LOCCEIHTU 8
8
Saul nynh Khriccaawbuu A Tuaasah
1Stefen a chianaw hae kya Saul mah a nawccahbua. Tuin nin kya Jerusalem a umpaw khriccaawbuu tuh myarya ccihpaw tuaasahnaw kha a teing; locceihtu hae holeite zyntu hae balyn tuh Judea ram te Samaria ram kya phiariphiarae pong a um hae. 2Beiknaw lang a zuakuh hae paw nynh Stefen kha uh hae zah a hanlan thawmawte a rah hae. 3Saul nynh khriccaawbuu kha a ro, inn takyh kalan teenua hae zah nopi pise ci leite sue hae zah thonginn kya a saw hae.#Loc 22.4-5, 26.9-11
Samaria kya Thehoypaw Ho hae
4Phiariphiarae um hae paw nynh hmin takyh lang cceih hae zah Pachia bya kha a ho hae. 5Filip tuh Samaria khuapi lang cceihbung zah Messiah kong kha a hopya hae. 6Ccungccaw zapi nynh thae hae zah Filip nynh a langsakupaw muihsahnaw hae kha he a muih hae tuh, a hopaw bya kha hoyte a ngae hae. 7Pawccecize athyaa leipaw muisaw bahkuhpaw ccungccaw patae lungkhu kyate athyaa leipaw muisaw hae tuh raerae sia hae zah a pou hae; kuihccu chihpaw patae te ccukhou hae patae tuh a dan hae. 8Tuh-e khuapi kya myarya lepaw lungtuanaw a um.
9Simon ci hae paw ccungccapaw lu kheit nynh tuh-e khuapi kya langmawlya mitleih la pia he zah amaw tuh alesaepaw ccungccaw nynh ka thua la cikuh zah Samaria khuapi kya-e ccungccaw hae kha mih ngaeang la thuasah hae. 10Adih huapaw kyate ale huapaw kyacia mih balyn te, “E ccungccapaw tuh Pachia kya-e thungnaw lepaw nynh thua,” ci hae zah a bya kha hoyte a ngaepya hae. 11Mitleih te minmin kha khaw cia mih ngaeang a thuasah vae hae keiccuze a bya kha hoyte a ngaepya hae. 12Thuasalama Filip nynh Pachia peenaw kong te Jesu Khri min kong a hopaw kha minmin nynh he a zyn hae tuh, nopi pise baptisma a in hae. 13Simon heize a zynbua vae; baptisma a in koute Filip kya zuikuh bua zah muihsahnaw hae te myarya khuaruaru lan umpaw ryalaw hae kha muih zah a ngaeang myarya thua.
14Jerusalem kya umpaw locceihtu hae nynh Pachia bya kha Samaria hae nynh a ccoubua vae hae cipaw kha he a thae hae tuh, Peter te Johan kha mih kalan a saw hae. 15Minmin he a thua hae te, Samaria hae nynh Thyaa Muisaw a ccoubua ccaw hae cite saw a sangpya hae. 16Pawccecize minmin kyaze hum tungvaw kya sanmah Thyaa Muisaw ccah boi loh khyh; Bawipaw Jesu min kyalya te nynh baptisma a in ung hae. 17Peter te Johan nynh mih kuih kha mih tungvaw khang hae zah minmin nynh Thyaa Muisaw kha a mue hae. 18Locceihtu hae kuih khangnaw liate Thyaa Muisaw tuh mue athua cipaw kha Simon nynh he a muih tuh, minmin kha phua pya hae zah, 19“A tungvaw kya ka kuih ka khangpaw miakaw nynh Thyaa Muisaw a ccoubua nawlan hae kae mah hynh-e thungnaw huhan hynh yn pyabua oh,” a cipya hae. 20Thuasalama Peter nynh, “Pachia lasung tuh phua te re kho lan cite na tuaku keiccuze na phua tuh namaw ryte roh sah! 21Na thinlung tuh Pachia muihnaw kya ahme khyh keiccuze nang tuh hynh-e kya na sekuh bua khyh. 22Tukeiccuze hynh-e na hoyleinaw hynh ngaesikuh lah, na thinlung kya-e na eenaw kha ngaethya na thua nawlan Pachia kalan sawsangkuh. 23Pawccecize nang tuh myarya khahpaw sanyngkhaw kya te hoyleinaw thonginn kya nynh na um cipaw ka ny,” a cipya. 24Simon nynh, “Na hopaw hynh ka tungvaw kya ccangkheit san acyiku khyh nawlan Bawipaw kalan saw yn sangpah bua oh,” cite a khung.
25Peter te Johan nynh Bawipaw bya kha ccaekiakhan hae zah a ho kou hae te, Jerusalem lang ki hae zah Samaria hae khua patae kya thehoypaw kha a ho hae.
Filip te Ethiopia paw
26Bawipaw vaawpaw nynh Filip kha, “Thokuh lah Jerusalem kyate Gaza lang a cceihbungpaw ramkaw laanpi khate alia langkhe cceihbung,” cite a hopya. (E laanpi hynh mang vae khyh hae). 27Filip tuh thokuh zah a cceih. Tuh ccyh lyakhe Ethiopia siapharannung Kandas kuihkaw e bawi lepaw, siapharannung sisua balyn a do-oihtu tinreihkuhpaw Ethiopia paw tuh Pachia beik lan cite Jerusalem lang cceih zah, 28a ki lyakhe a marangle kya dahung zah profeh Isaiah ccauh kha a ria. 29Thyaa Muisaw nynh Filip kha, “Khuh-e marangle kalan cceih lah, naeku tua,” a cipya. 30Filip nynh marangle kalan ccue zah, tuh-e paw nynh profeh Isaiah ccauh a riapaw kha he a thae tuh, “Na riapaw kha na thaethya tou?” cite a khia. 31Aning nynh, “Lukhakheit nynh yn hopah leite pawtemou ka thaethya kho cih?” a ci. Aning nynh Filip kha marangle kalan kaebua lan te a pe dahungbua lan a ko. 32Tuh-e paw nynh a riapaw Ccathyaa tuh:
“Saw theihtupaw kalan
a cciakhae hae paw tuu hawte
amaw kha cciakhae hae zah,
tuutaw nynh a ming ngotupaw malang
sia leite a um hawte
aning tuh a mung kha a myh.#Isa 53.7-8 (LXX)
33Maethya a teingnaw kya
amaw kha atazae lei lante
bya a pia hae; a hiinnaw kha
laephi kyate lawpya athua keiccuze
hum nynh mou a ciihan hae kha
a thaesah vae cih?”
a cikuh.
34Tuh-e tinreihkuhpaw nynh Filip kha, “E hynh profeh nynh hummou a honuathe? Amaw maw tou? Tuhkhyhze mingccangpaw tou a honuathe? Beih yn hopah,” cite a khia. 35Filip nynh tuh-e Ccathyaa kyate tho zah Jesu kong kha a hopya. 36Tuhte laanpi kya a ccia lya hae khe, tui umnaw san kheit kya thua hae zah tinreihkuhpaw nynh, “Dotua, hein kya tui mang um! Baptisma in lanpaw hynh paw nynh mou yn khaw?” a cipya. 37Filip nynh, “Na thinlung balyn te na zyn zetuh baptisma na in kho,” a cipya. Aning nynh, “Jesu Khri tuh Pachia Ccapaw nynh thua cipaw ka zyn,” cite a khung. 38Marangle kha thadynsah lan kawpya zah Filip te tinreihkuhpaw tuh parouhte tui lungkhu lang cceihbung hae zah Filip nynh tuh-e paw tuh baptisma a pya. 39Minmin nynh tui kyate he oun pou hae tuh, Bawipaw Muisaw nynh Filip kha po lah zah tinreihkuhpaw nynh muih vae khyh; te aning tuh a ccianaw laanpi kya lungtuate a cceih. 40Filip tuh Azotas khua kya langkuh zah tuin kyate Sisaria khua kyacia khua takyh lang cciate thehoypaw kha a ho.
Zotung Bible © Bible Society of Myanmar, 2016.