthua zah, “E paw hynh Jerusalem kya Bawipaw min te sawsang hae paw kha a rohtu thua khyh tou? Te minmin kha kyng lan hae zah ranpibawi lepaw hae kalan cciakhae lan hae cite hynhlang yn thuapaw thua khyh tou?” a ci hae. 22Thuasalama Saul tuh a thaw houhouh sae zah, Jesu tuh Messiah nynh thua cite he a ccaesah tuh, Damaskas khua kya umpaw Judah hae kha mih ngaeang a thuasah hae.
Saul Jerusalem lang A Ccue
23Nin patae aro koute Judah hae nynh Saul kha chia lan cite aruh lante khua a khanku hae.#2Ko 11.32-33 24Thuasalama tuh-e mih khuakhannaw tuh Saul nynh phe a ny. Saul kha kae chia ccaw cite koikua kha khuazi khuadae a ngaw hae. 25Tukeiccuze zuitu hae nynh khuazi khe Saul kha cciakhae hae zah shua lungkhu sang hae zah khualungrua vawlan te a sawbung hae.
26Saul nynh Jerusalem lang he a thua tuh, zuitu hae kya mungku bua lan a zuakuh; thuasalama aning tuh zuitu nynh thua cipaw a zyn khyh hae keiccuze zuitu hae balyn nynh amaw kha a rih hae. 27Thuasalama Barnabas nynh amaw kha hoei zah locceihtu hae kalan a cciakhae; te Barnabas nynh minmin kyakhe, Saul nynh Bawipaw kha laanpi kya pawcihte nynh a muih cipaw, Bawipaw nynh a kalan bya a hopyapaw te aning nynh Damaskas kya Jesu min te rawhoyte phung a ho cipaw kha a hopya hae. 28Tukeiccuze Saul tuh Jerusalem kya locceihtu hae ryte teekheih poukheih hae zah Bawipaw min te rawhoyte phung a ho vae. 29Grik bya a ho hae paw Judah hae ryte bya a eikuh hae; minmin nynh Saul kha chia lan a zuaku hae. 30Tuh-e tuh zyntu uno hae nynh he thae hae tuh, Saul kha Sisaria khua lang cciakhae bung hae zah Tarsas khua lang a saw hae.
31Judea ram, Galilee ram te Samaria ram balyn kya khriccaawbuu hae tuh daenaw hoi hae zah thawzung tynsah athua hae; Bawipaw rawrinaw kya te Thyaa Muisaw ngaengansahnaw kyakhe um hae zah a pungthung hae.
Aenias Dansahnaw
32Peter tuh khyzaw khuaccong zah Lidda khua kya a umpaw mithyaa hae kalan po a thua. 33Tuin kyakhe a kuihccuchih zah kum tarya cia a iphae kya a huekuhpaw Aenias a ci hae paw ccungccapaw kha a muih. 34Peter nynh, “Aenias, Jesu Khri nynh ae dansah vae, thokuh lah na iphae kha kuekuh!” a cipya. Aning tuh vaekheihmawte po a thokuh. 35Lidda khua te Saron khua kya um hae paw balyn nynh tuh-e paw tuh muih hae zah Bawipaw kalan a paleihkuh hae.
Lidda te Joppa kya Peter
36Joppa khua kya nopinung Tabitha a ci hae paw zuitu lu kheit a um. (a min tuh Grik bya te Dorkas cipaw nynh thua.) Tuh-e nopinung tuh a ccyh balyn kha ahoypaw ryalaw te ryachi bawmnaw kyakhe a mang. 37Tuh ccyh lyakhe aning tuh ccih zah a chih; tui he a sing kou hae te, palung khaan khe a nung hae. 38Lidda khua tuh Joppa khua te anaeku keiccuze Lidda khua kya Peter a um cipaw kha Joppa khua e zuitu hae nynh he a thae hae tuh, ccungccaw lu ning saw hae zah, “Kae kalan arangte beih yn cceih,” cite bya a taw hae. 39Tukeiccuze Peter tuh thokuh zah minmin ryte a cceihkheih hae; he a thua te, palung khaan lang a kaekhae hae. Nomae hae balyn tuh Peter pe khe thadyn hae zah a rah lalia lan hae te, minmin ryte a umkheih lya hae ze Dorkas nynh a kuapaw angki te boeilakhua hae kha a muihsah hae. 40Peter nynh mih balynte atolang a pousah kou hae te, a ccukharutung zah saw a sang. Dorkas a rhua kalan khe hawi zah, “Tabitha, thokuh,” a ci. Tetuh tuh-e nung tuh a mit yn dae zah Peter kha he a muih te, thokuh zah a dahung. 41Peter nynh a kuih kha dyngpah zah a tho; te mithyaa hae te nomae hae kha ko hae zah a hiin vae paw tuh-e nung tuh a muihsah hae. 42Tuh-e kong tuh Joppa khua kya pong nyh hae zah ccungccaw patae nynh Bawipaw kha a zyn hae. 43Peter tuh Joppa khua kya saphua uccaw a raepaw Simon a ci hae paw ryte nin patae a umkheih hae.
Zotung Bible © Bible Society of Myanmar, 2016.